Read bassa N-NDUMWA TƐKAPƐSHƐNGA 18 Bible Online

N-NDUMWA TƐKAPƐSHƐNGA 18 - bassa bible

N-NDUMWA TƐKAPƐSHƐNGA 18

¹Na aba inɛ gɛ, nazhɛ Ngaa kwụbɛ butumwa-ba-azuba bi nya na 'yajɛ ụhwada ụ'wụtụ, tu baa banɛ na azuba bee zwe. Ụjɛrụma ubwa wo hiokono unyizo uhwaŋna.

²Baa uganɛ ta 'yajɛ ikɛnyi, bɛɛ hiɛŋ, Babulon, ụshɛpwụ ata ụ'wụtụ, loyo, u loyo! Ụ shɛ ya ofwo na atumwa-ibiri a gɛga keeni umwono-tishi mpiala mụ wɛ[44] me elele, keeni umwono-tishi shanụnụ shụ wɛ she elele keeni ma shɛ na ee imi;

³iwɛnɛ te edenji elele swe mayaga[45] mi isɛbwɛ tuwɛle tu bwa. Shɛgwuma shi unyizo kaa shɛ njɛ tuwɛle nu bwa, ahinya unyizo shɛ ya azhɛgba nu ukpahiŋ tugala tu bwa.

⁴Ngaa hwụjɛ ta rụhwụŋ ri nya ru banɛ na azuba, rɛɛ hiɛŋ, Ahiɛba atwa mi, banɛ ma na amɛ ubwa, maa kede hi twa-ikpɛngwu ni iwɛwɛ ibwɛ o, iwɛ maa kede urobwo tishikpe tu bwa ihi jiteni o.

⁵Iwɛnɛ ti iwɛwɛ ibwɛ momo potongonu uuwa yee ce azuba, Agwatana kaa teyingwo orugwusu ubwa.

⁶Tụpana bu ma gana na ti bee hi peni; tụpana bu ma kpalụ yebi te teni cɛŋ nu ugondu na baa njɛ; hiŋtotongono bu ma kpalụ yebi nu ukwopi ata bee hi hiŋtetengeni.

⁷Gana na ti bee meme peni ụjɛrụma, baa gala kaa nu uraiŋ na baa ya, pana bu ma du ụbaụta ụ'wụtụ keeni ụkwụla-tuta. Iwɛnɛ tu baa duma na amɛ na amɛ ubwa, bɛɛ hiɛŋ, Bɛjɛjɛ Ngaa jɛjɛ, Gamba n shɛ agwuma o o, N shɛ shɛ kaa bululo, N zha shɛ kaa ma ta-ụkwụla kwukwuŋ.

⁸Iwɛ inɛ gɛ, ibɛ tishikpe tu bwa tu na tɛ shɛ tu'wo, nu ụkwụla-tuta keeni imunɛ-tiya ti zhɛ to jitono bu nu uwaŋna ụjita uko gba, ɛ zhɛ kaa o hwoŋzhingo bu nu ulwa kwunduu; iwɛnɛ ta Agwangwama na shɛ Agwatana na jɛmɛ ụshɛrɛya ubwa 'yajɛ ikɛnyi.

⁹Shɛgwuma shi unyizo shɛ na shɛ njɛ la tuwɛle nu bwa, shɛ na shɛ jɛjɛ nu bwa ne tigeri, ɛ zhɛ a twana bu u'wo, ɛɛ zhɛ o zwonono bu u'wo gboo, na aka na ta a kwụbɛ nshikwo mu tuhwoŋtu tu bwa.

¹⁰Ɛ zhɛ o shikono taa dụlụ, iwɛnɛ ta a nda inyɛsɛ ụbaụta ụ'wụtụ na aa pana bụ, ɛɛ zhɛ ɛ hiɛŋ, Adangboo! Adangboo! Babulon, ụshɛpwụ ata ụ'wụtụ na kaa 'yajɛ ikɛnyi! Iwɛnɛ ti yaa shɛ na auwa oko gba ibɛ ụshɛrɛya bụ zhajɛ!

¹¹Ibɛ po ahinya unyizo zhɛ a twana bu u'wo, ɛɛ zhɛ o zwonono bu u'wo gboo, iwɛnɛ ti yaa zasa bụtụ na zhɛ ba sa ya i'wɛŋnɛ i tihinya ta aba kwukwuŋ.

¹²I'wɛŋnɛ i tihinya ta aba kaa i shɛ inɛɛ nɛ aa njɛ na azhɛnarɛya, na azụrụfa, na atayɛ ogwumishi, no odworo, ni ilinɛn ibiye, nu uduhwa ushenje, ni siliki, ni iyi ishenje howu, tu ụ'wụ'wụ we elele na ɛɛ hiɛŋ taiyain, ti iyi-uhwugwa ye elele nɛ aa njɛ ne ene udagba, ti iyi-uhwugwa ye elele nɛ aa njɛ nu ụ'wụ'wụ we elele na ulumo ubwa zhanjɛ uhwuri inɛ vwɛ, tu utumburɛ, tu ụshɛmbɛrɛ, tu u'urungwa,

¹³ti kinamon, ta amomum, ti iturɛre, ta manɛbɛ, tu ufrankinsɛns, te meni mu tụ'walụ ta afwafwa, ta manɛbɛ ma buta, te mihiuŋ, to ohiu, ti iyimabiga, ta agwụdụ, ti idɛkwɛ, ti ihɛŋtu-ujasa, ta tu'waba ta atwa, to shihwulu sha atwa.

¹⁴Ɛ zhɛ ɛ hiɛŋ bụ, Tụ'walụ tu na ukwedeyi tuba ga bụ nda, tụ bụ vwụnjɛ, keeni uducinya bụ, ti iyi bu nɛ ga pilanụ, ibu ndanɛ ufwu hwɛɛ, i zha shɛ kaa ye gwure ya pụ bụ kwukwuŋ!

¹⁵Ahinya na baa njɛ azhɛgba ni ijɛ kpaaŋ, zhɛ o shikono taa dụlụ, iwɛnɛ ta a nda inyɛsɛ ụbaụta ụ'wụtụ na aa pana bụ, ɛ zhɛ a twa-u'wo gboo, ɛɛ zhɛ a ta-ụkwụla.

¹⁶Ɛ zhɛ ɛ hiɛŋ, Adangboo! Adangboo! Ụshɛpwụ ga ụ'wụtụ! Na urigeni ilinɛn ibiye keeni uduhwa-ushenje keeni una ushenje howu, na mɛmɛ njɛ tisemberi na azhɛnarɛya, na atayɛ ogwumishi keeni odworo!

¹⁷Iwɛnɛ ti yaa shɛ na auwa oko gba aa njɛ uduciya gana ga ufwu hwɛɛ! Nazhɛ ehiu ihɛŋtu ye elele, ta atwa elele na a zha tahaŋnụ ni ihiɛŋtu, ta atwa na a nda ugondu ni ihɛŋtu, keeni atwa elele na a nda ugondu ni itekwu, e shikekeni taa dụlụ.

¹⁸Aka na ta a kwụbɛ nshikwo mu tuhwoŋtu tu bwa, aa uganɛ ɛɛ hiɛŋ, Ụshɛpwụ naa ta sụbɛ ụshɛpwụ ga ụ'wụtụụ?

¹⁹Ibɛ po aa mama dula upwupwutu no ohiuhiu aba, aa uganɛ, aa cwɛ-u'wo, oo to-ụkwụla, ɛɛ hiɛŋ, Adangboo! Adangboo! Na amɛ ụshɛpwụ ga ụ'wụtụ aa njɛ atwa elele na 'yajɛ ihɛŋtu ni itekwu azhɛgba tedure ni iyi ibwɛ nɛ zhanganjɛ! Ama na auwa oko gba aa njɛ uŋ osombo!

²⁰Oo ahiɛba atwa azuba, na atwa tijilo Agwatana, na atwa elele, keeni egesere, ndana uŋ ma unyasa. Iwɛnɛ po Agwatana a duma ụshɛrɛya ubwa maa ma hi tụpanana bụ tụlụkpashɛ ti iyi nɛ baa hiɛ njɛ la!

²¹Nazhɛ butumwa-ba-azuba bu ko na 'yajɛ ikɛnyi shepi utayɛ uko ụ'wụtụ na shɛ gana inɛnɛ, bee keri uŋ ni itekwu, bɛɛ hiɛŋ, Gana ga ɛɛ zhɛ a kala Babulon na shɛ ụshɛpwụ ata ụ'wụtụ na cɛnjɛ na abwagara, a zha shɛ kaa a kwụba uŋ ya kwukwuŋ.

²²I zasa ofwo elele na ɛɛ tɛ zhɛ a hwuga ya rụhwụŋ ra atwa na a 'nyama shiduma, okwo azụnjɛ, okwo ehwuri-akpasana, kwo kaa ehwuri-akakacɛ na amɛ bụ kwukwuŋ. I zasa kaa ofwo elele na ɛɛ tɛ zhɛ a kwụba ya bɛnjɛ-bu-ugondu-i'ɛlɛ na amɛ bụ kwukwuŋ. I zasa ofwo elele na ɛɛ tɛ zhɛ a hwuga ya rundu ri inɛkɛ inɛnɛ na amɛ bụ kwukwuŋ.

²³I zasa kaa ofwo elele na uhioko-uhwaŋna ụsụtụla tɛ zhɛ wa ta na amɛ bụ kwukwuŋ ya. A zha shɛ kaa a hwuga ya rụhwụŋ ro bwolo-be-eyikwo keeni biyikwo bu ufwo na amɛ bụ kwukwuŋ, iwɛnɛ ta ahinya bụ a shɛ la atwa a'wụtụ nu unyizo, keeni iwɛnɛ ta abɛ inzhɛnjɛ la edenji elele tedure ne tukwupenyi tụ bụ.

²⁴Na amɛ ubwa kaa oo to mehieŋ me egesere, na mu na ma atwa tijilo Agwatana keeni mu na ma atwa elele na aa kwụnɛ la nu unyizo ugbe.