Read bassa FILIMON 1 Bible Online

FILIMON 1 - bassa bible

FILIMON 1

¹Go Poul na shɛ bujama bu umwono-tishi iwɛ Krast Jisus, ne Timoti na shɛ yɛu-bino ɛtɛ tu. No ofwo Filimon na shɛ bụtụ tu bu tulubo, na kaa ba nda ugondu no tu.

²No ofwo Afia na shɛ bụngwụfwụ tu, keeni Akipos na ba nda tusaza no tu,[1] no ofwo tụ'ụlwa-tu-ụhiɛŋshɛ-Agwangwama tu na to sotulonu ni ihwɛ bu.

³Go tulubo-ti-biye keeni amɛ-olom na banɛ no olugwo Agwatana na shɛ Bishi tu keeni Agwangwama tu Jisus Krast, tu nama ne hiŋ.

⁴Ma nda ugwoje na Agwatana mi, Eme bi teyinje kaa na shidua shi mi ɛgbɛɛ.

⁵Gana na tu Ngaa hwụjɛ iwɛ tulubo tụ bụ keeni rishe ru na abu tɛtanɛ Agwangwama tu ge Jisus, keeni iwɛ atwa tijilo Agwatana kpaaŋ.

⁶Ma nda adua iwɛ maa ge rishe rụ bụ tɛtɛtana ri zhe du no ofwo anya atwa, maa rɛ njɛ du maa e mepi ugondu ubiye we elele na namɛ na amɛ tu tedure na Krast.

⁷Ɛ-yɛu-bino mi na amɛ Krast, N 'yajɛ unyasa keeni ti'ingatanga tụ 'wụtụ tedure no tulubo tụ bụ, iwɛnɛ ebu gwuriseni shɛmɛ sha atwa tijilo.

⁸Hwuwayɛ go, N 'yajɛ ya eshe-hwoo gana elele na amɛ Krast maa Ma bu pana-unu maa njɛ iyi nɛ teni cɛŋ.

⁹Ama tuba okwo ti yaa shɛ bwonu, no tulubo, Ama bu tabwa, Gamba go Poul na shɛ iyɛri,[2] nɛ ee kepi du nu umwono-tishi iwɛ Krast Jisus.

¹⁰Ma bu tabwa iwɛ yɛu ɛtɛ Ngee meci na tukapa ti mi tu umwono-tishi, ubwa shɛ go Onismos.[3]

¹¹Bụ bụ zasana la uhwara aka oko, ama bụ bụ 'yaganɛ ya uhwara hwuwayɛ tu Gamba du.

¹²Ubwa ni ikɛnyi ibwɛ du Ngaa bu tumwananɛ sasana, iwɛ ubwa ce amɛ mi tebiye.

¹³I n kwụlanɛ maa Ma 'yaga bu no ofwo mi, iwɛ maa bu na ma ndana iyi, gana na yaa ga bụ kwụlanɛ maa na ma ndana iyi iwɛ tukapa tu ga tɛ shɛ iwɛ Anabarɛ Ebiye.

¹⁴Ama i n kwụlanɛ shɛ kaa maa Ma nda iyi elele uzawa tulono tụ bụ o, iwɛ maa kede uwebiye bu i shɛ gana maa ni iji Ngɛɛ zhɛ ma bu nda o, ama ga shɛ iyi nɛ banɛ nu ukwulana bụ.

¹⁵Nekeshi iwɛ ecilo ga bee bi genji la na aka fwalaa, iwɛ maa tuba 'yaga bu ya unyizo-nom.

¹⁶Ama shɛ gana bujama ya o, ama bu hwuri ya bujama, bɛ shɛ ya yɛu-bino tulubo. Inee mi kaa uhwuri ya inɛ bụtụ be elele hwɛɛ, ama gabụ tubaa? Bu bu hwuleni shi suu ya bujama, ta tu'waba, keeni na amɛ Agwangwama?

¹⁷Ibɛ po yaa shɛ abu n rɛcɛ maa N shɛ bụtụ na ba twa-ikpɛngwu na bu, asha lashɛga bu gana na ɛbi gɛ zhɛ bu ma n lashɛga yebe.

¹⁸Ama yaa shɛ baa bɛ njɛ iyi elele nɛ ibu gwumanɛ, kwo kaa baa bɛ yɛ la utashɛ, asha shiyono uŋ nu utashɛ na Ngaa bɛ yɛ.

¹⁹N zhɛ ma bu tụpa uŋ. Gamba go Poul ma 'nyacɛ n-ndumwa mu ga nu u'ala mu. N zha shɛ kaa mo bu hoŋtono maa gabụ ni ikɛnyi bụ bɛ n yɛ utashɛ o.

²⁰Ɛ-yɛu-bino mi na amɛ Krast, lono maa Ma ya ule no olugwo bu gom tedure na Agwangwama. Nda maa amɛ mi gwuriseni na amɛ Krast.

²¹M bu 'nyatanɛ ijɛ, iwɛnɛ ti Ngee eshiciji maa bi zhɛ ba hwuga-unu mu. Ngee mepi kaa du maa bi zhɛ ba nda te hwuri iyi nɛ Ngɛɛ bi hiɛŋ.

²²Inyɛwɛŋ nɛ, na ma imangana ofwo tuzokwu, iwɛnɛ tu Ngaa tɛtanɛ-rishe maa ɛ zhɛ me n gwuricinje pi hiŋ tedure na ajɛshɛgwa shidua shi hiŋ.

²³Gɛ Ɛpafras na namɛ ne mi nu umwono-tishi iwɛ Krast Jisus, ma bu 'walụ.

²⁴Ga Mak, na Aristakos, ne Dimas keeni Luk, a na a nda ugondu ne mi, a bu 'walụ du.

²⁵Go tulubo-ti-biye ta Agwangwama tu Jisus Krast tu nama na mpiala mi hiŋ.