Read bassa 1 JON HIIŊ 2 Bible Online

1 JON HIIŊ 2 - bassa bible

1 JON HIIŊ 2

¹A-miaụŋ mi mi, N hi 'nyatanɛ ijɛ, iwɛ maa kede hi na nda iwɛwɛ o. Ama yaa shɛ bụtụ be elele njɛ iwɛwɛ, ti 'yajɛ bụsụmɛ-bu-uno na namba na agba Bishi. Ubwa shɛ ge Jisus Krast na shɛ bụtụ bi tiririri.

²Ubwa shɛ bilemicinji-ba-amɛ iwɛ iwɛwɛ tu;[4] ama shɛ iwɛ inee tu kiri o, ama iwɛ inɛ ya atwa unyizo hwɛɛ du.

³Yaa shɛ ata untangana unu wa Agwatana tụpana, nazhɛ ɛti zhɛ ta mapa maa ti mepi bu.

⁴Bụtụ na hiɛŋ, M mepi Agwatana, baa untanganɛ shɛ kaa unu ubwa tụpana, asha bɛ shɛ bijwe-bu-ụzagwụ, asha iwɛ-tɛkana zasaba na amɛ ubwa o.

⁵Ama bụtụ be elele na untanganɛ n-ndumwa ma Agwatana, asha tulubo ta Agwatana tu ulwa gom na amɛ bụtụ ata.[5] Tedure ni inɛ gɛ eti mepi maa tu namɛ na amɛ Agwatana.

⁶Bụtụ na hiɛŋ maa bu namɛ na amɛ Agwatana, asha bɛ shɛ ba nama gana na ti ge Jisus namɛ la.

⁷Atwa mi tulubo, shɛ unu ufwo tụpana Ama hi 'nyatanɛ o, ama una ala ụngwụshɛ, na ahiɛ 'yajɛ taa nu umozhigo. Unu ata ụngwụshɛ tụpana ubwa shɛ iwɛ ɛtɛ ahi hwugwa la.

⁸Unu ufwo tụpana Ama hi 'nyatanɛ sasana, ubwa shɛ una tɛkana na amɛ Jisus, ta shɛmɛ shi hiŋ du, iwɛnɛ te tishi ta kashɛka, uhioko-uhwaŋna tɛkana wa ta cebe.

⁹Bụtụ na hiɛŋ maa bu namɛ nu uhioko-uhwaŋna, boo imo kaa yɛu-bino bwa, asha bu ta namɛ ne tishi taa hwayɛ.

¹⁰Bụtụ na bo lubo yɛu-bino[6] bwa, asha ubwa namɛ nu uhioko-uhwaŋna, iyi nɛ ya kalagaga bụtụ zasaba na amɛ ubwa o.[7]

¹¹Ama bụtụ na bo imo yɛu-bino bwa, asha bu namɛ ne tishi, ne tishi kaa du baa zha tahaŋnụ, bi mepi shi ofwo na bɛɛ zhɛ o, iwɛnɛ te tishi tu lubicinji bu.

¹²Ma hi 'nyatanɛ ahiɛba miaụŋ mi mi, iwɛnɛ oo hi gongwonuo iwɛwɛ hiŋ, iwɛ izeci Jisus.

¹³Ma hi 'nyatanɛ ahiɛba eshi, iwɛnɛ te ehi mepi bụtụ ata namba taa nu umozhigo. Ma hi 'nyatanɛ ahiɛba esemberi, iwɛnɛ ta ahi lasụ bụtụ ata bụ wɛ. Ma hi 'nyatanɛ ahiɛba esemberi timesemese, iwɛnɛ te ehi mepi Bishi.

¹⁴N hi 'nyotwonuo ahiɛba miauụŋ mi mi, iwɛnɛ te ehi mepi Bishi. N hi 'nyotwonuo ahiɛba eshi, iwɛnɛ te ehi mepi bụtụ ata namba taa nu umozhigo. N hi 'nyotwonuo ahiɛba esemberi, iwɛnɛ ta ahiɛ 'yajɛ ikɛnyi, n-ndumwa ma Agwatana kaa mu namɛ na shɛmɛ shi hiŋ, ahi lasụ kaa bụtụ ata bụ wɛ.

¹⁵To lubo ma unyizo ga o, kwo kaa iyi nɛ namɛ nu unyizo ga o. Yaa shɛ bụtụ be elele bo lubo unyizo ga, asha bi eri shi bo lubo Bishi o.

¹⁶Iyi elele nɛ namɛ nu unyizo ga, tu ukwedeyi ụwɛ masha ma bụtụ bi iwɛwɛ, tu ukwedeyi ụwɛ we eshe, tu unyangana uraiŋ ga, shɛ no olugwo Bishi waa banɛ o, ama nu unyizo ga waa banɛ.

¹⁷Unyizo ga kaa wa kashɛka, tu ukwedeyi ubwa ụwɛ, ama bụtụ na ba nda ukwulana wa Agwatana, ubwa zhɛ ba nama unyizo-nom.

¹⁸A-miaụŋ, aka umɛwɛɛ na, gana na ta ahiɛ hwụjɛ maa Busukakanɛ bu Krast be ci ba, okwo hwuwayɛ asukakanɛ Krast a na ishɛgwa gembi ofwugwo. Tedure ni inɛ ɛtɛ eti mepi maa aka umɛwɛɛ na.

¹⁹E beni no olugwo tu, ama a shɛ shɛ atwa tu o. Yaa shɛ aa ga shɛ atwa tu, ɛ gɛ zhɛ a vwa no tu. Ama e beni maa i banɛ caakwụ maa a shɛ shɛ atwa tu o.

²⁰Ama Bụtụ ata bi Tijilo[8] bi hi dudugwonuo[9] kaa Mpiala mi Tijilo, iwɛbɛ po ehi mepi iwɛ-tɛkana ata kpaaŋ[10] hiŋ.

²¹N hi 'nyeteni shi iwɛnɛ te ehi mepi shi iwɛ-tɛkana ata o, semi iwɛnɛ te ehi mepi iŋ tebiye, iwɛnɛ kaa shɛ shɛ ụzagwụ banɛ no olugwo iwɛ-tɛkana ata. Iwɛnɛ tu ụzagwụ we elele zasaba kaa ni iwɛ-tɛkana.

²²Gaaba shɛ bijwe-bụ-ụzagwụụ? Ubwa shɛ bụtụ ata ba tala ashamanjɛ maa shɛ ge Jisus i shɛ ga Krast ata o. Bụtụ ata ubwa shɛ busukakanɛ bu Krast. Bụtụ be elele na ba tala ashamanjɛ Bishi, keeni Yɛu, asha busukakanɛ ga bu Krast ta.

²³Bụtụ be elele na ba tala ashamanjɛ Yɛu, asha ba tala du ashamanjɛ Bishi ata. Ama bụtụ na ba la yɛu ɛtɛ tiseyida, asha ubwa 'yajɛ du te Bishi.

²⁴Ibɛ po, gɛ iyi nɛ ahiɛ hwụjɛ taa nu umozhigo nama na shɛmɛ shi hiŋ. Yaa shɛ kaa iyi nɛ ahiɛ hwụjɛ taa nu umozhigo namɛ na shɛmɛ shi hiŋ, asha hi zhɛ du hia nama na amɛ Yɛu keeni amɛ Bishi.

²⁵Unu ata ga Krast[11] iti shileni[12] na, ibɛ shɛ iwɛ uraiŋ ata unyizo-nom.

²⁶N hi 'nyatanɛ ijɛ iwɛ atwa na ma hi inzhɛnga.

²⁷Ama inee hiŋ shɛ, Mpiala ma ata ga Krast ihi dudugwonuo[13] mu namɛ na shɛmɛ shi hiŋ, ibɛ po ukekeshi ihi te shi ya maa bụtụ be elele ihi mbisegeni iyi o, ama Mpiala ma ta ga Krast ihi dudugeni mu mo hi mbisogono iyi elele. Tududugono tɛ tɛkana kaa taa shɛ, shɛ ụzagwụ taa shɛ o. Gana na tududugono ta ata ti ihi mbisegeni iyi, nama ma na amɛ ubwa du gana ata.

²⁸Ama hwuwayɛ, a-miaụŋ mi mi, nama ma na amɛ Krast, iwɛ maa aka na ti bɛɛ zhɛ momo mbisono hwuŋ caakwụ, maa ta 'yaga eshe-hwoo, maa kede ezuye tɛ shɛ na agba ubwa, na aka tugwure tu bwa o.

²⁹Yaa shɛ ehi mepi na shɛmɛ shi hiŋ maa ga Krast ubwa shɛ bụtụ bi tiririri, asha hi mepi maa bụtụ be elele na ba nda iyi tiririri, asha ubwa shɛ yɛu ya Agwatana.