Read bassa N-NDUMWA TƐKAPƐSHƐNGA 12 Bible Online

N-NDUMWA TƐKAPƐSHƐNGA 12 - bassa bible

N-NDUMWA TƐKAPƐSHƐNGA 12

¹Ibɛ useyida uko ụ'wụtụ banɛ caakwụ na azuba: biyikwo bu ko meme urigeni uwaŋna, upiana namɛ tuta tɛ ɛvwɛvwɛjɛ ubwa, baa patanɛ udara na aa njɛ nu mkpasu umpwa-na-muba-mi-yebi nu uhiuhiu ubwa.

²Bee le ofubo, baa uganɛ aka na ti bɛɛ zhɛ tumata, iwɛnɛ tu baa hwụjɛ-ụngwụ.

³Useyida unya banɛ caakwụ na azuba; aa kwụbɛ buduwo bi shenje bụ 'wụtụ, bi 'yajɛ ohiuhiu ecenje, keeni mahiuaŋ umpwa. Akata tugwama ecenje patanganɛ no ohiuhiu ata ubwa.

⁴Utwenyi ubwa u mbo urubwo ụtatụ mkpasu, bɛɛ 'wɛŋ mu nu unyizo. Nazhɛ buduwo ata zhe bee shikeni nu umbe biyikwo ata ba jala tumata, iwɛ maa aka na bee meci, maa twala yɛu ɛtɛ.

⁵Ibɛ biyikwo ata meci yɛu-ye-eyi, nɛ zhɛ ya ya tugwama te edenji elele no okwuto ụshɛmbɛrɛ. Ama e jinji yɛu ɛtɛ, ee shepi iŋ pa Agwatana no ofwo idwɛtwɛ ibwɛ.

⁶Nazhɛ biyikwo ata gezhiji bee zhe nu ụshɛka, no ofwo na Agwatana imanganɛ bụ, iwɛ maa nɛnga bu apata ijitɛ akpakwụ-ecihiŋ-nu-dupu-ne-eshe-umpwa (1,260).

⁷Nazhɛ ujasa layɛ na azuba, ga Maikɛl keeni atumwa ubwa azuba jeshi ujasa no buduwo ata; ibɛ buduwo ata keeni atumwa ubwa jeshi du ujasa.

⁸Ama a lasụ buduwo ata, ibɛ po ee gwushigeni shi aŋ ya ohwolu na azuba.

⁹Ibɛ po aa karɛ buduwo ata bụ 'wụtụ, ubwa shɛ uhwa ala ụngwụshɛ, na aa suyana Ibiri keeni Setan, na ba halakaka atwa unyizo hwɛ hwɛɛ, a karɛ bu nu unyizo, ɛɛ 'wɛŋ du atumwa ubwa nu bwa.

¹⁰Nazhɛ Ngaa hwụjɛ ta rụhwụŋ ru ko rụ 'wụtụ ru dumanɛ iwɛ na azuba, rɛɛ hiɛŋ, Hwuwayɛ ubino zhajɛ ya, keeni ukpahiŋ keeni Cɛnjɛ-ta-tugwama ta Agwatana tu. Iwɛnɛ ta a karɛ bụtụ ata ga suyana miaụŋ-mo-bino tu ụshɛrɛya tu ụjita tu uwaŋna na agba Agwatana tu.

¹¹Miaụŋ-mo-bino ata tu mu lasụ bụ tedure ne mehieŋ[29] mi Yɛu-ụgwụdụ, keeni iwɛ tiseyida tu na ee le.[30] E lubi shi araiŋ aba okwo uuwa i ci tu'wo.

¹²Iwɛ inɛ gɛ, oo azuba keeni ahiɛba na hi zweni na azuba, bwada ma ya unyasa! Unyizo keeni itekwu zhɛ wa nda adangboo, iwɛnɛ ti Ibiri zwe pi hiŋ ni isɛbwɛ ibwɛ i'wɛtwɛ, iwɛnɛ ti bee mepi maa aka na baa 'yajɛ twa sụ ya okwo cwɛŋ o.

¹³Aka na to buduwo ata kwụbɛ maa a karɛ bụ nu unyizo, baa shɛka ya biyikwo ebe ge meci yɛu-ye-eyi.

¹⁴Ama e peni biyikwo ata apiambɛ ugbeji uko ụ'wụtụ eyebi maa hila maa zha nu ụshɛka, maa banangana uhwa ata, maa zha no ohwolu ubwa na ɛɛ zhɛ a nɛnga bụ na aka oko, keeni aka eyebi keeni ashashɛ aka.

¹⁵Nazhɛ uhwa ata 'wɛŋ meni mu na mu banɛ nu unu ubwa, gana Urefu, maa 'wa biyikwo ata, iwɛ maa ufwunga Urefu ata suji biyikwo ata.

¹⁶Ama cɛnjɛ ti mbiyeni biyikwo ata, tɛ ɛ kɛpishinjɛ unu tuba, te e tweri Urefu ata uhwa ata gɛ 'wɛŋ nu unu ubwa.

¹⁷Nazhɛ buduwo ata njɛ isɛbwɛ ne biyikwo ata, bee beni apata bee zhe bee shikeni nu uhwayɛ itekwu, maa jasa ujasa na ajalalo biyikwo ata a na ta vwɛ, aba shɛ atwa na a untangana unu-tupana wa Agwatana a na untanganɛ tiseyida ti Jisus.[31] nu ukwoswo itekwu ɛtɛ.