Read bassa JEMIS 4 Bible Online

JEMIS 4 - bassa bible

JEMIS 4

¹Cee ujasa keeni ifelu tutwa mwe na ashashɛ hiŋ kwuuŋ? Shɛ ukwede yi hiŋ ụwɛ suu wa jasa ujasa ata ni itwɛ tu'waba ti hiŋ hwɛɛ?

²Hia jala iyi, hi zasa kaa o, hia kwụna atwa, ahia nda eshe-iyi, ama hi eri shi kaa hia lashɛga o; hia twa ifelu, ahia jasa ujasa, ama hi zasa waa kaa o, iwɛnɛ ta ahiɛ lụpɛ shɛ Agwatana.[13]

³Hia lụpa, hi leshiji shi o, iwɛnɛ ta ahi 'waŋjɛ tụlụpa iwɛ maa hiɛ njɛ iŋ ufwu nu ukwedeyi ata hiŋ ụwɛ.

⁴Ahiɛba anjɛ-tuwɛle, hi mepi shi suu maa tiyejilo tiya nu unyizo ga tɛ shɛ i'ime tuta Agwatana? Ibɛ po bụtụ be elele na yaa kwụlanɛ maa ba sha biyejilo bu unyizo ga, asha bu mama njɛ bụtụ-bi-i'ime ba Agwatana.

⁵Kwo kaa hi heŋshi suu maa iwɛ nɛ Utakada n-ndumwa ma Agwatana jɛmɛ i shɛ iwɛ tɛgadaga, aka na bɛɛ hiɛŋ, Mpiala mu na Agwatana njɛ maa mu nama na shɛmɛ shi tu, mu ma tu jala tebiye tebiye ni isɛbwɛngwɛ?[14]

⁶Ama Agwatana ma tu kaana tulubo-ti-biye tụpana. Iwɛbɛ po yee 'nyeci, yɛɛ hiɛŋ. Agwatana a sukakana anjɛ-unyanga, ama ba pana atwa na meme-zucinje tulubo-ti-biye.

⁷Iwɛ ecilo ata, meme tileneni ma Agwatana. Sukakana ma Ibiri, nazhɛ bɛɛ zhɛ mo hi gozhigono.

⁸Dongonu ma Agwatana, nazhɛ bɛɛ zhɛ mo hi dongonu. Oo ahiɛba atwa-iwɛwɛ, nyashɛnga ma i'ɛlɛ hiŋ shɛshɛshɛ! Oo ahiɛba atwa shihaŋsa shi yeyebe, nda ma shɛmɛ shi hiŋ rụmbɛɛ!

⁹'Yaga ma amɛ-tụhaŋtụ, ta ma ụkwụla, twa ma u'wo. Gɛ ilɛtu hiŋ jɛshɛrɛjɛ ụkwụla-tuta, ga unyasa hiŋ jɛshɛrɛjɛ usumbu-tuta.

¹⁰Meme-zucinje ma na agba Agwangwama, nazhɛ bɛɛ zhɛ mo hi gombicingo.

¹¹A-miaụŋ-mo-bino mi na amɛ Krast, ta na mama dumanganụ ma n-ndumwa mụ wɛ o. Bụtụ na ba dumangana yɛu-bino bwa n-ndumwa mụ wɛ, kwo kaa na ba duma ụshɛrɛya yɛu-bino bwa, asha Undwa baa dumangana n-ndumwa mụ wɛ, asha ba duma kaa ụshɛrɛya Undwa. Ama yaa shɛ aba duma ụshɛrɛya Undwa, asha bɛ shɛ shɛ bɛnjɛ-bu-Undw o, ama asha bɛjɛmɛ-bụ-ụshɛrɛya bu Undwa abɛ shɛ.

¹²Agwatana bwooko kiri i shɛ bipeni-bu-undwa keeni bɛjɛmɛ-bụ-ụshɛrɛya. Ubwa eri bo bicingo, ubwa kaa du eri ba kwụna. Ama gaaba kwuŋ abɛ shɛ upo aba duma ụshɛrɛya uyebi buu?

¹³Shɛlaga ma, ahiɛba na hi hiɛŋ, Ti zhɛ ta zha nụ ụshɛpwụ kazabana hwayɛ ga kwo kaa beyi, maa ta nama apata uywa uko, maa ta nda tihinya, maa te teni.

¹⁴Hi mepi shi kaa iyi nɛ me hi teni beyi o. Imbe kwuŋ uraiŋ hiŋ shɛɛ? Ụ shɛ gana uzhikwozhikwo na wa banɛ caakwụ, fwalaa wa inanga eshe.

¹⁵Iyi nɛ ahi ga shɛ hiɛ hiɛŋ na: maa, Yaa shɛ yaa kwụlanɛ Agwatana maa ta nama, nazhɛ ɛti zhɛ ta nda inɛ gɛ kwo kaa inee ye.

¹⁶Ama hia busa hwuwayɛ nu unyangana tɛnda. Tubusa tu gana ata kaa kpaaŋ tɛ shɛ iyi iwɛ.

¹⁷Ibɛ po bụtụ be elele na mepi iyi ibiye nɛ maa nda, ama baa njɛ shɛ iŋ, asha iwɛwɛ baa nda.