Read bassa 1 JON HIIŊ 1 Bible Online

1 JON HIIŊ 1 - bassa bible

1 JON HIIŊ 1

¹Iyi nɛ namba taa nu umozhigo, ni iyi nɛ atụ hwụjɛ, ni iyi nɛ atụ kwụbɛ ne eshe tu, ni iyi nɛ eti shiyeni eshe tu ni ibɛ, ni iyi nɛ kaa eti timengeni ni i'ɛlɛ tu, ibɛ i shɛ iwɛ n-ndumwa mu uraiŋ.

²Uraiŋ ata kaa banɛ caakwụ, atụ kwụbɛ uŋ, ata la uŋ du tiseyida, eti hi swegeni kaa iwɛ uraiŋ ata unyizo-nom, na namɛ no ofwo Bishi, na banɛ caakwụ.

³Iyi nɛ atụ kwụbɛ, keeni iyi nɛ atụ hwụjɛ, eti hi swegeni du, iwɛ maa hi twa du ikpɛngwu no tu. Iwɛ-tɛkana ikpɛngwu ɛtɛ tutwa i shɛ ne Bishi, ni Yɛu ibwɛ ge Jisus Krast du.

⁴Iwɛ ibɛ ati hi 'nyatanɛ, iwɛ maa unyasa tu[1] ulwa.

⁵Utumwa na banɛ no olugwo Jisus, na atụ hwụjɛ, ata hi anangana na, maa Agwatana shɛ uhioko-uhwaŋna, tishi tu zasaba na amɛ ubwa kwukwuŋ.

⁶Yaa shɛ ɛti hiɛŋ, maa ta twa-ikpɛngwu nu bwa, ata nda kaa iyi ne tishi, asha ụzagwụ ata dwa, asha shɛ iwɛ-tɛkana ata duma o.

⁷Ama yaa shɛ ata nda iyi nu uhioko-uhwaŋna, gana na tu baa namɛ nu uhioko-uhwaŋna, asha ta twa-ikpɛngwu atuba tuba, mehieŋ mi Jisus Krast Yɛu ibwɛ ma nyashɛnga kaa iwɛwɛ tu ye elele[2] maa ta nama shɛshɛshɛ.

⁸Yaa shɛ kaa ɛti hiɛŋ tu zasa iwɛwɛ o, asha tu mama halakaka, asha iwɛ-tɛkana zasaba na amɛ tu o.

⁹Yaa shɛ etu sweji-unu iwɛwɛ tu pa Agwatana, asha ubwa shɛ bụtụ bɛ tɛcara, na bụtụ bi tiririri, iwɛ maa ma tu gangana iwɛwɛ tu, maa nyashɛnga kaa iyi iwɛ tu kpaaŋ shɛshɛshɛ.

¹⁰Yaa shɛ ɛti hiɛŋ tɛ njɛ shɛ iwɛwɛ o, asha ta nda bu bijwe bụ ụzagwụ; asha iwɛ ubwa du zasaba na shɛmɛ shi tu o.[3]