Read bassa 1 JON HIIŊ 3 Bible Online

1 JON HIIŊ 3 - bassa bible

1 JON HIIŊ 3

¹Hioko ma ugombo tulubo tu na Bishi utu lubi, maa a tu suyanɛ maa miaụŋ ma Agwatana! Gana ata ga kaa atɛ shɛ! Iwɛ inɛ ɛtɛ ibɛ po unyizo iti mepi shi, iwɛnɛ tu wee mepi shi bu.[14]

²Atwa mi tulubo, tɛ shɛ ya miaụŋ ma Agwatana hwuwayɛ, ama e te ti mbiseni shi kaa iyi nɛ ɛti zhɛ ta sha hwuŋ. Ti mepi tebiye maa aka na ga Krast meme mbiseni hwuŋ caakwụ,[15] ti zhɛ ta sụba bụ, iwɛnɛ ɛti zhɛ ta kwụba bụ gana na tu baa shɛ.

³Bụtụ be elele na ba nda ashɛlatụ Krast gana ga, bi zhɛ mama nda rụmbɛɛ gana na tu ga Krast namɛ du rụmbɛɛ.[16]

⁴Bụtụ be elele na ba nda iwɛwɛ, asha ba bwada-undwa du, iwɛnɛ ti iwɛwɛ tɛnda i shɛ undwa tubwada.

⁵Hi mepi gom maa ga Krast meme mbiseni caakwụ maa sugo iwɛwɛ tu,[17] iwɛwɛ kaa zasaba na amɛ ubwa o.

⁶Bụtụ be elele na ba nama na amɛ Krast, bi zha shɛ ba nda iwɛwɛ o, ama bụtụ be elele na ba nda iwɛwɛ, asha bu ta kwụbɛ shɛ bụ o, asha bi te mepi shi bu du o.

⁷A-miaụŋ mi mi, kede bụtụ be elele ihi inzhɛnjɛ o; bụtụ na ba nda iyi tiririri, asha ubwa shɛ bụtụ bi tiririri, gana na tu ga Krast shɛ bụtụ bi tiririri.

⁸Bụtụ be elele na kaa ba nda iwɛwɛ, asha bu na bi Ibiri ta; iwɛnɛ ti Ibiri ya nda iwɛwɛ taa nu umozhigo. Iwɛ ecilo ata kaa ee mbiseni Yɛu ya Agwatana caakwụ, iwɛ maa u hwuŋzo ugondu Ibiri.

⁹Bụtụ be elele na Agwatana meci, njɛ shɛ iwɛwɛ o, iwɛnɛ ta masha ma Agwatana[18] mu namɛ na amɛ ubwa, bi eri shi ba nda iwɛwɛ o, iwɛnɛ ti yaa shɛ Agwatana meci bu.[19]

¹⁰Tedure ni inɛ gɛ, ibɛ miaụŋ ma Agwatana mi beni swooŋ na miaụŋ mi Ibiri. Bụtụ be elele na njɛ shɛ iyi tiririri, asha bi beni shi no olugwo Agwatana o, asha bu lubi shi du kaa yɛu-bino bwa o.

¹¹Inɛ gɛ ibɛ i shɛ utumwa ata ahiɛ hwụjɛ taa nu umozhigo, maa tɛ shɛ tu no momo lubonu.

¹²Kede tɛ shɛ ma gana Ken na banɛ no olugwo bụtụ ata bụ wɛ na kwụnɛ buhongwu bwa o. Iwembe po baa kwụnɛ bụụ? Iwɛnɛ tu ugondu ubwa ụ shɛ ugondu ụwɛ, una buhongwu bwa ụ shɛ una tiririri.

¹³A-miaụŋ-mo-bino mi na amɛ Krast, yaa shɛ unyizo mo hi imo, kede ihi dama o.

¹⁴Ti mepi gom maa ti keshici tu'wo eti teni nu uraiŋ, iwɛnɛ oto lubo miaụŋ-mo-bino. Bụtụ na lubi shi, asha na amɛ tu'wo baa ta namɛ.

¹⁵Bụtụ be elele na bo imo yɛu-bino bwa, asha bụkwụnɛ baa shɛ. Hi mepi kaa gom maa bụkwụnɛ zha shɛ ba 'yaga uraiŋ unyizo-nom kwukwuŋ.

¹⁶Tedure ni inɛ gɛ eti mepi iyi nɛ i shɛ tulubo, iwɛnɛ ti ge Jisus shiri uraiŋ ubwa iwɛ tu, tɛ shɛ to shilo du uraiŋ tu iwɛ miaụŋ-mo-bino tu.

¹⁷Ama bụtụ be elele na 'yajɛ iyi unyizo ga, baa kwụba kaa tu ukekeshi wa nda yɛu-bino bwa, bee hieci shi inyɛmɛnyɛmɛ ibwɛ, asha gana naa bụtụ ata eri bɛ hiɛŋ maa ubwa bo lubo Agwatanaa?

¹⁸A-miaụŋ mi mi, kede tu no mo lubo ma nu n-ndumwa kwo kaa nu unu wo ohondo, semi ga shɛ na tɛnda keeni iwɛ-tɛkana.

¹⁹Tedure ni inɛ gɛ eti mepi maa tɛ shɛ atwa tɛkana. Ibɛ po shihwulu shi tu shi zhɛ sha nama hwuŋ kpeke na agba Agwatana.

²⁰Yaa shɛ shɛmɛ shi tu shɛ ma tu pana n-ndumwa-tụwụma, ti mepi maa Agwatana hwuri shɛmɛ shi tu, bee mepi kaa iyi elele.

²¹Ahiɛba atwa tulubo, yaa shɛ shɛmɛ shi tu shi ti peni shi n-ndumwa-tụwụma, asha ti 'yajɛ eshe-hwoo no ofwo Agwatana.

²²Iyi elele nɛ kaa atụ lụpɛ bụ, bi zhɛ ma tu pana, iwɛnɛ atu untanganɛ unu ubwa tụpana, ata nda kaa iyi nɛ ya kwulana bu.

²³Unu ata ubwa tụpana na, maa ta tɛtana izeci Yɛu ibwɛ ge Jisus Krast rishe, maa tu momo lubonu ma, gana na tu ga Krast iti peni-unu.

²⁴Bụtụ na ba untangana unu ubwa tụpana, asha ubwa ba nama na amɛ Agwatana, Agwatana namɛ du kaa na amɛ bụtụ ata. Na amɛ inɛ gɛ ibɛ eti mepi maa Agwatana namɛ na amɛ tu tedure na Mpiala mu na bee ti peni.