Read bassa JEMIS 5 Bible Online

JEMIS 5 - bassa bible

JEMIS 5

¹Ahiɛba azhɛgba, shɛlaga ma, na twa ma u'wo iwɛ amɛ-tụhaŋtụ na me hi teni.

²Uduciya hiŋ fwoshi, a'nyasụ kaa yɛ otogwo hiŋ.

³Azhɛnarɛya keeni azụrụfa hiŋ[15] teni tukwocikwolo, tukwocikwolo ta aba kaa tu ma hi la tiseyida tụ wɛ, ti zhɛ kaa ta ya tu'waba ti hiŋ gana ulwa. Hi suteni uduciya[16] na aka ga umɛwɛɛ.

⁴Hioko ma, atashɛ anjɛ-ugondu a na gwubi ntuma mi hiɛŋ, a na ahi intanɛ, ahiɛ yɛ, a hi uganana. N'ungwa ma atwa ata gwubi iyimɛyɛ hiŋ kaa mi teni acɛbɛ Agwangwama na Hwuri Kpaaŋ.

⁵Hi namɛ nu unyizo, ahia ya tuwebiye, ahia gala, hi nduwa maa shɛmɛ shi hiŋ shi nyemenji, gana maa hio nyomongo iwɛ ụjita na ɛɛ zhɛ ma hi kwụna.

⁶Hi pwonuo atwa tiririri n-ndumwa-tụwụma, ahi kwụnua aŋ; ama a hi sukakanɛ shɛ kaa o.[17]

⁷A-miaụŋ-mo-bino mi na amɛ Krast, iwɛ ecilo ata, ima ma isɛbwɛ uuwa i ci tugwure ta Agwangwama. Shɛlaga ma, bufwashɛ ba nda ashɛlatụ iwɛ tụ'walụ tu unyizo to ogwumishi, baa ima kaa isɛbwɛ tuba uuwa i ci aka na eshilo ugbama keeni eshilo ɛhɛnɛnɛyɛ ngbeni tu.

⁸Ahiɛba ima ma du isɛbwɛ; shikicingo ma shihaŋsa shi hiŋ dimi, iwɛnɛ te tugwure ta Agwangwama tu gwumwonu.

⁹A-miaụŋ-mo-bino mi na amɛ Krast, to no ngwulongongono ma anya hiŋ o, iwɛ maa kede Agwatana ihi peni hwuŋ n-ndumwa-tụwụma o. Hioko ma, bɛjɛmɛ-bụ-ụshɛrɛya shikonowoŋ no odubo.

¹⁰A-miaụŋ-mo-bino mi na amɛ Krast, sugo ma egesere na jɛmɛ la iwɛ ni izeci ya Agwangwama gana ụsụbwa ụbaụta keeni isɛbwɛ-ti'ima.

¹¹Hioko ma, tɛ jɛmɛ maa atwa na 'imɛ-isɛbwɛ gwoje. Hi hwugwa kaa unabarɛ isɛbwɛ-ti'ima Job, ahiɛ kwụbɛ kaa gana na ta Agwangwama njɛ bụ nu ukwunanga ibɛ, maa Agwangwama mepi-iwɛ, baa 'yajɛ kaa inyɛmɛnyɛmɛ duwa duwa.

¹²Ama a-miaụŋ-mo-bino mi, inɛɛ nɛ hwuri inɛ vwɛ kpaaŋ na, ta ta ma tuwa o, ta ta ma azuba o, ta ta ma unyizo, ta ta ma tuwa ti nya te elele o. Ama ge Iiŋ hiŋ, na sha Iiŋ, ga Awo hiŋ na sha Awo, iwɛ maa kede e hi peni n-ndumwa-tụwụma o.

¹³I 'yajɛ suu bụtụ be elele ba nda ụbaụta na ashashɛ hiŋ? Ga nda adua. I 'yajɛ suu bụtụ be elele na amɛ ubwa lemi? Ga bu na zunga azunga ashɛtwa.

¹⁴I 'yajɛ suu bụtụ be elele na u'waba hwuwi shi na ashashɛ hiŋ? Ga suyana n-nyarɛ mụ tụ'ụlwa-tụ-ụhiɛŋshɛ-Agwangwama, maa mu ndanɛ bụ adua, ge dudugeni bu manɛbɛ ni izeci ya Agwangwama.

¹⁵Adua rishe-tɛtɛtana zhɛ a nɛnga bụtụ ata ba gwụma. Agwangwama kaa zhɛ ɛ ishicinjɛ bụ, yaa shɛ baa njɛ iwɛwɛ, bi zhɛ ba gangana bụ.

¹⁶No lono ma unu iwɛwɛ nɛ ahi mama ndanụ na anya hiŋ, na nda ma adua iwɛ anya hiŋ, iwɛ maa a hiɛ nɛnjɛ. Tutabwa ta bụtụ bi tiririri ta nda ugondu na 'yajɛ ikɛnyi tebiye.

¹⁷Ge Elaija na 'yajɛ la ukwedeyi gana tu du, bɛ njɛ la adua tebiye, maa kede eshilo ngbi o, eshilo ngbi shi ga nu unyizo shiywa shɛ tatụ ni ipiɛnɛ icihiŋ.

¹⁸Ubwa njɛ adua sasana, nazhɛ eshilo ngbi, nazhɛ unyizo 'weri tụ'walụ tu bwa.

¹⁹A-miaụŋ-mo-bino mi na amɛ Krast, yaa shɛ bụtụ be elele 'inɛ bee genji iwɛ-tɛkana, yaa shɛ bụtụ be elele gwuricinje bu,

²⁰asha mapa ma maa bụtụ be elele na gwuricinje bụtụ bi iwɛwɛ maa gɛnjɛ uhwaŋna ubwa u ti'ina, bụtụ ata zhɛ bo bicingo ohwulu bụtụ no tu'wo, ɛɛ zhɛ kaa a gangana bụ iwɛwɛ nɛ gembi ufwugwo.