Read bassa TAITOS 1 Bible Online

TAITOS 1 - bassa bible

TAITOS 1

¹Go Poul yɛu-ugondu[1] ya Agwatana keeni inɛ Jisus Krast, te teni cɛŋ ne rishe-tɛtɛtana ra atwa na Agwatana teri, keeni iyi-tumapa iwɛ-tɛkana nɛ teni cɛŋ ne eshe-tupatana Agwatana.

²Ibɛ i shɛ ashɛlatụ uraiŋ unyizo-nom, inɛɛ nɛ Agwatana na eri shi a dwa-ụzagwụ shiri-unu ibɛ nazhɛ aka angwụshɛ kwuni.

³Ama bi mbiseni iwɛ ɛtɛ caakwụ na aka ubwa na teni cɛŋ, tedure nu utumwa na bee n utegeni, te teni cɛŋ nu unu-tupana wa Agwatana na shɛ Bibicinji tu.

⁴No ofwo Taitos yɛu mi tugom, te teni cɛŋ ne riseh-tɛtɛtana ru na otu gbodongonu. Go tulubo-ti-biye, ni inyɛmɛnyɛmɛ keeni amɛ-olom na banɛ no olugwo Agwatana na shɛ Bishi tu, keeni Agwangwama tu Jisus Krast tu nama na bụ.

⁵Iwɛ ecilo ata Ngee bi genji ni Krete, iwɛ maa ụrɛcɛnganɛ aŋ iyi nɛ 'nyananɛ aŋ, maa tilegeni n-nyarɛ[2] nụ ụshɛpwụ ụshɛpwụ gana na ti Ngee bi peni-unu.

⁶Yaa shɛ bụtụ be elele namba na zasa unu-tusapa, na 'yajɛ biyikwo bu ko,[3] na miaụŋ mu bwa mu tɛtanɛ-rishe, mu naa na atwa suyanɛ shɛ ụshɛrɛya iwɛ masha ma aba mụ wɛ mu unu-hwụjɛ shɛ.

⁷Iwɛnɛ te bishiyeni-be-eshe[4] shɛ shɛ ba 'yaga unu-tusapa kwukwuŋ, iwɛnɛ tu baa shɛ uhiu-ihwɛ ya Agwatana. Bɛ shɛ shɛ bu na untangana ukwulana ubwa kiri o, bɛ shɛ shɛ bu na nda isɛbwɛ kakayɛ o, bɛ shɛ shɛ ba sha buswe o, bɛ shɛ shɛ ba 'yaga abwagara o, bɛ shɛ shɛ bo lubo ukwuribi o, bɛ shɛ shɛ bu no lubo titeni to orugwusu o.

⁸Ama ga sha bụtụ na ba ima agaiŋ, na bo lubo iyi ibiye, na ba 'yaga ahaŋsa tuhwungbɛ, na bụtụ bi tiririri, na bụtụ bi tijilo, keeni bụtụ na mama 'yaga.

⁹I shɛ tilɛɛ maa ga bu na untangana iwɛ tɛcara dimi, te teni cɛŋ ni imbisegeni, maa bu na ala kaana atwa ikɛnyi ni imbisegeni nɛ teni cɛŋ, maa bi nɛ vwɛ atwa na a nda ashamanjɛ uvwi.

¹⁰Iwɛnɛ po atwa ofwugwo a na hwụjɛ shɛ unu, aba du shɛ ajɛmɛ n-ndumwa mu tɛgadaga, aba shɛ atwa na a halakaka shihaŋsa sha atwa, Eju aba a nda iŋ gbaa.

¹¹I shɛ tilɛɛ maa a 'imɛ unu wa aba, aba shɛ atwa na o hwuŋzotongo amwamwa elele, iwɛnɛ to o mbisogono atwa iyi nɛ aa ga shɛ shɛ o mbisogono, iwɛ titeni to orugwusu.

¹²Bụtụ bu ko na shɛ bigesere na ashashɛ aba hiɛŋ, Atwa Krete a shɛ ejwe-ụzagwụ aka elele, aa shɛ isundɛ iwɛ, aa shɛ aruna a na 'yajɛ tidederishe ti iyimɛyɛ.

¹³Tiseyida tu ga tɛ shɛ ya iwɛ-tɛkana. Iwɛbɛ po vwɛ aŋ uvwi kpataa, iwɛ maa a nama hwungbɛ ne rishe-tɛtɛtana,

¹⁴Iwɛ maa kede a na hwulaga ashwa ata Eju o, kwo kaa unu-tupana wa atwa ata genji iwɛ-tɛkana o.

¹⁵Iyi elele namɛ rụmbɛɛ no ofwo atwa na namɛ du rụmbɛɛ, ama iyi elele zasa shɛshɛshɛ no ofwo atwa na zasa rụmbɛɛ keeni atwa na tɛtanɛ shɛ rishe o.

¹⁶A duma nu unu wa aba maa e mepi Agwatana, ama tɛnda ta aba ta tala ashamanjɛ ubwa. A shɛ anjɛ tupwaŋ, a hwụjɛ shɛ iwɛ o, e teni shi cɛŋ nu ugondu ubiye we elele o.