Read bassa JEMIS 2 Bible Online

JEMIS 2 - bassa bible

JEMIS 2

¹A-miaụŋ-mo-bino mi na amɛ Krast, ta untangana ma rishe-tɛtɛtana ra AGWANGWAMA tu ụjɛrụma ge Jisus Krast na atwa tuzanga o.

²Yaa shɛ bụtụ shanɛ tɛkanɛ ta azhɛnarɛya, bee urigeni du tugwuno tu na tu pilanụ, bee teni nu umwono hiŋ ụ tụ'ụlwatagwụ, nazhɛ bukofwo na urigeni tuzuzu teni du.

³Ehi zweni bụtụ ata urigeni tugwuno ta ata tu pilanụ igbɛtɛtɛ, ɛhi hiɛŋ bụ, Hwure gɛga na ajɛjɛ ga ebiye, ɛhi hiɛŋ tuba bukofwo, Shikono apata, kwo kaa gɛga na cɛnjɛ, maa dongonu udusa ga Ama patangana ɛvwɛvwɛjɛ mi.

⁴Asha hi to momo bogotogwu su wa na ashashɛ hiŋ hŋ? Asha shɛ ajɛmɛ-ụshɛrɛya hŋ ahiɛ shɛ na tuhaŋsa ti hiŋ tụ wɛ?

⁵A-miaụŋ-mo-bino mi mu tulubo, hwulaga ma. Shɛ Agwatana suu teri okofwo unyizo ga, maa a shɛ tuba azhɛgba ne rishe-tɛtɛtana, maa a shɛ ayɛ-ogwu na Cɛnjɛ-ta-tugwama tu na bee shileni atwa na lubi bu unu?

⁶Ama hi ngbaracɛ okofwo cwɛŋ. Shɛ azhɛgba suu ma hi nda tuhwulo? Shɛ aba hŋ ma hi mbata na agba n-ndwụtwụ ma ajɛmɛ-ụshɛrɛa?

⁷Shɛ aba suu o gbozhigo izeci ɛtɛ ibiye aa ga hi suyana?

⁸Iwɛ-tɛkana, yaa shɛ ahia ụrɛcɛnga undwa wa Agwuma[6] tu, gana na ti Iwɛ ya Agwatana jɛmɛ, yɛɛ hiɛŋ, Bɛ shɛ bo lubo uyebi bu gana na obu momo lubo, asha hia nda tebiye.

⁹Ama yaa shɛ ahia zanga atwa, asha hia nda iwɛwɛ, asha Undwa du u hi vwɛ uvwi maa hiɛ shɛ ebweji-undwa.

¹⁰Bụtụ be elele na ba nda maa untangana Undwa hwɛɛ, ama yaa shɛ bee pindeni uko gba, asha bi pindeni du a na vwɛ hwɛɛ.

¹¹Iwɛnɛ po bụtụ ata hiɛŋ, Ta nda tuwɛle o, ubwa du kaa hiɛŋ, Ta kwụna bụtụ o. Ama yaa shɛ abɛ njɛ shɛ tuwɛle, abụ kwụnɛ kaa bụtụ, asha bɛ shɛ bubweji-bu-undwa.

¹²Iwɛ ecilo ata, na duma ma iwɛ, maa hi na nda du, maa hiɛ shɛ atwa na ɛɛ zhɛ a duma ụshɛrɛya hiŋ tedure nu undwa u tumama 'yaga.

¹³Ụshɛrɛya hieci shi inyɛmɛnyɛmɛ ụ bụtụ na zasa du inyɛmɛnyɛmɛ o. Ama inyɛmɛnyɛmɛ tihioko yo mbisogo ụshɛrɛya ishɛkɛ.[7]

¹⁴A-miaụŋ-mo-bino mi na amɛ Krast, yaa shɛ bụtụ be elele hiɛŋ ubwa 'yajɛ rishe-tɛtɛtana, ubwa kaa zasa ugondu o, asha imbe i shɛ ule ibɛɛ? Rishe-tɛtɛtana ru gana ata ri eri ro bicingo bu hŋ?

¹⁵Yaa shɛ yɛu-bino ike kwo kaa bụngwụfwụ bu ko bo rungo mohondo, baa zasa kaa iyimɛyɛ maa bu na ya iyi-heri iyi-heri.

¹⁶Nazhɛ bụtụ bu ko na ashashɛ hiŋ hiɛŋ aŋ, Zhaga ma na amɛ-olom, kede mpiala mɛ hiɛ shɛ ya o, shigogo ma, ama hi peni shi aŋ kaa iyi nɛ to tu'waba ta aba ukekeshi o, asha imbe i shɛ ule ibɛɛ?

¹⁷Gobwonu du, yaa shɛ rishe-tɛtɛtana ri becinji shi ugondu ni ikɛnyi ruba, asha ru 'wi.

¹⁸Ama nekeshi bụtụ bu ko zhɛ bɛ hiɛŋ, Ubwa 'yajɛ rishe-tɛtɛtana, N zhɛ Mɛ hiɛŋ bụ, N 'yajɛ tuba ugondu. Go mo mbisono rishe-tɛtɛtana ru bwa uzawa ugondu, maa Mo mbisono bu tuba ugondu na Ngaa njɛ tedure ne rishe ri mi tɛtɛtana.

¹⁹Yaa shɛ abu titɛtanɛ-rishe maa Agwatana namɛ oko, i zhɛmɛ tebiye. Okwo atumwa-ibiri du tɛtanɛ-rishe gana ata, ama a zhɛgɛda kaa gbɛgbɛgbɛ.

²⁰Oo gabụ alagwụ, ibu kwụlanɛ shɛ suu maa mepi maa rishe-tɛtɛtana ru na ri becinji ugondu rɛ shɛ shɛ buumwa kwukwuŋ?[8]

²¹Ga Abraham na shɛ bishi tu, shɛ tedure nu ugondu na baa njɛ na aka na ti bee shepi yɛu ibwɛ ga Azik boo to ụrụpɛ nu utukwu-ụrụpɛ suu, upo ee peni bu n-ndumwa-zhɛ?

²²Gabụ du bụ kwụbɛ maa rishe-tɛtɛtana ra banɛ caakwụ tedure nu ugondu, ugondu ata kaa ubwa wa ụrɛcɛnga rishe-tɛtɛtana.

²³Ibɛ po Iwɛ ya Agwatana nɛ hiɛŋ, Ga Abraham tɛtanɛ Agwatana rishe, ibɛ po Agwatana rɛcɛ rụ no ofwo ubwa maa tiririri raa shɛ, i sɛ, ibɛ po aa suyana bụ ya, maa Biyejilo ba Agwatana.

²⁴Hiɛ kwụbɛ maa ugondu na bụtụ ba nda wa pana bụ n-ndumwa-zhɛ, shɛ rishe-tɛtɛtana kiri o.

²⁵Gobwonu du ge Rehab buwɛle ata, shɛ ugondu ata baa njɛ la na aka na ti bee leshiji atumwa ata Joshua, bee duricinji aŋ nu uhwaŋna unya suu upo n-ndumwa mɛ zhɛmɛ bụ?

²⁶Gana na ta tu'waba tu na tu zasa ya ihwungwɛ tu 'wi, gobwonu du rishe-tɛtɛtana ru na ri becinji shi ugondu ru 'wi.