Read bassa JUDU 1 Bible Online

JUDU 1 - bassa bible

JUDU 1

¹Go Judu yɛu-ugondu Jisus Krast, na shɛ yɛu-bino Jemis. No ofwo atwa na aa suyanɛ, a na shɛ atwa na Agwatana na shɛ Bishi tu bo lubo, keeni atwa na ge Jisus Krast intanɛ.

²Gɛ inyɛmɛnyɛmɛ keeni tulubo na hi kaanana ugombo.

³Ahiɛba atwa tulubo, i n kwụlanɛ hwɛɛ maa Ma hi 'nyatanɛ iwɛ ubino na ata la urobwo ubwa. N to ugbe maa i shɛ tilɛɛ maa Ma hi 'nyatanɛ, maa Ma hi kaana-ikɛnyi, ma hi no momo sho tebiye iwɛ rishe ra ata tɛtɛtana Agwatana peni atwa tijilo kpalụ ko gba iwɛ aka hwɛɛ.

⁴Atwa oko hembiri ee teni ne tusweci, aba shɛ atwa ata ee 'nyeci iwɛ tụwụma ta aba cala cala, aba shɛ atwa ata zasa Agwatana. O sheyingo tulubo-ti-biye ta Agwatana tu, maa tɛ shɛ masha mụ wɛ, aa tala kaa ashamanjɛ Agwuma-ihwɛ tu mokondo, na shɛ Agwatana keeni Agwangwama tu ge Jisus Krast.

⁵Ama Ma jala maa me hi teyingeni, okwo te ehi go mwopwo iŋ cebe, maa Agwangwama bicinji[1] la atwa ubwa, aa banɛ ni Ijipti lapiya, bee iricinji tuba atwa na tɛtanɛ shɛ rishe.

⁶Bee kepi atumwa-azuba[2] boo to aŋ shigbo shi unyizo-nom tuta te tishi tu tuzhuu zhuu uuwa i ci Ụjita ata ụshɛrɛya ụ'wụtụ, iwɛnɛ ta a untanganɛ shɛ ohwolu aba ehiiŋ keeni olugwo aba u tuzwono u tugom.

⁷Gobwonu du Sụdụm nu Gụmụra[3] keeni ashɛpwụ na rungwutwonu aŋ shɛ la, na aka na te meme peni maa a shɛ anjɛ-tuwɛle, aa 'watatagwụ ukwedeyi u tuwɛle tu na tɛ shɛ shɛ okwo gana na butugwumwa ba nda. Agwatana tileni aŋ caakwụ maa a shɛ tusakana, nu ulwapɛ na aa pana aŋ, na ụ shɛ ulwa unyizo-nom.

⁸Gobwonu du ewetegeni ata awalabụ a shɛ, a hashɛgana tu'waba ta aba, aa lacɛ ụhwada wa Agwatana, oo gbozhigo iyi-uumwa nɛ 'yajɛ ụjɛrụma na azuba.[4]

⁹Ama okwo ga Maikɛl, na shɛ uhiu wa atumwa-azuba, bu kara sụ maa sukakana Ibiri ɛtɛ nu n-ndumwa-tụwụma mu tutwa na aka na tu baa nda ashamanjɛ ni Ibiri ɛtɛ iwɛ ru'wo ru Moses o, ama bi hiɛŋ bụ, Ga Agwangwama bi tizhigeni!

¹⁰Ama atwa ata a hashɛgana iyi elele nɛ ee eshiciji shi. Ama iyi ya aba ti'eshicigo ye elele i shɛ gana na ta butugwumwa namɛ, gana isundɛ nɛ zasa ahaŋsa. Tedure ni ibɛ kaa oo momo iricingo.

¹¹Ɛ zhɛ a nda hwuŋ adangboo! Iwɛnɛ ta a 'wa uhwaŋna Ken,[5] e suri ee teni na ti'ina tu Balam[6] iwɛ titeni tu ukwuribi, a njɛ tigezhe gana Kora[7] gobwonu du kaa ɛɛ zhɛ o ilono gana bwa.

¹²Atwa ga 'yajɛ unu-tusapa nu nsono mi hiŋ mu tulubo, a shɛ gana atayɛ a'wụtụ a na nengeni ni itekwu, ta a ya unyizo na ashashɛ hiŋ uzawa inyɛsɛ. A shɛ a'iywa-agwụdụ a na mama ima u'ala; a shɛ gana odomu a na zasa meni, a na uvwugo wo sugo. A shɛ gana i'wɛ'wɛ nɛ 'weri shi na aka tụ'walụ, e mushenji iŋ ye 'wi umɛwɛɛ.

¹³A shɛ gana adanga a'wụtụ itekwu, ezuye iyi nɛ aa nda a banɛ nu ukpogwu gana tufwuno. A shɛ gana mkpasu mu na mo rungo, a intananɛ aŋ tishi tu tuzhuu zhuu unyizo-nom.

¹⁴Ge Ɛnok na shɛ du bụtụ bu usara ucenje[8] na 'wa Adam, bɛ jɛmɛ la tigesere iwɛ atwa ga, na aka na ti bɛɛ hiɛŋ, Hioko ma, AGWANGWAMA zhajɛ na ashashɛ atwa ubwa tijilo igbɛɛ ifwugwo ụ'wụtụ 'wụtụ,

¹⁵maa duma ụshɛrɛya nu uhiuhiu wa atwa kpaaŋ, maa vwɛ kaa atwa na zasa Agwatana uvwi, iwɛ ugondu wa aba ụwɛ we elele na aa njɛ, unaa na aa njɛ nu uhwaŋna na heshigeni amɛ Agwatana, iwɛ n-ndumwa mi ci'nyɛ mu na kaa atwa iwɛwɛ a na zasa Agwatana dumanganɛ bu.

¹⁶Atwa ga shɛ atwa tungwulongongo, na atwa usweji-unu, a nda iyi ya aba te teni cɛŋ nu ukwedeyi wa aba ụwɛ. Unu wa aba wa duma iwɛ tubusa tụ 'wụtụ, a muna atwa ụjɛrụma iwɛ maa e leshiji titeni.

¹⁷Ama ahiɛba atwa tulubo, teyinje ma iwɛ ɛtɛ atumwa Agwangwama tu Jisus Krast jɛmɛ la cala cala.

¹⁸Ɛɛ hi hiɛŋ, Na aka umɛwɛɛ anjɛ-shisada zhɛ a nama hwuŋ, a na a nda iyi te teni cɛŋ nu ukwedeyi masha ma aba mu na mu zasa Agwatana.

¹⁹Atwa gana ga aba a karɛ tubogwu, a shɛ atwa na 'yajɛ shihaŋsa gana na butugwumwa 'yajɛ kiri, ama a zasa Mpiala o.

²⁰Ama ahiɛba atwa tulubo, no momo monu ma ne rishe-tɛtɛtana ri hiŋ ri tijilo ru tugom. Na nda ma adua na amɛ Mpiala mi Tijilo.

²¹Na mama intana ma no tulubo ta Agwatana, ta ahia nda ashɛlatụ inyɛmɛnyɛmɛ nɛ Agwangwama tu Jisus Krast zhɛ mo hi hiokono maa ma hi pana uraiŋ unyizo-nom.

²²Hioko ma inyɛmɛnyɛmɛ ya atwa[9] na a nda oruwo.

²³Dundo aŋ ma nu ulwa, no imo ma okwo n-nduka mu na ukwedeyi tu'waba heshigeni.[10]

²⁴No ofwo bụtụ ata na eri ma hi ngbaraka maa kede hi leyi o, maa kaa mo hi shikicingo hwuŋ na agba ụjɛrụma ubwa, uzawa unu-tusapa, nu unyasa ụ'wụtụ.

²⁵No ofwo Agwatana mokondo, na shɛ Bibicinji tu, tedure Jisus Krast Agwangwama tu, na ụjɛrụma, ni igɛhi i'wɛtwɛ, nu ukpahiŋ keeni ụhwada ụ shɛ una ubwa, taa na aka cala cala nazhɛ asara elele namɛ, tu hwuwayɛ, tutu unyizo-nom. Ami.