Read bassa N-NDUMWA TƐKAPƐSHƐNGA 21 Bible Online

N-NDUMWA TƐKAPƐSHƐNGA 21 - bassa bible

N-NDUMWA TƐKAPƐSHƐNGA 21

¹Nazhɛ Ngaa kwụbɛ azuba ofwo keeni unyizo ufwo. Iwɛnɛ ta azuba ala ehiiŋ keeni unyizo ala uhiiŋ koshikwo; itekwu du zasaba ya o.

²Ngaa kwụbɛ Ụshɛpwụ Tijilo, ubwa shɛ Jɛrusalɛm ufwo, na aa imanjɛ gana biyikwo bu ufwo na mɛmɛ njɛ tisemberi iwɛ bwolo bwa, tu waa banɛ na azuba no olugwo Agwatana wee zwe.

³Ngaa hwụjɛ ta rụhwụŋ ru ko rụ 'wụtụ ru dumanɛ iwɛ na azuba, rɛɛ hiɛŋ, Hioko ma, udulo wa Agwatana namɛ na atwa, bɛɛ zhɛ kaa ba gɛga na aba, ɛ zhɛ a sha atwa ubwa, Agwatana ni ikɛnyi ibwɛ zhɛ a nama na aba, ba sha Agwatana aba.[53]

⁴Ubwa zhɛ ba wafwaga malaba me elele ne shishe sha aba. Tu'wo ti zha shɛ ta nama ya kwukwuŋ, okwo ụkwụla-tuta, okwo u'wo-tutwa, kwo kaa ụngwụ-tuhwuga zha shɛ wa nama ya kwukwuŋ. Iwɛnɛ ti iyi ɛlɛ ihiiŋ koshikwo!

⁵Nazhɛ bụtụ ata jɛjɛ ni idwɛtwɛ ɛtɛ hiɛŋ, Hioko ma, Ma nda iyi elele tɛnda tu ufwo. Bɛɛ n hiɛŋ sasana, 'Nyata n-ndumwa mu ga, iwɛnɛ tu maa shɛ n-ndumwa mɛ tɛcara keeni mu na mu tɛkana.

⁶Bɛɛ n hiɛŋ, I ci ya ukwunanga! Gamba n shɛ Alfa keeni Omɛga,[54] Gamba n shɛ umozhigo keeni ukwunanga. Bụtụ na i'uyɛ gwụmɛ, N zhɛ ma pana bu umɛzhinjɛ meni mu uraiŋ; maa swa arahaŋ.

⁷Bụtụ na lasụ, ubwa zhɛ ba ya iyi-yo-ogwu ga hwɛɛ. Ibɛ Ngɛɛ zhɛ ma sha Agwatana ubwa, bɛɛ zhɛ du ba sha yɛu mi.

⁸Ama atwa na a nda inyɛsɛ, na atwa na tɛtanɛ shɛ rishe, na atwa na a nda iyi-tupwaŋ, na akwụnɛ-atwa, na anjɛ-tuwɛle, ne ekwupenyi, na anjɛ-tuwa keeni ejwe-ụzagwụ hwɛɛ, urobwo wa aba namɛ nu ukwokwo ulwa, na tuwiŋ-tu-uwaŋna to hwoŋno, ibɛ kaa shɛ tu'wo ti yebi.

⁹Nazhɛ butumwa-ba-azuba bu ko na ashashɛ atumwa-azuba ata ecenje a na 'yajɛ shikolo sha ata tishikpe tu umɛwɛɛ ti cenje ti shini, zhajɛ pi mi, bɛɛ n hiɛŋ, Zhajɛ epe, maa Mo bu mbisono biyikwo ata bu ufwo; ubwa shɛ Biyikwo bi Yɛu-ụgwụdụ ata.

¹⁰Bee n shepi na amɛ Mpiala bee zhe no ofwo bilegbe bu ko bụ 'wụtụ, bee m mbiseni ụshɛpwụ ata tijilo, na shɛ Jɛrusalɛm, tu waa banɛ na azuba no olugwo Agwatana wee zwe.

¹¹Ụjɛrụma wa Agwatana wa ta na amɛ ubwa; uhioko-uhwaŋna ubwa ụ shɛ gana utayɛ wo ogwumishi, gana utayɛ ujaspa, u namɛ shɛshɛshɛ gana ukwuristali.

¹²Uba ubwa njɛshɛ, waa 'yajɛ shidubo umpwa-na-shɛba-shi-yebi, atumwa-azuba umpwa-na-ba-eyebi namɛ no shidubo sha ata. E 'nyetenji nzeci ma alamụ Isrɛl umpwa-na-ba-eyebi no shidubo sha ata.

¹³Shidubo shɛ tatụ shɛ namɛ geri bu uwaŋna-banụ, shidubo shɛ tatụ shɛ namɛ tuzuba, shidubo shɛ tatụ shɛ namɛ tuta, shidubo shɛ tatụ shɛ namɛ geri bu uwaŋna-twonuo.

¹⁴Uba ụshɛpụ ata 'yajɛ okoshilo umpwa-na-ba-eyebi, no okoshilo ata ee 'nyeci nzeci ma atumwa Yɛu-ụgwụdụ ata umpwa-na-ba-eyebi.

¹⁵Butumwa ata ba azuba ba njɛ ne mi, 'waŋnɛ bimenji be bininjidegbe ba azhɛnarɛya, maa manga ụshɛpwụ ata, to shidubo shɛ bwa tu uba ubwa.

¹⁶Ụshɛpwụ ata 'yajɛ apada eneshi a na nangatagwụ. Ụnjɛswa ubwa nangwụ nu uholo ubwa. Bee menji ụshɛpwụ ata ne bininjidegbe ata, waa namɛ ɛmɛli akpakwụ-ecenje-ni-dipi-iyebi (1,500). Ụnjɛswa ubwa, tu uholo ubwa, tu uzoto ubwa nangwụ.

¹⁷Bee menji uzoto uba ubwa,[55] waa namɛ avwuna kpakwụ, (200) na shɛ bimenji ba bụtụ, ibɛ shɛ bimenji ba butumwa ata ba azuba.

¹⁸O mo uba ubwa nu ujaspa, ama na azhɛnarɛya na namɛ rụmbɛɛ, gana irɛtɛ i tụrụmbɛɛ, aba oo mo ụshɛpwụ ata.

¹⁹A njɛ okoshilo uba ụshɛpwụ ata tisemberi na atayɛ ogwumishi gɛnɛgɛnɛ. Una uhiiŋ ụ shɛ ujaspa, una uyebi ụ shɛ usafaya, una ụtatụ ụ shɛ agati, una uneshi ụ shɛ ɛmeraledi,

²⁰una utana ụ shɛ usadonikis, una ucihiŋ ụ shɛ kanelian, una ucenje ụ shɛ ukurusolet, una ụtụndatụ ụ shɛ ubɛruli, una ucinjishi ụ shɛ utopaz; una u'umpwa ụ shɛ ukurusopurasi; una u'umpwa-nu-boo-ko ụ shɛ ujasint; una u'umpwa-nu-ba-uyebi ụ shɛ amɛtusit.

²¹Shidubo sha ata umpwa-na-shɛba-shi-yebi shɛ shɛ ɛpɛrula umpwa-na-ba-eyebi. Odubo odubo a shɛ upɛrula uko. Uhwaŋna ụshɛpwụ ata ụ shɛ azhɛnarɛya na namɛ rụmbɛɛ gana irɛtɛ nɛ hieci uhwaŋna tebiye.

²²N kwụbɛ shɛ umwono wa Agwatana na amɛ ubwa o, iwɛnɛ ta Agwangwama na shɛ Agwatana na Hwuri Kpaaŋ, keeni Yɛu-ụgwụdụ ata, a shɛ umwono ubwa.

²³Ukekeshi uwaŋna kwo kaa upiana njɛ shɛ ụshɛpwụ ata maa na ta nu bwa o; iwɛnɛ tu ụjɛrụma wa Agwatana wa pana uŋ uhioko-uhwaŋna, Yɛu-ụgwụdụ ata kaa ubwa shɛ ụsụtụla ubwa.

²⁴Edenji zhɛ no rungo nu uhioko-uhwaŋna ubwa; shɛgwuma shi unyizo kaa shi zhɛ she suje ụjɛrụma wa aba keeni tumuna ta aba, o zwono na amɛ ubwa.

²⁵A zha shɛ na kapanga shidubo shɛ bwa nu uwaŋna kwukwuŋ; iwɛnɛ tu ụjita zha shɛ wo sho apata kwukwuŋ.

²⁶Ɛ zhɛ e suje ụjɛrụma keeni tumuna te edenji o zwono na amɛ ubwa.

²⁷Ama iyi elele nɛ zasa shɛshɛshɛ zha shɛ yo tono na amɛ ubwa kwukwuŋ, okwo atwa na a nda iyi-tupwaŋ, te ejwe-ụzagwụ; semi atwa na ee 'nyeci nzeci ma aba nu utakada uraiŋ Yɛu-ụgwụdụ ata kiri.