Read bassa 2 PITA YEBI 1 Bible Online

2 PITA YEBI 1 - bassa bible

2 PITA YEBI 1

¹Ga Saimon[1] Pita, na shɛ yɛu-ugondu keeni butumwa Jisus Krast, no ofwo atwa na leshiji rishe-tɛtɛtana ro ogwumishi ru na rɛ shɛ ru ko ru ko no mo ru tu, tedure ne tiririri ta Agwatana tu, keeni Bibicinji tu na shɛ ge Jisus Krast.

²Go tulubo-ti-biye keeni amɛ-olom na hi kaanana ugombo tedure na Agwatana keeni Jisus Agwangwama tu tumapa.

³Ukpahiŋ na shɛ ukpahiŋ wa Agwatana, utu pwonuo iyi elele nɛ i shɛ inɛ uraiŋ keeni inɛ eshe-tupatana Agwatana, tedure tumapa tu na eti mepi bụtụ ata na utu suyanɛ tedure[2] nu ụjɛrụma ubwa keeni izeci ɛtɛ ibwɛ i pilanụ.

⁴Tedure ni inɛ ɛtɛ bee ti shileni-unu wo ogwumishi tebiye, na shɛ unu-tishilo ụ'wụtụ, iwɛ maa hi na lashɛga urobwo iyi nɛ i shɛ gana na ta Agwatana namɛ, tedure ni inɛ ɛtɛ, ibɛ po ehi benengeni tufwoso tu na tu namɛ nu unyizo ga, tu na tu dure ukwedeyi ụwɛ.

⁵Iwɛ ecilo ga gbaa, na kaana ma rishe ri hiŋ tɛtɛtana ni izeci ɛtɛ ibiye, medenji izeci ɛtɛ ibiye, na kaana ma iyi-tumapa tedure ne egiri hiŋ tula,

⁶Na kaana ma tumama-ima, ni iyi-tumapa, na kaana ma tumama-ima ni isɛbwɛ-ti'ima, na kaana ma eshe-tupana Agwatana ni isɛbwɛ-ti'ima,

⁷na kaana ma miaụŋ-mo-bino tulubo ne eshe-tupatana Agwatana, na kaana ma tulubo tedure na miaụŋ-mo-bino tulubo.

⁸Iwɛnɛ po aka na ti ijɛ namɛ na shɛmɛ shi hiŋ yaa kaana ugombo, i zha shɛ mo hi lonono maa hiɛ shɛ aruna o, kwo kaa maa hiɛ vwụnjɛ tụ'walụ o, tedure tumapa tu tugom tu na eti mepi Agwangwama tu Jisus Krast.

⁹Bụtụ be elele na zasa ijɛ, bɛ shɛ olubo, iyi nɛ gwumwongonu nu bwa kiri bee eri ba kwụba, bi eri shi ba kwụba iyi nɛ dụlụmɛ o. Isɛbwɛ tinyashɛnga tu na aa nyaashɛnjɛ iwɛwɛ ibwɛ ingwụshɛ upo baa namɛ ya shɛshɛshɛ, i 'wi bu.

¹⁰Iwɛbɛ po a-miaụŋ-mo-bino mi na amɛ Krast, nda ma gana na ehi eri maa hi shikicinji ụhiɛŋshɛ ata Agwatana ihi suyanɛ keeni tutala ta ata bee hi teri dimi. Yaa shɛ ahia nda iŋ, hi zha shɛ hia laya[3] kwukwuŋ.

¹¹Nu uhwaŋna ga, nazhɛ Agwangwama tu, na shɛ Bibicinji tu ge Jisus Krast zhɛ ma hi pana ohwolu tugom maa hi teni Cɛnjɛ-ta-tugwama tu bwa tu unyizo-nom.

¹²Iwɛbɛ po yaa n tatụlanụ maa Mi ne hi teyingeni ijɛ ɛgbɛɛ, okwo te ehi mepi iŋ, ivwunɛ hiŋ kaa 'imɛ cɛnjɛ dimi ni iwɛ-tɛkana na ahiɛ 'yajɛ cebe.

¹³Ama N heŋshi maa i teni cɛŋ maa Mɛ hi zhingicinjɛ tedure ne titeyingeni, tu Ngaa ta namɛ nu udulo u tu'waba[4] tu ga.

¹⁴Gana na ti Ngee mepi maa aka na maa Ma data udulo ga mu gwumwongonu ya, gana na ta Agwangwama tu Jisus Krast m mbiseni la.

¹⁵Ama Ma nda gana na ti Ngee eri maa hi 'yaga ohwolu maa hi ne teyinje ijɛ aka elele okwo na aba na tu Ngaa zasaba hwuŋ ya.

¹⁶Iwɛnɛ po shɛ ashwa na atwa a duma na tuhalakaka, atu 'wa, na aka na atɛ njɛ maa hi mepi ukpahiŋ keeni tizhajɛ ta Agwangwama tu Jisus Krast o, ama atuba ga tụ kwụbɛ igɛhi ɛtɛ ibwɛ i'wɛtwɛ ne eshe tu na.

¹⁷Iwɛnɛ po ubwa leshiji tumuna keeni ụjɛrụma ata banɛ no olugwo Agwatana na shɛ Bishi, na aka na tu ụjɛrụma ata ụ'wụtụ 'wụtụ shapɛrɛganɛ bụ rụhwụŋ ra ata ri hiɛŋ bụ, Yɛu mi Ngee lubi duwa na,[5] amɛ mi kaa lemi nu bwa tebiye.

¹⁸Atuba ni ikɛnyi tu tụ hwụjɛ rụhwụŋ ra ata aka na atu patanɛ ni ishɛmɛ ɛtɛ tijilo nu bwa.

¹⁹Iwɛbɛ po iwɛ nɛ egesere jɛmɛ iti keeni tunamana dimi. Yaa shɛ ehio shiyono shihaŋsa shi hiŋ ni ijɛ, asha hia nda tebiye, gana na ta ahia nda nụ ụsụtụla ata wa ta no ofwo tishi, uuwa i ci ụjita ata iyi ye suje, tu unagbajɛ ata wa ta na shɛmɛ shi hiŋ.

²⁰Hiiŋ, hiɛ shɛ hia mapa maa i zasa tigesere te elele tu na ti 'nyeci ni Iwɛ ya Agwatana, tu na ta ndaanana tilesheji ti ikɛnyi tuba o.

²¹I zasa tigesere te elele tu na kaa du aa jɛmɛ nu ukwulana u butugwumwa kwukwuŋ, ama gana na tu Mpiala mi Tijilo[6] mi zeriji aŋ, ibɛ po atwa tijilo Agwatana[7] jɛmɛ iwɛ nɛ banɛ nu unu wa Agwatana.