Read bassa N-NDUMWA TƐKAPƐSHƐNGA 3 Bible Online

N-NDUMWA TƐKAPƐSHƐNGA 3 - bassa bible

N-NDUMWA TƐKAPƐSHƐNGA 3

¹'Nyatana butumwa bu tụ'ụlwa-tụ-ụhiɛŋshɛ-Agwangwama tu na tu namɛ nu Sadis utakada, hiɛŋ bụ, Bụtụ ata 'yajɛ Mpiala ma Agwatana mi cenje,[17] na kaa 'yajɛ mkpasu mi cenje, ubwa ba duma iwɛ gɛ; bi hiɛŋ, M mepi ugondu bu gom, maa bi 'yajɛ izeci, abu 'yajɛ du uraiŋ, ama bɛ shɛ kaa ru'wo.

²Zhinjɛ, maa shikicinji ijɛ ɛtɛ vwɛ i zhɛ tu'wo dimi. Iwɛnɛ po N ta kwụbɛ shɛ tu ugondu bu ulwa ne she Agwatana mi o.

³Ibɛ po ne teyinje gana na te ebi leshiji, keeni gana na ta abụ hwụjɛ, maa untangana iŋ, maa jɛshɛrɛjɛ-ahaŋsa. Yaa shɛ abu zhɛnjɛ shɛ, N zhɛ ma zhajɛ pụ bụ gana buzundo, bi zha shɛ ba mapa aka na Eme ci pụ bụ o.

⁴Ama hi 'yajɛ du atwa na twa sụ ufwugwo na amɛ Sadis, a na njɛ shɛ otogwo aba tiri; aba zhɛ na zha tahaŋnụ ne mi no otogwo na cɛnjɛmɛ paawụụ, iwɛnɛ ta a lanɛ.

⁵Bụtụ na lasụ, ubwa ɛɛ zhɛ o urugono otogwo ata cɛnjɛmɛ paawụụ. N zha shɛ kwukwuŋ ma wafwaga izeci ibwɛ nu utakada uraiŋ.[18] N zhɛ kaa ma la bụ tiseyida ne eshe Bishi mi, te eshe atumwa ubwa azuba du.

⁶Bụtụ na 'yajɛ acɛbɛ, ga bu na hwuga iwɛ nɛ Mpiala mo mbiso tụ'ụlwatagwụ-tụ-ụhiɛŋshɛ-Agwangwama.

⁷'Nyatana butumwa bu tụ'ụlwa-tụ-ụhiɛŋshɛ-Agwangwama tu na tu namɛ ni Filadɛlfia utakada, hiɛŋ bụ, Bụtụ ata bi tijilo, na shɛ bụtụ bɛ tɛkana, na kaa 'yajɛ i'ilɛ-isɛhwɛ[19] Devid, ubwa na ba kapɛshɛnga, i zasa bụtụ na eri ba kapa, ubwa na ba kapa, i zasa kaa bụtụ na eri ba kapɛshɛnga, ubwa ba duma iwɛ gɛ, bi hiɛŋ:

⁸M mepi ugondu bu gom, hioko, M bu shilwonuo odubo ata kapɛshɛngwawa, na zasa kaa bụtụ na eri ba kapa aŋ. Okwo ta abi 'yajɛ ukpahiŋ cwɛŋ bana, bu untanganɛ kaa iwe mi, bi teri shi kaa ashamanjɛ Izeci mi o.[20]

⁹Hioko, N zhɛ ma nda atwa na shɛ urubwo Setan, a na hiɛŋ maa a shɛ Eju, a na kaa shɛ shɛ Eju, ama a dwa-cibɛ. Hioko, N zhɛ ma nda aŋ maa a zhajɛ o bu kwuzono nɛ ɛvwɛvwɛjɛ bụ, maa e mepi maa M bu lubi.

¹⁰Gana na ta abu untanganɛ unu-tupana mu ni isɛbwɛ-ti'ima, N zhɛ ma bu untangana du maa kede teni auwa tumanga tu na ta jala maa tu vwuteni atwa unyizo hwɛɛ, maa ti menji aŋ o.

¹¹Hioko, Gamba ta me ci kakayɛ, untangana iyi nɛ abu 'yajɛ dimi, iwɛ maa kede bụtụ be elele leshiji udara bu o.

¹²Bụtụ na lasụ, N zhɛ ma nda bu utukpa nu Umwono wa Agwatana mi, bi zha shɛ ba bana ya apata kwukwuŋ. N zhɛ ma 'nyata izeci ya Agwatana mi na tu'waba tu bwa, keeni izeci ụshɛpwụ wa Agwatana mi, ibɛ shɛ Jɛrusalɛm ufwo, na banɛ na azuba no olugwo Agwatana mi na kezhe, N zhɛ ma 'nyata du izeci mi ifwo na tu'waba tu bwa.

¹³Bụtụ na 'yajɛ acɛbɛ, ga bu na hwuga iwɛ nɛ Mpiala mo mbiso tụ'ụlwatagwụ-tụ-ụhiɛŋshɛ-Agwangwama.

¹⁴'Nyatana butumwa bu tụ'ụlwa-tụ-ụhiɛŋshɛ-Agwangwama tu na tu namɛ nu Laodisia utakada, hiɛŋ bụ, Bụtụ ata shɛ Ami,[21] na shɛ useyida tɛcara, nu una tɛkana, na kaa shɛ umozhingo iyi nɛ Agwatana karɛ,[22] ubwa ba duma iwɛ gɛ, bi hiɛŋ.

¹⁵M mepi ugondu bu gom, maa bi lemi shi, bu vwengenji shi kaa. I ga ma kwulana maa lemi, shibwonu vwongongo!

¹⁶Iwɛ ecilo ata, N zhɛ mɛ bi 'nyɛ nu unu mu, iwɛnɛ ta abu namɛ dere dere, bi lemi shi, bu vwengenji shi kaa o.

¹⁷Iwɛnɛ tɛ ɛbi hiɛŋ, N shɛ bɛzhɛgba, uduciya mu kaa wa kaana ugombo, ukekeshi iyi elele n njɛ shɛ o. Bi mepi shi maa bɛ shɛ bụtụ ba amɛ-tụhaŋtụ, na bụtụ bi tinyɛmɛnyɛmɛ, no bukofwo, no olubo, na bụtụ bu mohondo.

¹⁸Mo bu mbiso maa so azhɛnarɛya na ulwa nyashɛnjɛ shɛshɛshɛ ni i'ɛlɛ mi, iwɛ maa shɛ bɛzhɛgba, maa so otogwo acɛnjɛ iwɛ maa urugono, maa kede ezuye mohondo bu banɛ caakwụ o, maa so unibi we eshe maa shananjɛ ne eshe bu iwɛ maa kwụbɛ uhwaŋna.

¹⁹Gamba mɛ vwɛ atwa elele na Omo lubo uvwi, Omo mbisogono du shihaŋsa sha aba iwɛ. Iwɛ ecilo ata, na zhɛgɛdana iwɛ, maa jɛshɛrɛjɛ-ahaŋsa.

²⁰Hioko, N shikeni no odubo, Ama pa ukpa iyi, yaa shɛ bụtụ be elele hwụjɛ rụhwụŋ ri mi, bee kepishinji odubo, N zhɛ mo tono pu bwa, maa Ma ya iyimɛyɛ nu bwa, ubwa du kaa zhɛ ba ya iyimɛyɛ ne mi.

²¹Bụtụ na lasụ, N zhɛ ma pana bu ohwolu maa gɛga ne mi ni idwɛtwɛ mi, gana na tu Ngaa lasụ, Ngaa jɛjɛ ne Bishi mi ni idwɛtwɛ ibwɛ.

²²Bụtụ na 'yajɛ acɛbɛ, ga bu na hwuga iwɛ nɛ Mpiala mo mbiso tụ'ụlwatagwụ-tụ-ụhiɛŋshɛ-Agwangwama.