Read bassa 2 JON YEBI 1 Bible Online

2 JON YEBI 1 - bassa bible

2 JON YEBI 1

¹Gamba Iyɛri[1] ɛtɛ, no ofwo agwuma-ihwɛ mi o o nɛ ee teri[2] keeni miaụŋ mu bwa[3] mu na Omo lubo no tugom, shɛ Gamba kiri o, ama ta atwa elele na mepi du iwɛ-tɛkana ata.

²Ibɛ i shɛ iwɛ-tɛkana ata na namɛ na shɛmɛ shi tu, nɛ kaa zhɛ ya nama no tu unyizo-nom.

³Go tulubo-ti-biye, ni inyɛmɛnyɛmɛ, keeni amɛ-olom na banɛ no olugwo Agwatana na shɛ Bishi, keeni no olugwo Jisus Krast, na shɛ Yɛu ɛtɛ Bishi, nama no tu, na tɛkana keeni tulubo ta ata.

⁴N njɛ unyasa tebiye, iwɛnɛ tu Ngoo to miaụŋ mụ bụ mu ko ugbe, tu maa hwuga-unu iwɛ-tɛkana te teni cɛŋ nu unu na Bishi tu iti peni.

⁵Ibɛ po Ama bụ lụpa hwuwayɛ go gabụ aguma-ihwɛ mi o o, i shɛ shɛ maa unu ufwo tụpana Ngaa bu 'nyatanɛ o, ama una ala ati 'yajɛ taa nu umozhigo. Ibɛ shɛ maa tu no momo lubonu ma.

⁶Tulubo ta ata na, ibɛ shɛ maa ga tu na hwuga-unu te teni cɛŋ nu unu na Agwatana iti peni. Unu ata tụpana na, ibɛ shɛ maa hi na hwuga-unu te teni cɛŋ gana na ta ahiɛ hwụjɛ la taa nu umozhigo.

⁷Iwɛnɛ po ehelekeci ofwugwo banɛ ee teni nu unyizo, aba shɛ atwa na leni shi maa ge Jisus Krast zhajɛ na tu'waba ta butugwumwa. Bụtụ bu gana ata, ubwa shɛ bihelekeci ata, baa shɛ kaa du busukakanɛ bu Krast.

⁸No momo shiyono ma eshe maa kede iyi nɛ atɛ[4] njɛ ugondu ibɛ itɛ vwụnjɛ o, semi iwɛ maa ta lashɛga hwuŋ ule ibɛ te shini.

⁹Bụtụ be elele na kaa ba ta tuhwulo nu uzawa imbisegeni Krast ti'yaga, asha bụtụ ata zasa du Agwatana o. Ama bụtụ na ba nama ni imbisegeni Krast, bụtụ ata ubwa 'yajɛ te Bishi ti Yɛu.

¹⁰Yaa shɛ bụtụ be elele zhajɛ pi hiŋ, baa 'waŋnɛ shɛ imbisegeni gɛ, asha ta la bu ma nu nhwaŋ mi hiŋ o. Tɛ hiɛŋ bụ ma du, Okwu o!

¹¹Bụtụ be elele na hiɛŋ bụ, Okwu! Asha bụtụ ata ba twa-ikpɛngwu nu bwa nu ugondu ubwa ụwɛ.

¹²N nga ta 'yajɛ iyi ifwugwo nɛ maa ma hi 'nyatanɛ, ama N jeri shi kaa maa ma 'nyacɛ iŋ nu utakada keeni meni me ti'nyeci o. Ama i namɛ na amɛ mi maa Ma zhajɛ pi hiŋ, maa ma twa eshe ne hiŋ, maa tu dumanjɛ ma n-ndumwa nu unu tu, iwɛ maa unyasa tu[5] ulwa.

¹³Miaụŋ mi yɛu-bino bu yo o[6] ɛtɛ ee teri mu ma bụ 'walụ.