Read bassa AJƐMƐ-ỤSHƐRƐYA 18 Bible Online

AJƐMƐ-ỤSHƐRƐYA 18 - bassa bible

AJƐMƐ-ỤSHƐRƐYA 18

¹Agwuma elele zasaba la ni Isrɛl na aka na ta atwa ụlamụ Dan a dwalakaka cɛnjɛ to ogwu aba maa a gɛga na tuba o. Iwɛnɛ po a ta zasa iyi-yo-ogwu Isrɛl nɛ teni i'ɛlɛ ya aba tutu i ci aka ata o.

²Ibɛ po ụlamụ Dan tumwanɛ atwa na beni urishi aba ta a na bee teri tụlụkpashɛ tụ ụlamụ ata hwɛɛ, aa tumwanɛ aŋ, e beni nu Zora keeni Ɛshtaol, maa a yalajɛ cɛnjɛ ta ata. Ɛɛ hiɛŋ aŋ, Zhaga ma hikekeni ma cɛnjɛ ta ata. Ee zhe ga ee ci cɛnjɛ te bikpekwu bi Ifrem, ee ci ihwɛ Maika; oo zokwu apata nụ ụrụmɛ ata.

³Aka na ta a namɛ nụ ụdatụ ihwɛ Maika, aa hwụjɛ rụhwụŋ ru usemberi we ebe shɛ Bulivai. Aa vwụrɛ, ɛɛ hiɛŋ bụ, Gaaba ubu shapɛ epee? Imbe shɛ ugondu na aba nda epee?

⁴Bɛɛ jishijɛ aŋ, bɛɛ hiɛŋ, Kazabana kazabana atɛ njɛ ushaura atuba na Maika, maa Ma sha bunongbo bwa, maa tuba bu na ma tụpa.

⁵Ɛɛ hiɛŋ bụ, Ta bụ tabwa maa lụpɛ Agwatana, okwo tahaŋnụ tu ga ɛti zhɛ ti zhɛ ta tu 'yagana eshe.

⁶Bunongbo ata jishijɛ aŋ, bɛɛ hiɛŋ, Zhaga ma na amɛ-olom. AGWANGWAMA zhɛ ma hi ngbaraka na tahaŋnụ tu ga ɛhi zhɛ.

⁷Nazhɛ etwenyi ata beni apata ee hwuri, ee ci Laish, aa kwụbɛ gana na ta atwa na namɛ apata namɛ lapiya. A namɛ apata na amɛ-olom suu gana Asaidụn, i zasa bụtụ be elele na sukakanɛ aŋ nu uwuru o. I zasa iyi elele nɛ 'nyananɛ aŋ[45] kwukwuŋ. Iyi elele balanɛ aŋ, a dụlụmɛ kaa na Asaidụn. I zasa bụtụ be elele na be sugeni aŋ ihiɛmɛ o.

⁸Aka na ta atwa ata a ta gwure nu Zora keeni Ɛshtaol, miaụŋ-mo-bino aba mi heŋteni aŋ, ɛɛ hiɛŋ, Imbe ɛhi cɛ ugbee?

⁹Ɛɛ jishijɛ aŋ, ɛɛ hiɛŋ, Ishijɛ tu hwuri ma, maa tu sukakanɛ ma atwa Laish. Tu kwubɛ cɛnjɛ ta ata, tɛ zhɛmɛ tebiye. Ta gɛga ma ya epe bohondo uzawa iyi elele tɛnda o! Ta nda ma ya ti'insu o, hwure ti zhe ma maa ti leshiji ma cɛnjɛ ta ata.

¹⁰Aka na ehi ci apata, hi zhɛ hia kwụba ta atwa apata jɛjɛ suu uzawa tusukakana te elele. Cɛnjɛ ta ata kaa ti heri. Agwatana kaa ihi pwonuo tu maa hi 'yaga, iyi elele nɛ to bụtụ ukekeshi barɛ ba apata.

¹¹Ibɛ po atwa ụlamụ Dan akpakwụ-atatụ (600) umpi i'wɛŋnɛ ujasa, ee beni nu Zora keeni Ɛshtaol.[46]

¹²Ee zhe ee munji, ee jwe ugba wa aba ni Kiriat-jiarim na namɛ nu Juda. Iwɛ ecilo ata oo po apata izeci maa Mahan-dan[47] tutu taa hwayɛ. Apata namɛ geri bu uwaŋna-twonuo bu Kiriat-jiarim.

¹³Ee keshici apata, ee zhe na cɛnjɛ te bikpekwu bi Ifrem, aa zhajɛ ni ihwɛ Maika.

¹⁴Nazhɛ etwenyi ebe a ta a na ge zhe cɛnjɛ ti Laish tiyalajɛ hiɛŋ miaụŋ-mo-bino ma aba, Hi mepi maa efod, keeni tuwa, keeni itɛtɛnuwɛŋ nɛ ee shebi keeni inɛɛ nɛ oo mo zweni ba no shimwono shɛ ga shi ko hŋ? Imbe eti heŋshi maa tɛ njɛ maa?

¹⁵Aa vwụrɛ ee teni nu umwono usemberi we ebe shɛ Bulivai ni ihwɛ Maika. Ee heŋteni bu okwo bu namɛ lapiya.

¹⁶Ama etwenyi ebe ụlamụ Dan akpakwụ-atatụ a na mama 'imɛ ni i'wɛŋnɛ ujasa, e te shikekeni no tupohondo to odubo ụshɛpwụ na aka ata.

¹⁷Nazhɛ etwenyi ebe a ta, ge zhe la cɛnjɛ tiyalajɛ teni nu umwono ata mbwụụ, ee suje ti itɛtɛnuwɛŋ ɛtɛ ee shebi, ti inɛ ɛtɛ oo mo, ta-tuwa ta ata, tobwolo bunongbo ata te shikeni no tupohondo to odubo ụshɛpwụ ne etwenyi ebe akpakwụ-atatụ a na ge umpi i'wɛŋnɛ ujasa.

¹⁸Aka na ta atwa ata teni nu umwono Maika, ee suje, ti itɛtɛnuwɛŋ ɛtɛ ee shebi, ti efod ata, tatuwa ta ata keeni itɛtɛnuwɛŋ ɛtɛ oo mo, bunongbo ata hiɛŋ aŋ, Imbe nɛ bwa ahia ndaa?

¹⁹Ɛɛ hiɛŋ bụ, Nama shiruu, 'ima unu bu. Maa zhagaga no tu, maa shɛ bishi tu keeni bunongbo tu. I zhɛmɛ suu maa shɛ bunongbo bi ihwɛ bụtụ bu ko gba, okwo yibwa maa shɛ bunongbo bụ ụlamụ Isrɛl hwɛ hwɛɛ?

²⁰Inɛ ɛtɛ lemicinji bunongbo ata amɛ. Bee shepi efod, tatuwa ta ata, ti itɛtɛnuwɛŋ ɛtɛ ee shebi, ti inɛ ɛtɛ oo mo, baa zhagajɛ na atwa ata.

²¹Ee bitiriji ujiyo, ee hwuricinji miaụŋ ma aba umbe, ti iyimabiga ya aba keeni i'wɛŋnɛ nɛ aa 'yagajɛ.

²²Aka na ta atwa ata genji ihwɛ Maika taa dụlụ, nazhɛ atwa na nhwaŋ ma aba mu gwumwonu ni inɛ Maika mama suyaganụ. Ee zhe ee vwuteni atwa ata ụlamụ Dan.

²³Aa suyanɛ atwa ebe ụlamụ Dan, ɛɛ jishirijɛ, ɛɛ hiɛŋ Maika, Imbe bwa teni ebu suje atwa ofwugwo gana ga iwɛ ujasaa?

²⁴Ga Maika jishijɛ aŋ, bɛɛ biɛŋ, Ahiɛba hŋ hi to mo hoŋtono waa maa, Imbe bwa teni? Te hi suje tuwa ti mi tu na Ngaa njɛ, to bunongbo mi ehi hwure. Imbe bwaa Ngaa ta 'yajɛ yaa?

²⁵Atwa ụlamụ Dan hiɛŋ bụ, Ta dumana ya iwɛ maa ta hwuga o, shibwonu atwa na 'yajɛ isɛbwɛ zhɛ ma bu sukakana hwayɛ, maa a bụ kwụnɛ ta atwa ihwɛ bu hwɛɛ.

²⁶Atwa ụlamụ Dan hwuri tahaŋnụ ta aba. Aka na tu ga Maika kwụbɛ maa ukpahiŋ ubwa ci shi una wa atwa ata o, bee gwure, bee ji ni ihwɛ ibwɛ.

²⁷Na aba na ta atwa ụlamụ Dan suji iyi nɛ ga Maika ga njɛ, to bunongbo na baa ga 'yajɛ, ee zhe ee ci Laish, no ofwo atwa ata 'yajɛ amɛ-olom suu. Aa kwụnɛ aŋ no otokwobi, nazhɛ ee hwoŋzhinji ụshɛpwụ ata nu ulwa.

²⁸I zasa kaa bụtụ be elele namba maa lashaga aŋ o, iwɛnɛ ta a mama gɛgajɛ, aa dụlụmɛ kaa na Asaidụn. Ubwa kaa namɛ nu ulomu na gwumwonu ni Bɛt-rɛhob. Ama atwa ata ụlamụ Dan meeneni ụshɛpwụ ata Laish aa jɛjɛ ya nu bwa.

²⁹Ee sheyinji ya izeci Laish, ɛɛ hiɛŋ uŋ, Dan, nɛ shɛ izeci bishi ba aba na ge Isrɛl meci.

³⁰Nazhɛ atwa ata ụlamụ Dan meme shikicingeni itɛtɛnuwɛŋ ɛtɛ ee shebi. Go Jonatan yɛu Gɛshom nɛ shɛ bụjalụ Moses,[48] ubwa shɛ bunongbo bụ ụlamụ ata Dan keeni miaụŋ mu bwa me eyi, tutu i ci aka na anya atwa zhajɛ ee suji aŋ na cɛnjɛ ti nya maa a shɛ ajama.

³¹Gabata ee shikicinji itɛtɛnuwɛŋ ɛtɛ i tɛshaba ga Maika njɛ apata tutu aka na tu umwono wa Agwatana namɛ ya nu Shailo.