Read bassa EHIBRU 7 Bible Online

EHIBRU 7 - bassa bible

EHIBRU 7

¹Gɛ Mɛlkizɛdɛk ga, ubwa shɛ bunongbo ba Agwatana na Hwuri Kpaaŋ. Ubwa teji la Abraham uhwaŋna, na aka na tu ga Abraham be ci ujiyo, ti bɛɛ kwunɛ shɛgwuma shi neshi nu ujasa, bee peni Abraham uwebiye.

²Ubwa ga Abraham peni iyi-umpwa ye elele nɛ bee suje nu ujasa ata. Egini izeci ibwɛ ihiiŋ nɛ ɛɛ hiɛŋ, gɛ Mɛlkizɛdɛk, i shɛ agwuma Tiririri, nazhɛ baa shɛ agwuma Salɛm, nɛ egini ibɛ shɛ, Agwuma Amɛ-olom.

³Gɛ Mɛlkizɛdɛk ga, bu zasa bishi, bu zasa bino, kwo kaa ogwunukwoshi o, bu zasa ụjita na ee meci bu, kwo kaa ụjita tu'wo tu bwa o, ama bɛ shɛ gana Yɛu ya Agwatana. No tunongbo baa namɛ tutu unyizo-nom.

⁴Ama haŋsa ma de iwɛ ugombo bụtụ ga! Ga Abraham, na shɛ uhiu ụlamụ Isrɛl, peni bu iyi-umpwa ye elele nɛ bee suje nu ujasa.

⁵Iwɛ-tɛkana, e peni ajalalo Livai, a na leshiji ohwolu tunongbo unu tedure nu Undwa, maa ga a na lashɛga iyi-umpwa, ni i'ɛlɛ miaụŋ-mo-bino ma aba, okwo ta a shɛ du ajalalo Abraham.

⁶Ama bụtụ na aa rɛcɛ shɛ unabarɛ ụlamụ ubwa no ofwo ogwunukwoshi Alivai, ubwa leshiji iyi-umpwa ni i'ɛlɛ Abraham, nazhɛ bee peni Abraham na ee shileni-unu uwebiye.

⁷Ama i zasa ashamanjɛ elele o, maa bụtụ bụ 'wụtụ, ubwa peni bụtụ na gwumwa uwebiye.

⁸Na aka onongbo, atwa na o 'wo aba a lashɛga iyi-umpwa, ama ni iwɛ Mɛlkizɛdɛ na shɛ buumwa, ubwa leshiji iyi-umpwa.

⁹Ibɛ po eti eri tɛ hiɛŋ, Iwɛnɛ ti ga Abraham tupwa iyi-umpwa, ibɛ du po ajalalo Livai a na a lashɛga iyi-umpwa, a tụpa iyi-umpwa ni ikɛnyi aba.

¹⁰Bishi Livai te meci shi bu la na aka na ti gɛ Mɛlkizɛdɛk, teji Abraham uhwaŋna o.

¹¹Yaa ga shɛ ugondu tunongbo ta Alivai[28] unaa na atwa leshiji Undwa tedure nu bwa ga ulwa, asha ukekeshi ga zha shɛ wa nama ya maa bunongbo bi nya teni ohwolu Mɛlkizɛdɛk, tụlụkpashɛ to ohwolu Aron o.

¹²Iwɛnɛ po gana na to o sheyingo tunongbo, asha i shɛ tilɛɛ maa e sheyinji du undwa.

¹³Iwɛnɛ po bụtụ ga aa jɛmɛ iwɛ ubwa, ubwa shɛ Agwangwama tu na kaa shɛ bụtụ bụ ụlamụ unya. Ụlamụ ata kaa zasa bụtụ na njɛ la ugondu tunongbo nu utukwu-ụrụpɛ kwukwuŋ.

¹⁴I banɛ upeje maa Agwangwama tu banɛ nụ ụlamụ Juda, go Moses kaa jɛmɛ shɛ iwɛ bunongbo be elele nụ ụlamụ ata o.

¹⁵Ibɛ po inɛ gɛ keeni upeje tubanɛ, te kwuni na aka na ee teri bunongbo bi nya maa tono ohwolu Mɛlkizɛdɛk.

¹⁶Bunongbo ata kaa shɛ shɛ tedure nu undwa unu-tupana u butugwumwa o, semi tedure nu ukpahiŋ uraiŋ na zasa uce.

¹⁷Iwɛ ya Agwatana le bu tiseyida, yɛɛ hiɛŋ, Gabụ bɛ shɛ Bunongbo bu unyizo-nom, na teni ohwolu Mɛlkizɛdɛk.

¹⁸Iwɛnɛ po hiiŋ, e deci unu ụngwụshɛ tụpana, iwɛnɛ tu wee lwegeji, waa zasa kaa ule.

¹⁹Iwɛnɛ tu Undwa eri shi wa ụrɛcɛnjɛ iyi elele. Ibɛ po ee tecinje ashɛlatụ na zhɛmɛ uhwuri uŋ. Tedure na ashɛlatụ ga kaa otu gwumwongonu ya na Agwatana.

²⁰Agwatana teri shi bunongbo ga uzawa unu-tishilo! E teri la onongbo avwɛ uzawa unu-tishilo we elele.

²¹Ama ge Jisus shɛ bunongbo tedure nu unu na Agwatana shiri, na aka na bɛɛ hiɛŋ bụ, Gamba Agwangwama M momo to, N zha shɛ kaa mo sheyingo ahaŋsa o, N hiɛŋ, Gabụ kaa bi zhɛ ba sha bunongbo bu unyizo-nom.

²²Iwɛ ecilo ga, ge Jisus shɛ ya bile-bi-i'ɛlɛ bu unu-tutwa na kaa zhɛmɛ uhwuri una ala.

²³Onongbo ata angwụshɛ gembi la ufwugwo, iwɛnɛ to tu'wo ti leneni shi aŋ maa o to tuhwulo nu ugondu wa aba tutu.

²⁴Ama iwɛnɛ ti ge Jisus namɛ unyizo-nom, ibɛ po baa 'yajɛ ohwolu tunongbo tu na ee eri shi o sheyingo.

²⁵Iwɛbɛ po du bee eri bo bicingo atwa elele na o gwumwongonu na Agwatana tutu uce,[29] iwɛnɛ te e dure bu, gana na tu baa shɛ buumwa tutu, baa nda kaa orogwu iwɛ aba.

²⁶Uhiu wo onongbo gana ga, ubwa iti teneni cɛŋ, ubwa shɛ bụtụ bi tijilo, bu zasa unu-tusapa o, bu hashɛganụ sụ kaa o, bi meme shiri swooŋ na atwa iwɛwɛ, ibɛ po ee gembicinji bu uhwuri atwa elele na namɛ na azuba.

²⁷Ukekeshi te shi bu maa bu na ta ụrụpɛ iyi-heri iyi-heri, iwɛ iwɛwɛ ibwɛ hiiŋ, nazhɛ maa ta una wa atwa, gana na te ehiu onongbo a nda la o. Ama bɛ njɛ inɛ ibwɛ kpalụ ko gba, na aka na ti bee peni tukwugwu tu bwa nụ ụrụpɛ na boo to.

²⁸Undwa teri la atwa na lwegeji maa a shɛ ehiu onongbo, ama tuta tu na Agwatana momo to tu na ti zhajɛ na aba Undwa, ti teri Yɛu ibwɛ nɛ ulwa unyizo-nom.