Read bassa 1 PITA HIIŊ 4 Bible Online

1 PITA HIIŊ 4 - bassa bible

1 PITA HIIŊ 4

¹Ibɛ po gana na ga Krast hieci ụbaụta[15] na tu'waba, ahiɛba du mama-'imɛ ma maa hi 'yaga ahaŋsa ata oko oko. Bụtụ be elele na hieci ụbaụta na tu'waba, asha bi genji iwɛwɛ.

²Iwɛ ecilo ata, te kwuni na aka ga, kede hi nama ya iwɛ ukwedeyi wa atwa na aka ga ihi vwanɛ na tu'waba o, semi ga shɛ iwɛ ukwulana wa Agwatana kiri.

³Iwɛ ecilo ata, ga uraiŋ ụngwụshɛ na atu nduwa la ukwulana wa atwa na tɛtanɛ shɛ Agwatana rishe, utu gwumwa ya. Ibɛ shɛ aka na atɛ njɛ la iyi na masha mụ wɛ, nu ukwedeyi ụwɛ, ni iyi tuswa nɛ 'yajɛ ikɛnyi tuswagana, na ti'nyama, na mayaga tuswagana no tusotulonu yororo, keeni tuwa tɛnda tu na tɛ shɛ iyi-tupwaŋ.

⁴Aka na te ehi togwu su ya na aba ni iyi gɛnɛ ɛtɛ tɛnda, tedure no tuhwulogo ta masha mụ wɛ gana ata tɛnda, yaa dama aŋ, a na hi dumangana ya n-ndumwa mụ wɛ.

⁵Ɛ zhɛ e sweji hwuŋ unu na agba Agwatana na mama-'imɛ maa duma ụshɛrɛya wa atwa na ta hwungwa ta atwa na uwo.

⁶Iwɛ ecilo ata du ee enengeni atwa na uwo la Anabarɛ Ebiye, iwɛ maa a jɛmɛ ụshɛrɛya wa aba na tu'waba gana atwa vwɛ, ama iwɛ maa tuba a 'yaga uraiŋ tedure na Agwatana.

⁷Ama ukwunanga iyi elele gwumwonu ya; iwɛ ecilo ata, ga shihaŋsa shi hiŋ shɛ nama hwungbɛ, no shiyono ma eshe iwɛ shidua tɛnda.

⁸Ama inɛɛ nɛ hwuri inɛ vwɛ hwɛɛ na: no momo lubonu ma no tulubo tu tugom na ashashɛ hiŋ, iwɛnɛ to tulubo to urugono iwɛwɛ ifwugwo.

⁹No momo mbiyongonu ma uzawa tungwulongongo.

¹⁰Gana na ta bụtụ bụtụ leshiji upwaŋ Mpiala mu tulubo-ti-biye gɛnɛgɛnɛ no olugwo Agwatana, na shapa ma inɛ ɛtɛ hi na mama ndanụ iyi, iwɛnɛ ta ahiɛ shɛ ehiu-ihwɛ u tulubo-ti-biye ta Agwatana.

¹¹Yaa shɛ bụtụ be elele ba duma iwɛ, ga shɛ maa n-ndumwa ma Agwatana baa duma, yaa shɛ kaa bụtụ be elele ba nda iyi, ga shɛ maa ba nda iŋ tedure nu ukpahiŋ na Agwatana peni bu; iwɛ maa e peni Agwatana ụjɛrụma ni iyi elele tedure ne Jisus Krast. Ga ụjɛrụma keeni ukpahiŋ ụ shɛ una ubwa tutu unyizo-nom. Ami!

¹²Ahiɛba atwa tulubo, kede ihi dama iwɛnɛ ta tumakana tu na tɛ shɛ gana ulwa tu ma hi makana na ashashɛ hiŋ o, gana maa iyi tudama ihi vwuteni o.

¹³Ama gana na ta ahia twa-ikpɛngwu nụ ụbaụta Krast, na nda ma unyasa, iwɛ maa aka na ɛɛ zhɛ a kapɛshɛnga hwuŋ ụjɛrụma ubwa, maa hi bweji unyasa.

¹⁴Yaa shɛ ee hi mbiseji n-ndumwa iwɛ Krast, asha hi gwoje, iwɛnɛ tu Mpiala mụ ụjɛrụma, na mu na mu ukpahiŋ,[16] mu na mɛ shɛ mu na ma Agwatana mu patanɛ no ohiuhiu hiŋ.

¹⁵Ibɛ po kede bụtụ be elele na ashashɛ hiŋ no hioko ụbaụta, iwɛ bụtụ tụkwụna, kwo kaa iwɛ izunde, kwo kaa iwɛ iyi iwɛ tɛnda, kwo kaa iwɛ iyi ya anya atwa tungbaraka maa ganga inɛ ibwɛ o.

¹⁶Ama yaa shɛ bụtụ be elele ba nda ụbaụta iwɛnɛ tu baa shɛ bụtụ Krast, asha kede bu na nda ezuye o, ama ga pana Agwatana ụjɛrụma tedure ni izeci ɛtɛ.

¹⁷Iwɛnɛ ta aka ci ya maa ụshɛrɛya kwuni na atwa ihwɛ ya Agwatana. Yaa shɛ kaa wee kwuni no tu, asha imbe tuba zhɛ ya sha ukwunanga wa atwa na lacɛ unu wa Anabarɛ Ebiye Agwatana tuhwugaa?

¹⁸Yaa shɛ kaa tibicingo ta bụtụ bi tiririri tụ gwụmɛ, asha gana naa tuba atwa na lacɛ Agwatana keeni atwa iwɛwɛ zhɛ a ndaa?

¹⁹Iwɛ ecilo ata, ga atwa na o hioko ụbaụta te teni cɛŋ nu ukwulana wa Agwatana, no zwono shihwulu sha aba ni i'ɛlɛ bikeri ata bɛ tɛcara.