Read bassa N-NDUMWA TƐKAPƐSHƐNGA 22 Bible Online

N-NDUMWA TƐKAPƐSHƐNGA 22 - bassa bible

N-NDUMWA TƐKAPƐSHƐNGA 22

¹Nazhɛ bee m mbiseni meni mu Urefu uraiŋ, tu maa banɛ ni idwɛtwɛ ya Agwatana keeni inɛ Yɛu-ụgwụdụ ata. Mu namɛ rụmbɛɛ, maa cɛnjɛmɛ taawụụ gana ukurustali.

²Ụ'wụ'wụ uraiŋ shikeni ne[56] rishe ru uhwaŋna ụshɛpwụ ata, keeni ụpalanụ Urefu ata zalụ hweehwe, na wa 'wala tụ'walụ umpwa-na-tuba-ti-yebi, upiana upiana waa 'wala tụ'walụ tu bwa. Ambɛ ụ'wụ'wụ ata a shɛ iwɛ tɛnɛnjɛ te edenji.

³Unu-tukalana zha shɛ wa nama ya kwukwuŋ, semi idwɛtwɛ ya Agwatana keeni inɛ Yɛu-ụgwụdụ ata kiri i zhɛ ya nama na amɛ ubwa. Miaụŋ-mu-ugondu ubwa mi zhɛ mu na zhɛba bụ.

⁴Ɛ zhɛ na kwụba ụpɛshɛka ubwa, ɛɛ zhɛ a 'nyata kaa izeci ibwɛ nu ntuno ma aba.

⁵Ụjita zha shɛ wo sho ya kwukwuŋ, ukekeshi uhioko-uhwaŋna ụsụtụla keeni uhioko-uhwaŋna uwaŋna zha shɛ wa nda aŋ ya o. Agwangwama na shɛ Agwatana, ubwa zhɛ no hiokono aŋ uhwaŋna, ɛ zhɛ a ya tugwama tutu unyizo-nom.

⁶Nazhɛ butumwa ata ba azuba n hiɛŋ, Iwɛ gɛ i shɛ iwɛ tɛcara keeni iwɛ-tɛkana. Agwangwama na shɛ Agwatana na 'yajɛ mpiala mu na egesere a duma n-ndumwa, tumwanɛ butumwa bwa ba azuba utumwa maa mbisono miaụŋ-mu-ugondu ubwa iyi nɛ i shɛ tilɛɛ maa i zhɛ ya nda kakayɛ.

⁷Hioko ma, Gamba ta me ci kakayɛ, bụtụ na ba untangana iwɛ tiseyida tu utakada ga, gwoje.

⁸Gamba ga Jon, n hwụjɛ ijɛ, Ngaa kwụbɛ iŋ du. Aka na tu Ngaa hwụjɛ, Ngaa kwụbɛ iŋ, Ngee leyi ni ivwunɛ butumwa ata ba azuba na m mbiseni iŋ, maa mo kwuzo ma zhɛba bụ.

⁹Ama bi n hiɛŋ, Awo, ta nda inɛ ɛtɛ o! Atuba na bu tɛ shɛ miaụŋ-mu-ugondu, tɛ shɛ miaụŋ-mo-bino mu na mɛ shɛ egesere, keeni atwa na kaa a untangana n-ndumwa mu utakada ga, ga shɛ Agwatana abɛ zhɛbɛ.

¹⁰Bɛɛ n hiɛŋ, Ta swana n-ndumwa mi tigesere tu utakada ga o, iwɛnɛ ta aka gwumwongonu ya.

¹¹Ga bụtụ na zasa ririri, na ta tuhwulo nu uzawa tiririri tu bwa waa, ga bụtụ na 'yajɛ ahaŋsa tiri, na ta tuhwulo na ahaŋsa ubwa tiri waa, ga bụtụ tiririri na ta tuhwulo ne tiririri tu bwa waa, ga bụtụ bi tijilo ba Agwatana, na ta tuhwulo ne tijilo tu bwa waa.

¹²Hioko ma, Gamba ta me ci kakayɛ; ule mu namɛ ni i'ɛlɛ mi, maa Ma pana bụtụ bụtụ te teni cɛŋ nu ugondu na baa njɛ.

¹³Gamba n shɛ Alfa keeni Omɛga,[57] bụtụ bi hiiŋ, na bụtụ bu umɛwɛɛ, Umozhingo keeni Ukwunanga.

¹⁴Atwa na nyashɛnjɛ otogwo aba,[58] iwɛ maa a 'yaga ụhwada ụ'wụ'wụ ata uraiŋ, maa e teni no shidubo e zhe nu ụshɛpwụ ata gwoje.

¹⁵Ama shiwawa, ne ekwupenyi, na anjɛ-tuwɛle, na akwụnɛ-atwa, na anjɛ-tuwa, na atwa elele na lubi ụzagwụ a na kaa a dwa ụŋ, aba zhɛ a nama no tupohondo tu ụshɛpwụ ata.

¹⁶Gamba ge Jisus N tumwanɛ butumwa mi ba azuba maa la ijɛ tiseyida no ofwo hiŋ na shɛ tu'ulwatagwụ-tụ-ụhiɛŋshɛ-Agwangwama. Gamba n shɛ bini keeni ụlamụ Devid, Unagbajɛ ata wa ta raawụụ na aasavwungwa.

¹⁷Tu Mpiala keeni biyikwo ata bu ufwo hiɛŋ, Zhajɛ! Bụtụ na hwụjɛ, gɛ bi nɛ hiɛŋ, Zhajɛ! Bụtụ na i'uyɛ gwụmɛ, ga zhajɛ; bụtụ na yaa kwụlanɛ, ga lashɛga meni mu uraiŋ arahaŋ.

¹⁸Ma tɛtagana bụtụ be elele na hwụjɛ n-ndumwa mi tiseyida tu utakada ga unu; maa yaa shɛ bụtụ be elele ba kaana inyɛ iyi nu bwa, asha Agwatana zhɛ a kaana bu du tishikpe tu na ti 'nyeci nu utakada ga.

¹⁹Bụtụ be elele na kaa ba munanana n-ndumwa mi tigesere tu utakada ga, asha Agwatana zhɛ a munanana du urobwo ubwa nu ụ'wụ'wụ ata uraiŋ keeni una ụshɛpwụ ata tijilo keeni iyi nɛ ee 'nyeci nu utakada ga.

²⁰Bụtụ na ba duma n-ndumwa mu ga hiɛŋ, Iiŋ, Gamba ta me ci kakayɛ. Ami! Oo Agwangwama Jisus, zhajɛ!

²¹Go tulubo-ti-biye ta Agwangwama tu[59] Jisus Krast tu nama ne hiŋ[60] hwɛɛ. Ami!