Read bassa TAITOS 2 Bible Online

TAITOS 2 - bassa bible

TAITOS 2

¹Ama gabụ, na duma iwɛ nɛ teni cɛŋ ni imbisegeni tuhwungbɛ.

²Kede n-nyarɛ mɛ shɛ eswe-mayaga o, ama ga shɛ atwa na 'yajɛ igɛhi, na ahaŋsa tuhwungbɛ, maa rishe ra aba tɛtɛtana ru na nama hwungbɛ, keeni tulubo, ni isɛbwɛ-ti'ima.

³Gobwonu du n-ndaụŋ mɛ shɛ ma sha ni imbisegeni ya aba, maa a shɛ eyikwo na teni cɛŋ keeni eyikwo tijilo, kede a shɛ eyikwo na a nda nzeci ma atwa ufwu nu unu o, kede a shɛ ajama mayaga tuswa o, ama ga shɛ embisegeni iyi ibiye,

⁴iwɛ maa o no mbisogono showow gana na i shɛ maa o no lubo olwo aba, na miaụŋ ma aba,

⁵maa a 'yaga ahaŋsa tuhwungbɛ, maa a nama rụmbɛɛ, maa a shɛ angbaracɛ nhwaŋ, maa a shɛ eyikwo ebiye, maa a shɛ eyikwo na momo tulonono olwo aba, iwɛ maa kede atwa na sapa n-ndumwa ma Agwatana unu o.

⁶Gobwonu du, na kaana esemberi ikɛnyi, maa a shɛ atwa na mama 'yajɛ.

⁷No momo mbisono maa bɛ shɛ bimenji bi biye ni iyi elele. Mbisono maa e mepi maa bo shiyono iwɛ-tɛkana eshe ni imbisegeni, maa bɛ shɛ bụtụ bi tikpeke,

⁸Na duma n-ndumwa mu tuhwungbɛ, maa kede a na bu pana n-ndumwa-tụwụma o, iwɛ maa ezuye na sha atwa na ma bu sukakana, iwɛnɛ ta a zasa iyi iwɛ nɛ aa bu kwụbɛtanɛ maa a jɛmɛ iwɛ ibɛ.

⁹Ga ajama no momo tulonono ụhwada shɛgwuma-shɛ-nhwaŋ ma aba ni iyi elele, maa a kwụlanɛ aŋ tebiye uzawa ashamanjɛ tɛnda na aba.

¹⁰Kede a na nda akarabụ karabụ o, ama ge meme mbiseni maa a shɛ atwa tɛcara gom, iwɛ maa a na nda imbisegeni ya Agwatana na shɛ Bibicinji tu tisemberi ni iyi elele kpaaŋ.

¹¹Iwɛnɛ po tulubo-ti-biye ta Agwatana tu, tu 'waŋnɛ ubino, taa bananɛ atwa kpaaŋ caakwụ,

¹²tu mo tu mbisogono maa ta laka masha na ma hashɛgana amɛ Agwatana keeni ukwedeyi ụwɛ unyizo ga, iwɛ maa ga uraiŋ na ata ya na aka ga hwuwayɛ nama hwungbɛ, maa ta sha atwa na namɛ ririri keeni eshe-tupatana Agwatana,

¹³maa ta 'yaka ashɛlatụ na ee zhemonjino keeni tubanɛ[5] tụ ụjɛrụma wa Agwatana ụ'wụtụ keeni Bibicinji[6] tu ge Jisus Krast.

¹⁴Na meme peni iwɛ tu, iwɛ maa me tu gwube, maa mo tu bicingo ni iyi iwɛ ye elele, maa kaa mama ndana atwa na bee teri shɛshɛshɛ, aba shɛ atwa na 'yajɛ tɛzhegɛdana iwɛ ugondu ubiye we elele.

¹⁵Na duma iwɛ gɛ, na kaana-ikɛnyi, nɛ vwɛ uvwi, nu unu-tupana hwɛɛ. Ta nda maa bụtụ be elele na bu ngbaraka cwɛŋ o.