Read bassa N-NDUMWA TƐKAPƐSHƐNGA 7 Bible Online

N-NDUMWA TƐKAPƐSHƐNGA 7 - bassa bible

N-NDUMWA TƐKAPƐSHƐNGA 7

¹Na aba inɛ gɛ, Ngaa kwụbɛ ta atumwa-azuba eneshi shikekeni ne esugwulumi unyizo eneshi, aa untanganɛ mpiala mu unyizo mi neshi, iwɛ maa kede mu vwunji nu unyizo, okwo ni itekwu, kwo kaa nu ụ'wụ'wụ we elele o.

²Ngaa kwụbɛ ta butumwa-ba-azuba bi nya mwe geri bu uwaŋna-banụ, baa 'waŋnɛ useyida wa Agwatana na shɛ buumwa. Baa uganɛ na rụhwụŋ rụ 'wụtụ, baa suyanɛ atumwa-azuba ata eneshi a na ee peni ụhwada maa a gwụcɛnjɛ unyizo keeni itekwu, bɛɛ hiɛŋ aŋ,

³Ta gwụcɛnga ma unyizo, okwo itekwu, kwo kaa i'wɛ'wɛ, uuwa i ci aka na atɛ njɛ miaụŋ-mu-ugondu Agwatana tu useyida nu ntuno ma aba o.

⁴Ngaa hwụjɛ ufwugwo wa atwa na banɛ na alamụ miaụŋ mi isrɛl hwɛ hwɛɛ, a na aa njɛ useyida, ufwugwo wa aba ụ shɛ igbɛɛ-dupu-nu-woshi-ni-bɛ-iyebi. (144,000)

⁵Atwa igbɛɛ-icihiŋ (12,000) aa njɛ useyida nu ụlamụ Juda; atwa igbɛɛ-icihiŋ aa njɛ useyida nu ụlamụ Rubɛn; atwa igbɛɛ-icihiŋ aa njɛ useyida nu ụlamụ Gad;

⁶atwa igbɛɛ-icihiŋ aa njɛ useyida nu ụlamụ Ashɛ; atwa igbɛɛ-icihiŋ aa njɛ useyida nu ụlamụ Naftali; atwa igbɛɛ-icihiŋ aa njɛ useyida nu ụlamụ Manasɛ;

⁷atwa igbɛɛ-icihiŋ aa njɛ useyida nu ụlamụ Simion; atwa igbɛɛ-icihiŋ aa njɛ useyida nu ụlamụ Livai; atwa igbɛɛ-icihiŋ aa njɛ useyida nu ụlamụ Isaka;

⁸atwa igbɛɛ-icihiŋ aa njɛ useyida nu ụlamụ Zabulon; atwa igbɛɛ-icihiŋ aa njɛ useyida nu ụlamụ Josɛf; atwa igbɛɛ-icihiŋ aa nje useyida nu ụlamụ bɛnjamin.

⁹Na aba inɛ gɛ, Ngaa mbiyanɛ, Ngaa kwụbɛ atwa ofwugwo ụ'wụtụ, a na zasa bụtụ na eri ba rɛta aŋ, ta a banɛ na alamụ elele, na atwa elele, na rɛjɛmɛ re elele, ee shikekeni nu umbe idwɛtwɛ ɛtɛ, keeni umbe Yɛu-ụgwụdụ ata, ee uregeni otogwo acɛnjɛ, aa 'wananjɛ abaga ishiwɛ ni i'ɛlɛ ya aba.

¹⁰Aa uganɛ na rụhwụŋ rụ 'wụtụ, ɛɛ hiɛŋ. Agwatana tu, na jɛjɛ ni idwɛtwɛ ɛtɛ, ubwa 'yajɛ ubino, keeni Yɛu-ụgwụdụ ata!

¹¹Nazhɛ atumwa-azuba ata hwɛɛ shikekeni oo rungwutwonu idwɛtwɛ ɛtɛ, oo rungwutwonu du n-nyarɛ ma ata, keeni iyi-uumwa ɛtɛ ineshi. Aa 'waŋ na cɛnjɛ, ee kwuji shishe sha aba nu umbe idwɛtwɛ ɛtɛ, ee kwuzeni Agwatana,

¹²ɛɛ hiɛŋ, Ami! Ge tizhemonjino tɛ shɛ ma tu Agwatana tu, tu ụjɛrụma, ta ti'inta, tu ugwoje tɛnda, ta tumuna, tu ukpahiŋ keeni ikɛnyi, tutu unyizo-nom. Ami!

¹³Nazhɛ bụtụ bu ko na ashashɛ n-nyarɛ ma ata, n heŋteni, bɛɛ hiɛŋ, Ataaba na kwuŋ uregeni otogwo ga acɛnjɛɛ? Cee kwuŋ aa banɛɛ?

¹⁴Ngɛɛ jishijɛ bụ, Ngɛɛ hiɛŋ, Iyɛri, gabụ bi mepi aŋ tebiye. Bɛɛ n hiɛŋ, Atwa ga banɛ nu ụbaụta ata ụ'wụtụ, a nyashɛngwa otogwo aba ne mehieŋ mi Yɛu-ụgwụdụ ata maa a cɛnjɛmɛ.

¹⁵Iwɛbɛ po aa namɛ nu umbe idwɛtwɛ gɛ ya Agwatana, aa ndana bu iyi tu uwaŋna tu ụjita nu umwono ubwa. Ibɛ po bụtụ ata jɛjɛ ni idwɛtwɛ ɛtɛ zhɛ bo ubo aŋ udulo ubwa u tugwuno.

¹⁶Ti imunɛ, ti i'uyɛ zha shɛ ya gwuma aŋ ya kwukwuŋ, tu uwaŋna zha shɛ wa ta aŋ ya o, okwo oholobwo elele zha shɛ a ima aŋ ya o.

¹⁷Iwɛnɛ po Yɛu-ụgwụdụ nɛ namɛ na ashashɛ idwɛtwɛ ɛtɛ, ubwa zhɛ na nda u'iywa wa aba, ubwa du zhɛ ba zarɛga aŋ no ofwo umɛzhinjɛ meni mu uraiŋ. Agwatana kaa zhɛ a wafwaga malaba me elele ne shishe sha aba.