Read bassa AJƐMƐ-ỤSHƐRƐYA 11 Bible Online

AJƐMƐ-ỤSHƐRƐYA 11 - bassa bible

AJƐMƐ-ỤSHƐRƐYA 11

¹Gɛ Jɛfta banɛ ni Giliad, bi 'yajɛ ukpahiŋ nu ujasa tebiye. Ama bɛ shɛ tuba yɛu nɛ buwɛle metenji Giliad bishi bwa.

²Biyikwo Giliad bu tugom du metenji bu miaụŋ-me-eyi mi nya. Aka na ta miaụŋ mo biyikwo bwa bu tugom mu waŋnɛ, mee becinji Jɛfta ni ihwɛ. Ɛɛ hiɛŋ bụ, Bu zha shɛ ba ya hwuŋ ogwu elele ni ihwɛ bishi tu o, iwɛnɛ abɛ shɛ yɛu nɛ biyikwo bi nya meci.

³Iwɛbɛ po gɛ Jɛfta gezhigeni miaụŋ me bishi bwa, bee zhe baa jɛjɛ na cɛnjɛ tu Tob. Ibɛ po atwa oko tusashɛ zhajɛ oo rungwutwonu bu, aa zha tɛshɛrɛ tɛnda nu bwa.

⁴Na aba na ti inɛ ɛtɛ keshici, nazhɛ A'amon sukakanɛ atwa Isrɛl nu ujasa.

⁵Aka na ta A'amon sukakanɛ atwa Isrɛl nu ujasa, ibɛ po n-nyarɛ mi Giliad mi zhe maa ɛ bɛcinjɛ Jɛfta na cɛnjɛ tu Tob.

⁶Ɛɛ hiɛŋ Jɛfta, Zhajɛ maa shɛ buhwuri-bu-umbe tu, maa ta zha ta nda ujasa na A'amon.

⁷Ama gɛ Jɛfta hiɛŋ n-nyarɛ ma ata mi Giliad, Shɛ ahiɛba suu hi n to la ni i'ime harɛ ehi m becinji ni ihwɛ bishi mi? Iwembe po ahiɛ zhajɛ ya pi mi na aka na tụ ụbaụta ihi vwutenii?

⁸N-nyarɛ ma ata mi Giliad mi jishijɛ Jɛfta, mɛɛ hiɛŋ bụ, Iwɛbɛ po etu gwure pụ bụ na aka ga, iwɛ maa zhagaga no tu maa shɛ uhiu tu na cɛnjɛ ti Giliad kpaaŋ maa ta nda ujasa na A'amon.

⁹Gɛ Jɛfta hiɛŋ aŋ, Yaa shɛ ehi n jicinji maa ma nda ujasa na A'amon, yaa shɛ AGWANGWAMA leni maa ta ala aŋ, asha Gamba N zhɛ ma sha uhiu hiŋ.

¹⁰N-nyarɛ mi Giliad mi hiɛŋ Jɛfta, Ti leni gana ata. Ga AGWANGWAMA shɛ useyida na ashashɛ tu na bụ maa ti zhɛ ta bụ nda hwuŋ gana ata tilɛɛ.

¹¹Iwɛbɛ po gɛ Jɛfta zhagajɛ ga na aba. Ibɛ po atwa ata njɛ bụ ga uhiu keeni buhwuri-bu-umbe ba aba. Gɛ Jɛfta dumanjɛ n-ndumwa me elele na baa 'yajɛ na AGWANGWAMA ni Mizpa.

¹²Gɛ Jɛfta tumwananɛ agwuma A'amon atumwa, bɛɛ hiɛŋ bụ, Imbe bwaa Ngaa bɛ njɛ upo abụ zhajɛ maa sukakanɛ cɛnjɛ ti mi nu ujasaa?

¹³Agwuma A'amon jishijɛ atumwa Jɛfta, bɛɛ hiɛŋ aŋ, Aka na ta atwa Isrɛl banɛ la na cɛnjɛ ti Ijipti, ee leshiji cɛnjɛ ti mi te kwune nu Urefu Anon i ci Jabok, tutu Urefu Jodan. Hwuwayɛ go, n gwuricingeni tu ma saiiŋ.

¹⁴Gɛ Jɛfta tumwananɛ atumwa pa agwuma A'amon,

¹⁵bɛɛ hiɛŋ bụ, Atwa Isrɛl leshiji shi la cɛnjɛ tu Moab kwo kaa cɛnjɛ ta A'amon.

¹⁶Ama aka na ta atwa Isrɛl banɛ la ni Ijipti, ee duri ụshɛka, ee zhe ni Itekwu Ishenje,[27] nazhɛ aa zhajɛ ni Kadɛsh.

¹⁷Nazhɛ atwa Isrɛl tumwanɛ atumwa no ofwo agwuma Idụm, ɛɛ hiɛŋ bụ, Ta bụ tabwa, lono maa to dulo cɛnjɛ tụ bụ, ama agwuma Idụm lacɛ. Aa tumwanɛ agwuma Moab, bi leni shi du o. Ibɛ po atwa Isrɛl jɛjɛ ya ni Kadɛsh.

¹⁸Te e beni apata ee zhe tahaŋnụ ta aba ee duleji ụshɛka, aa palanganɛ cɛnjɛ ti Idụm keeni cɛnjɛ tu Moab, ee zhe ee ci geri bu uwaŋna-banụ ba cɛnjɛ tu Moab. Nazhɛ ee jwe ugba wa aba hileniye Urefu Anon, ama e teni shi tugwungwu tu Moab, iwɛnɛ tu Urefu Anon ata shɛ ogwungwu Moab.

¹⁹Nazhɛ atwa Isrɛl tumwanɛ atumwa pi Sihon agwuma A'amon na shɛ du agwuma Hɛshbon. Atwa Isrɛl hiɛŋ bụ, Ta bụ tabwa, lono maa to dulo cɛnjɛ tụ bụ maa ta zha na cɛnjɛ tu tu.

²⁰Ama ge Sihon tɛtanɛ shɛ atwa Isrɛl rishe maa e duri tugwungwu tu bwa o. Ge Sihon sotulonu atwa ubwa hwɛɛ urubwo uko, ee jwe ugba wa aba nu Jahaz, maa a njɛ ujasa na atwa Isrɛl.

²¹Nazhɛ AGWANGWAMA na shɛ Agwatana atwa Isrɛl leni maa ga atwa Isrɛl eri Sihon tụlasụ ta atwa ubwa hwɛɛ. Aa kwụnɛ aŋ, nazhɛ atwa Isrɛl leshiji cɛnjɛ ta A'amo tu na tu namɛ na cɛnjɛ ta ata hwɛɛ.

²²E leshiji tu te kwune na Anon i ci Jabok tutu ụshɛka, i ci Jodan.

²³Gana AGWANGWAMA na shɛ Agwatana atwa Isrɛl unzenji aŋ la A'amo ta, ebi heŋshi maa bi tɛ zhɛ ba lashɛga tu waa hŋ?

²⁴Untangana iyi nɛ tuwa ta ata tụ bụ, ɛɛ hiɛŋ Kimosh[28] ti bi peni maa 'yaga. Atuba du ti zhɛ ta untangana iyi elele nɛ AGWANGWAMA na shɛ Agwatana tu iti leshigeni maa ta 'yaga.

²⁵Gabụ suu bu hwuri Balak yɛu Zipo, agwuma Moab? Bụ hwụjɛ suu maa bu sukwakwanua atwa Isrɛl kwukwuŋ. Okwo bu sukwakwanua aŋ suu nu ujasa kwukwuŋ?

²⁶Aka na ta atwa Isrɛl jɛjɛ ni Hɛshbon, keeni shɛngwuwa shɛ bwa, aa jɛjɛ na Aroe keeni shɛngwuwa shɛ bwa, aa jɛjɛ na ashɛpwụ elele na namɛ nụ ụpalanụ Urefu Anon shiywa kpakwụ-ni-dipi-yebi, (300) iwembe po ebi leshigeneni shi aŋ la na aka ataa?

²⁷M bụ njɛ shɛ iwɛwɛ ye elele o, ama gabụ bu n 'wanganɛ nu ujasa na aba nda ne mi. Ga AGWANGWAMA na shɛ bɛjɛmɛ-bụ-ụshɛrɛya jɛmɛ ụshɛrɛya wa atwa Isrɛl na A'amon hwayɛ ga.

²⁸Ama agwuma A'amon shɛlajɛ shɛ utumwa ata gɛ Jɛfta tumwananɛ bu o.

²⁹Nazhɛ Mpiala ma AGWANGWAMA mu ubi Jɛfta na aka ata, ibɛ po bee zhe Giliad, keeni Manasɛ, boo to tuhwulo bee zhe Mizpa ata namɛ ni Giliad, bee beni ni Mizpa ata, bee keshici bee zhe bee teneni A'amon.

³⁰Gɛ Jɛfta shileni AGWANGWAMA unu, bɛɛ hiɛŋ, Yaa shɛ ebi n leneni maa ma lasụ A'amon,

³¹asha iyi elele nɛ banɛ hwuŋ no odubo umwono mu n tɛjɛ uhwaŋna hiiŋ, na aka na ti Ngee jiye lapiya tu Ngaa lasụ A'amon, asha ibɛ Ngɛɛ zhɛ ma bụ pana ụrụpɛ tuhwoŋzhingo.

³²Gɛ Jɛfta keshi ga Urefu maa sukakana A'amon nu ujasa, ibɛ AGWANGWAMA leni maa ala aŋ.

³³Baa kwụnɛ aŋ te kwune na Aroɛ tutu ekpekpe na rungwutwonu Minit, tutu i ci Abɛl-kɛramim. Ashɛpwụ na ee iricinji hwɛɛ namɛ woshi. Gana atwa Isrɛl lasụ A'amon, ee iricinji aŋ tebiye tebiye ta.

³⁴Aka na ti gɛ Jɛfta be ci ujiyo ni ihwɛ ibwɛ ni Mizpa, baa kwụbɛ ti yɛu ibwɛ yo o banɛ yɛɛ tɛjɛ bụ uhwaŋna, yaa 'nyamɛ okoko, yɛɛ hibɛ tɛhɛba. Ubwa kaa shɛ yɛu nɛ baa 'yajɛ kiri, bu zasa ya kaa yɛu-ye-eyi kwo kaa yɛu-yo-o inyɛ o.

³⁵Aka na ti gɛ Jɛfta kwụbɛ bụ, bee dwetweji tugwuno tu bwa, bɛɛ hiɛŋ bụ, Adooyi, ɛ-yɛu mi! Bu hwaŋzhɛnjɛ, bu m peni kaa amɛ-tụhaŋtụ a'wụtụ. Iwɛnɛ po N shilwonuo AGWANGWAMA unu ụ'wụtụ, N eri shi kaa ma zaga ya unu ata tishilo.

³⁶Yɛu ɛtɛ hiɛŋ bụ, Ada, yaa shɛ obu go shilwonuo AGWANGWAMA unu, asha n njɛ gana ata abu ga dumwa, iwɛnɛ ta AGWANGWAMA ubu tupwagwa itɛpwɛ no ofwo atwa i'ime bu a na shɛ A'amon.

³⁷Bɛɛ hiɛŋ bishi bwa, N ndanɛ iyi nɛ Ngɛɛ zhɛ ma bụ lụpa. N leneni maa Mo rungo tugwo na asara mi nu nshama[29] ipiɛnɛ iyebi, maa M mama twana-u'wo, iwɛnɛ Nga ta shɛ usapa.

³⁸Bishi bwa leneni bu, baa sanɛ ga na asara ubwa, baa cwɛ-u'wo nu nshama ipiɛnɛ iyebi, iwɛnɛ ti bee te mepi shi butubwenyi kwukwuŋ.

³⁹Aka na ti ipiɛnɛ ɛtɛ iyebi ulwa, bee gwure no ofwo bishi bwa, Bishi bwa njɛ bụ ga gana ata ti bee ge shiri-unu. Yɛu ɛtɛ kaa mepi shi butubwenyi kwukwuŋ. Ijɛ ɛtɛ shɛ ya iyi uvwovwu ni Isrɛl tutu,

⁴⁰maa miaụŋ-mo-o mi Isrɛl mu na zha maa mu na twa-u'wo yɛu-yo-o Jɛfta ijitɛ ineshi uywa uywa.