Read bassa EHIBRU 13 Bible Online

EHIBRU 13 - bassa bible

EHIBRU 13

¹Na uranga ma tumomo lubonu, iwɛnɛ ahiɛ shɛ miaụŋ-mo-bino na amɛ Krast.

²Kede isɛbwɛ ya agaiŋ ti'ima ihi 'wi o. Tedure ni inɛ ɛtɛ ibɛ po atwa oko 'imɛ la atumwa-azuba ugaiŋ aka na ee mepi shi.

³Ne teyinje ma atwa na ee kepi nu umwono-tishi, gana maa ahiɛba na na aba ee kepi; atwa na aa nda umungwuta, ga shɛ maa ahiɛba aa nda umungwuta ata.

⁴Tụmbụla tɛ shɛ iyi ụjɛrụma tumuna ni iyi elele, ga atwa na a nda tụmbụla na nama na tɛcara na binya. Iwɛnɛ Agwatana zhɛ a duma hwuŋ ụshɛrɛya wa anjɛ-tuwɛle keeni anjɛ-tụlagwụ-tụ-wɛ.

⁵Ga masha mi hiŋ mu na laka ilubwe ukwuribi, ge iyi nɛ ahiɛ 'yajɛ na hi gwumwa. Iwɛnɛ ta Agwatana hiɛŋ, N zha shɛ ma bu ganga kwukwuŋ, N zha shɛ kaa mo bu jinoko kwukwuŋ.

⁶Iwɛbɛ po ata duma no ohwulu oko, ɛtɛ hiɛŋ, Agwangwama ubwa shɛ bimbiyeni mi, N zha shɛ ma nda inyɛsɛ o: Imbe bụtụ eri ma n ndaa?

⁷Ne Teyinje ma a'yagajɛ hiŋ, a na ihi mbishi n-ndumwa ma Agwatana. Na haŋsa ma iwɛ masha ma araiŋ aba tebiye. Na shata ma rishe-tɛtɛtana ra aba.

⁸Ge Jisus Krast namɛ gana na tu baa namɛ wenebe, tu hwayɛ keeni tutu unyizo-nom.

⁹To lono ma maa imbisegeni ifwo i tuswoswoswo na hi 'waŋnanga o. Ama i zhɛmɛ maa go tulubo-ti-biye tu no shikicingo ahaŋsa tu dimi, uhwuri iyimɛyɛ nɛ zasana sa atwa na a ya iŋ ule.

¹⁰Ti 'yajɛ utukwu-ụrụpɛ, unaa na atwa na a nda iyi na amɛ udulo-tugwuno zasa ụhwada maa a na ya iyi nɛ banɛ nu bwa.

¹¹Iwɛnɛ tu uhiu wo onongbo wo sugo mehieŋ mi isundɛ ɛtɛ oo to ụrụpɛ, boo tono no Ofwo ata Tijilo me Tijilo, maa ta ụrụpɛ iwɛwɛ na muba, ama ɛ zhɛ o hwoŋzhingo tuba isundɛ ɛtɛ no tupohondo tu ugba wa aba u tu'ulwa.

¹²Gobwonu du ge Jisus Krast njɛ la ụbaụta no tupohondo to odubo ụshɛpwụ ata, iwɛ maa nda atwa shɛshɛshɛ tedure ne mehieŋ mu bwa.

¹³Iwɛ ecilo ata, mizha ti zhe ma pi Jisus no tupohondo tu ugba ata, maa tu togwu ma du nu bwa nụ ụpụrụsa ata atwa njɛ bụ.

¹⁴Tu zasa ụshɛpwụ na zhɛ wo ilogogo epe o, ibɛ po ata jalakaka unaa na tee ci.

¹⁵Iwɛbɛ po atɛ shɛ tu na pana Agwatana ụrụpɛ wa ashɛtwa tedure ne Jisus tutu, inɛ ɛtɛ ibɛ shɛ timbisono tu unu na leni izeci ibwɛ.

¹⁶Ama kede isɛbwɛ ihi 'wi ni iyi ibiye tɛnda o, maa hi no dwotwogonu iyi nɛ ahiɛ 'yajɛ na anya hiŋ o. Ụrụpɛ gana ata kwụlanɛ Agwatana tebiye.

¹⁷Na hwuga ma unu we ehwurembe hiŋ, maa hi na nda iyi nɛ oo hi mbiso, iwɛnɛ ti yaa shɛ aba a ngbaraka shihwulu shi hiŋ, aba kaa zhɛ e sweji hwuŋ iwɛ ugondu wa aba. Yaa shɛ ahia hwuga-unu wa aba, asha unyasa zhɛ na sha aŋ nu ugondu wa aba tɛnda, maa kede i shɛ na amɛ-tụhaŋtụ o. Iwɛnɛ ti inɛ ɛtɛ ihi zasana sa ule.

¹⁸Na tu ndana ma adua; iwɛnɛ te eti mepi gom maa bimbisegeni-ba-shɛmɛ shi tu namɛ kpataa, ta jala kaa maa tu na nda iyi nɛ teni cɛŋ ni iyi elele.

¹⁹Ama Ma hi lụpa tebiye maa hiɛ njɛ adua, iwɛ maa Me gwure pi hiŋ kakayɛ kakayɛ.

²⁰Ga Agwatana amɛ-olom, na bɛcinjɛ Uhiu wa a'iywa-agwụdụ no tu'wo, tedure ne mehieŋ mu unu-tutwa unyizo-nom,

²¹na hiɛ ụrɛcɛnga nu ugondu ubiye we elele, maa hi na nda ukwulana ubwa. Ga bu na nda ukwulana ubwa na shɛmɛ shi hiŋ[60] tebiye, tedure nu ukpahiŋ Jisus Krast. Ga ụjɛrụma shɛ una ubwa tutu unyizo-nom. Ami!

²²Ama a-miaụŋ-mo-bino mi na amɛ Krast, Ma hi lụpa, lono ma maa ga n-ndumwa mu ga mu na hi kaana ikɛnyi. Iwɛbɛ po Ngaa hi 'nyatanɛ utakada ga ticwɛŋ bana.

²³Mapa ma maa ɛ gɛnjɛ yɛu-bino tu go Timoti, yaa shɛ bee ci, N zhɛ ma zhagajɛ nu bwa maa Ma hi kwụba.

²⁴'Walụ ma ehwurembe hiŋ kpaaŋ, na atwa tijilo Agwatana kpaaŋ. Atwa Itali ma hi 'walụ.

²⁵Go tulubo-ti-biye tu nama ne hiŋ kpaaŋ. Ami.[61]