Read bassa JEMIS 3 Bible Online

JEMIS 3 - bassa bible

JEMIS 3

¹A-miaụŋ-mo-bino mi na amɛ Krast, kede i shɛ ufwugwo ụ'wụtụ hiŋ ụ shɛ embisegeni o, gana na te ehi mepi maa ụshɛrɛya tu atuba na tɛ shɛ embisegeni zhɛ wo gombo hwuŋ uhwuri una wa atwa vwɛ.

²Iwɛnɛ po hwɛɛ tu ta twa udukwutwa nu n-ndumwa ɛgbɛɛ. Ama yaa shɛ yaa 'yajɛ bụtụ be elele na twa sụ udukwutwa nu n-ndumwa, asha ubwa shɛ bụtụ na eri ba untangana tu'waba tu bwa maa tu nama shɛshɛshɛ hwɛɛ.

³Yaa shɛ oto zwono unu idɛkwɛ ashɛnjɛ iwɛ maa i hwụjɛ-unu tu, na ashɛnjɛ ata kaa ata nyingacanga du tukwugwu ta aba hwɛɛ.

⁴Gobwonu ihɛŋtu du, okwo inɛɛ nɛ gembenji nyakpa nyakpa, tu uvwugo ụ'wụtụ 'wụtụ wo sugo iŋ, ama uhalamụ ata u ticwɛŋ bana, ubwa wa nyingacanga iŋ maa i zhe no ofwo elele na kwụlanɛ biheŋteni bu ụhaŋtụ ata maa u zhe.

⁵Gobwonu du bụratụ namɛ cwɛŋ bana na tu'waba, ama ba busa kaa tubusa tụ'wụtụ 'wụtụ. Hioko ma, bubabazhɛ bu ulwa bu ko gba eri bo twono uwapa ụ'wụtụ 'wụtụ!

⁶Bụratụ shɛ gana bubabazhɛ bu ulwa, baa shɛ du unyizo ụwɛ na ashashɛ itwɛ tu'waba hwɛɛ, bo zwono tu'waba hwɛɛ tiri,[9] baa shanana iyi nɛ butugwumwa ba nda ulwa. Ama ulwa na zhɛ wa banɛ nu ukwokwo ulwa, ubwa tuba wa shaanana bụ ulwa.[10]

⁷Okwo isundɛ ehilo ye elele, ta shanụnụ, ti iyi nɛ yo hombilo, ti ijɛnɛ, butugwumwa ba biga iŋ, aa bigwa iŋ kaa.

⁸Ama za bụtụ eri ba biga[11] bụratụ o. Bɛ shɛ iyi iwɛ nɛ te shi ụhinjanụ kwukwuŋ, bɛ shɛ mangayɛ mu na ma kwụna bụtụ hwɛ hwɛɛ bwa.

⁹Na bụratụ kaa oto zhemonjino Agwangwama keeni Bishi, nu bwa kaa ata kalana du atwa na Agwatana njɛ nu ụsụbwa ubwa unu.

¹⁰Nu unu we ebe uko uko tizhemonjino keeni unu-tukalana wa banɛ. A-miaụŋ-mo-bino mi na amɛ Krast, ijɛ ga shɛ shɛ ya sha gana ga o.

¹¹Umɛzhinjɛ suu wɛ zhinjɛ meni mụ ụlatụ keeni mu na mụ ụgagwụ[12] nu u'ibwa ata uko uko?

¹²A-miaụŋ-mo-bino mi na amɛ Krast, uwowo suu eri wa 'wala tụ'walụ ta buta? Okwo ukparɛ ufwafwa suu eri wa 'wala tụ'walụ tu uwowo? Gobwonu du i zasa umɛzhinjɛ na eri wɛ bɛcinjɛ meni mu manɛ keeni mu naa na mɛ zhɛmɛ tuswa nu u'ibwa ata uko uko.

¹³Gaaba incɛ, na eshiciji iyi na ashashɛ hiiŋ? Asha ga masha mi biye ma bụtụ ata mu no mbisono ugondu ubwa ne timeme-zucinje ta ti'inta.

¹⁴Ama yaa shɛ ahiɛ 'yajɛ eshe-iyi ụgagwụ keeni tumomo-mungicingo na shɛmɛ shi hiŋ, asha ta busana ma iwɛ-tɛkana o, ta dwana ma kaa iwɛ-tɛkana ụzagwụ o.

¹⁵Ti'inta ta ata ti beni shi na azuba o, ama ma tu tu unyizo, na ma tu tu butugwumwa keeni ma tu tu atumwa-ibiri taa shɛ.

¹⁶Ofwo elele na eshe-iyi keeni tumomo-mungicingo tu namɛ, apata du tụgaratagwụ keeni iyi tusashɛ ye elele namɛ.

¹⁷Ama ti'inta tu na tu banɛ na azuba: hiiŋ tu namɛ rụmbɛɛ, nazhɛ taa shɛ iyi ya amɛ-olom, tɛ shɛ iyi tusuu, inyɛmɛnyɛmɛ keeni tụ'walụ ti biye ti shini na tuba. Tɛ shɛ uzawa beye bana, tɛ shɛ uzawa tɛnda-te-eshe.

¹⁸Ekeri amɛ-olom a na a bila iyi na amɛ-olom, ɛ zhɛ o gwubo hwuŋ tiririri.