Read bassa N-NDUMWA TƐKAPƐSHƐNGA 20 Bible Online

N-NDUMWA TƐKAPƐSHƐNGA 20 - bassa bible

N-NDUMWA TƐKAPƐSHƐNGA 20

¹Nazhɛ Ngaa kwụbɛ butumwa-ba-azuba bu ko tu baa banɛ na azuba, bee zwe, baa 'waŋnɛ i'ilɛ-isɛhwɛ u'ibwa ata zasa uce keeni ashɛnjɛ a'wụtụ ni i'ɛlɛ ibwɛ.

²Boo to buduwo ata kpam, ubwa shɛ uhwa ala ụngwụshɛ, na shɛ Ibiri keeni Setan, bee umpi bu shiywa akpakwụ-a-ta.

³Bee keri bu nu u'ibwa ata zasa uce, bee kepi uŋ, bee sweni uŋ no tupohondo, iwɛ maa kede halakaka ya edenji kwukwuŋ, uuwa i ci aka na ta shiywa sha ata akpakwụ-a-ta shɛ ulwa. I shɛ kaa tilɛɛ maa e tufwurinji bu maa nama aka fwalaa.

⁴Nazhɛ Ngaa kwụbɛ n-ndwụtwụ, ta atwa na gɛgajɛ na muba. Ee peni aŋ ụhwada maa a jɛmɛ ụshɛrɛya. Ngaa kwụbɛ shihwulu sha atwa na ee mwi la ohiuhiu iwɛ tiseyida ti Jisus keeni iwɛ n-ndumwa ma Agwatana, keeni atwa na kwuzeni shi la usunda ata ehilo, kwo kaa itɛtɛnuwɛŋ ibwɛ, a na ee te shi la bi'nyata bu bwa nu untuno ma aba, kwo kaa nu u'ala wa aba, a yɛ uraiŋ, aa yɛ tugwama na Krast shiywa akpakwụ-a-ta.

⁵Ama atwa na vwɛ na ashashɛ atwa na uwo, a ta zha shɛ a yaanana uraiŋ o, semi aka na ta shiywa sha ata akpakwụ-a-ta shɛ ulwa. Tihiɛ tu ga, tuba tɛ shɛ tihiɛ ti hiiŋ.

⁶Bụtụ bi tijilo ba Agwatana na 'yajɛ urobwo nɛ tihiɛ tu ga ti hiiŋ gwoje! Tu'wo ti yebi[48] ti zha shɛ ta 'yaga ya ụhwada no ofwo atwa ga o. Ama ɛ zhɛ a shana Agwatana keeni Krast onongbo, ɛɛ zhɛ kaa a ya tugwama nu bwa shiywa akpakwụ-a-ta.

⁷Aka na ta shiywa sha ata akpakwụ-a-ta shɛ ulwa, ɛ zhɛ o tufwurungo Setan, ɛ vwɛ bu nu umwono ubwa u tishi.

⁸Ibɛ bɛɛ zhɛ ba banɛ maa halakaka edenji a na namɛ ne esugwulumi unyizo eneshi, aba shɛ Gog keeni Magog,[49] maa suje aŋ no ofwo ujasa, ofwugwo wa aba ụ shɛ gana ahwayɛ itekwu.

⁹Nazhɛ ee munji ee sukeni uholo cɛnjɛ tu unyizo, oo rungwutwonu shidulo sha atwa tijilo Agwatana, keeni ụshɛpwụ ata oo lubo. Nazhɛ ulwa banɛ na azuba, no olugwo Agwatana, wee zwe,[50] wee hwoŋzhinji aŋ kwunduu.

¹⁰Nazhɛ ee shepi Ibiri ɛtɛ helekeci aŋ la ee keri bu nu ukwokwo ulwa keeni tuwiŋ-tu-uwaŋna, no ofwo na usunda ata we ehilo, ne bigesere ata bu tukata namɛ. Ibɛ ɛɛ zhɛ a kwụba ụbaụta tu uwaŋna tu ụjita tutu unyizo-nom.

¹¹Nazhɛ Ngaa kwụbɛ idwɛtwɛ i'wɛtwɛ icɛnjɛ, keeni bụtụ na jɛjɛ ni ibɛ, unyizo keeni azuba mekeni maa e gezhigeni ụpɛshɛka ubwa, ama e gwushiji shi kaa ofwo na maa a swaka o.

¹²Nazhɛ Ngaa kwụbɛ atwa na uwo, ta atwa a'wụtụ a'wụtụ, ta atwa ticwɛŋ cwɛŋ, te e shikekeni nu umbe idwɛtwɛ ɛtɛ. Nazhɛ ee kepeshenji atakada, ee kepishinji du utakada unya, na shɛ una uraiŋ.[51] Nazhɛ aa jɛmɛ ụshɛrɛya wa atwa na uwo, te teni cɛŋ ni iyi nɛ ee 'nyeci nu utakada ata, te teni cɛŋ nu ugondu na bụtụ bụtụ njɛ la.

¹³Nazhɛ itekwu bɛcinjɛ n'wo ma atwa na zweni na amɛ ibɛ. Ibɛ Tu'wo keeni E'uye bɛcinjɛ n'wo ma atwa na zweni na amɛ aba. Nazhɛ aa jɛmɛ ụshɛrɛya ụ bụtụ bụtụ te teni cɛŋ nu ugondu na bụtụ bụtụ njɛ la.

¹⁴Nazhɛ ee shepi Tu'wo keeni E'uye ee keri nu (ukwokwo ata ulwa, ubwa shɛ tu'wo ti yebi).[52]

¹⁵Bụtụ be elele na kaa ee te shi izeci ibwɛ ugbe nu utakada ata uraiŋ, asha o shopwo bu, oo kolwo nu ukwokwo ata ulwa.