Read bassa EHIBRU 5 Bible Online

EHIBRU 5 - bassa bible

EHIBRU 5

¹Uhiu wo onongbo we elele na ɛɛ vwɛ la na ashashɛ atwa, asha e shiri bu maa bu na ndana atwa iyi ni iyi nɛ shɛ iyi ya Agwatana, iwɛ maa bu na shɛkana apwaŋ keeni arụpɛ tuta iwɛ iwɛwɛ.

²Bi eri ba ima-isɛbwɛ no ogbodu keeni atwa na a ina, gana na ti bee lwegeji du ni ikɛnyi ibwɛ ni iyi ya Agwatana.

³Iwɛ ecilo ata, gana na tu baa ta arụpɛ iwɛ iwɛwɛ ya atwa, gobwonu du baa ta ụrụpɛ iwɛ iwɛwɛ ikɛnyi ibwɛ.

⁴I zasa kaa bụtụ na mama patana ụjɛrụma ata uhiu wo onongbo tisha ni ikɛnyi ibwɛ o, semi bụtụ na Agwatana suyanɛ kiri, gana na tu baa suyanɛ la Aron.

⁵Gana go du ga Krast meme peteni shi ụjɛrụma ata maa sha uhiu wo onongbo, ama Agwatana na jɛmɛ iwɛ nu bwa, ubwa hiɛŋ bụ, Gabụ bɛ shɛ Yɛu mi; hwayɛ ga Ngee bi meci.[17]

⁶Gana na tu baa jɛmɛ no ofwo anya, bɛɛ hiɛŋ, Gabụ bɛ shɛ bunongbo bu unyizo-nom, gana na ti gɛ Mɛlkizɛdɛk[18] shɛ la.[19]

⁷Na aka na ge Jisus[20] namɛ la epe na tu'waba, baa njɛ adua nu n'ungwa mụ 'wụtụ keeni malaba, baa tabwa Agwatana maa bicingo bu no tu'wo. Agwatana kaa hwụjɛ ga iwɛ ubwa, iwɛnɛ ti bee meme zucinje bee meme peni Agwatana.

⁸Okwo ti ge Jisus shɛ Yɛu ya Agwatana, bi seshi unu-tuhwuga tedure nụ ụbaụta na baa njɛ.

⁹Aka na ti ge Jisus ụrɛcɛnjɛ iyi elele, nazhɛ baa shɛ ya bipeni-bu-ubino unyizo-nom, iwɛ atwa elele na hwụjɛ-unu ubwa.

¹⁰Agwatana kaa peni bu izeci ɛtɛ maa, uhiu wo onongbo, gana na ti gɛ Mɛlkizɛdɛk shɛ la.

¹¹Tɛ ga 'yajɛ iyi nɛ gembi ufwugwo maa ta duma iwɛ n-ndumwa mu ga, inɛɛ nɛ kaa ecilo ibɛ gwụmɛ tuvwɛ, iwɛnɛ ta hiɛ shɛ atwa na lemengenji ni iwɛ tuhwuga.

¹²Okwo ti yaa shɛ gana ata, hi ga shɛ hia sha embisegeni, ukekeshi kaa uhi to maa bụtụ ihi mbisegeni sasana iyi ihiiŋ nu n-ndumwa ma Agwatana. Ukekeshi mosubo uhi to, shɛ iyimɛyɛ nɛ 'yajɛ ikɛnyi o.

¹³Bụtụ be elele na to subo mosubo, asha bu ta shɛ shɛ bugwoni ni iwɛ tiririri o, iwɛnɛ tu baa ta shɛ yɛu shenje.

¹⁴Ama iyimɛyɛ nɛ 'yajɛ ikɛnyi i shɛ iwɛ ogborofwu, aba shɛ atwa na mbisegeni shihaŋsa sha aba, maa shihaŋsa sha aba shi eshiciji tuswoswoswo ti iyi ibiye ni iyi iwɛ.