Read bassa N-NDUMWA TƐKAPƐSHƐNGA 8 Bible Online

N-NDUMWA TƐKAPƐSHƐNGA 8 - bassa bible

N-NDUMWA TƐKAPƐSHƐNGA 8

¹Aka na ti bee kepishinji useyida ucenje, azuba namɛ shiruu gana ashashɛ auwa.

²Nazhɛ Ngaa kwụbɛ atumwa-azuba ecenje te e shikekeni nu umbe Agwatana; ee peni aŋ akakacɛ ecenje.

³Nazhɛ butumwa-ba-azuba bi nya zhajɛ bee shikeni to dongonu utukwu-ụrụpɛ, ba 'waŋnɛ iyi-uhwugwa iturɛre tuzwono. Nazhɛ ee peni bu iturɛre i'wɛtwɛ, iwɛ maa togwu iŋ na shidua sha atwa tijilo Agwatana hwɛɛ, nu utukwu ata ụrụpɛ wa azhɛnarɛya na namɛ nu umbe idwɛtwɛ ɛtɛ.

⁴Ibɛ nshikwo mi iturɛre ɛtɛ keeni shidua sha atwa ata tijilo, mi beni nu u'ala butumwa ata ba azuba, mee munji nu umbe Agwatana.

⁵Nazhɛ butumwa ata ba azuba shepi iyi-uhwugwa ɛtɛ i shɛ iwɛ iturɛre tuzwono, bee suji ulwa utukwu-ụrụpɛ, bee shidinji iŋ pɛmi, baa 'wɛŋ uŋ nu unyizo. Nazhɛ uto, na rụhwụŋ, nɛ ɛbɛrɛ, keeni cɛnjɛ tizhingotu 'wa inɛ ɛtɛ.

⁶Nazhɛ atumwa-azuba ecenje a na ga 'waŋnɛ akakacɛ, mama 'imɛ maa e hwuri akakacɛ aba.

⁷Bu na bi hiiŋ hwulupeni ukakacɛ ubwa, ibɛ atayɛ-eshilo keeni ulwa na hiŋtotongwu ne mehieŋ banɛ, ɛɛ 'wɛŋ iŋ nu unyizo. Ibɛ po upada ụtatụ unyizo hwoŋni kwunduu, keeni upada ụtatụ i'wɛ'wɛ hwoŋni kwunduu, ambɛ elele hwoŋni kwunduu.

⁸Nazhɛ butumwa-ba-azuba bi yebi hwulupeni ukakacɛ ubwa, yaa shɛ gana maa ulwa wo hwoŋzhingo ishɛmɛ ike i'wɛtwɛ, ee keri iŋ ni itekwu. Nazhɛ upada ụtatụ itekwu jɛshɛrɛjɛ mehieŋ.

⁹Ibɛ po upada ụtatụ iyi-uumwa nɛ baa karɛ nɛ zweni ni itekwu 'wi. Yaa njɛ upada ụtatụ ihiɛŋtu ufwu.

¹⁰Nazhɛ butumwa-ba-azuba bu tatụ hwulupeni ukakacɛ ubwa; nazhɛ ikpɛsu ike i'wɛtwɛ layɛ na cɛnjɛ, yoo hwoŋno gana amwa-ulwa; yee leyi nu upada ụtatụ we erefu, keeni ɛmɛzhinjɛ meni.

¹¹Ɛ hiɛŋ izeci ikpɛsu ɛtɛ, Bugasa, ibɛ upada ụtatụ meni mɛ shɛ gana bugasa.[23] Atwa ofwugwo 'wi iwɛ meni ma ata, iwɛnɛ tu maa gagwụmɛ.

¹²Nazhɛ butumwa-ba-azuba bi neshi hwulupeni ukakacɛ ubwa; ibɛ ee jibi upada ụtatụ uwaŋna, keeni upada ụtatụ upiana, keeni upada ụtatụ mkpasu, iwɛ maa ga upada wa aba ụtatụ ụ shɛ tishi, iwɛ maa kede uhioko-uhwaŋna banɛ nu upada ụtatụ uwaŋna o, gobwonu du tu upada ụtatụ ụjita.

¹³Tu Ngaa ngbaracɛ, Ngaa hwụjɛ tu ugbeji uko hiɛrɛ na ashashɛ azuba, waa uganɛ na rụhwụŋ rụ 'wụtụ, wɛɛ hiɛŋ, Atwa na namɛ nu unyizo zhɛ a nda adangboo! Adangboo! Iwɛ rụhwụŋ ra akakacɛ atumwa-azuba atatụ a na ta vwɛ, maa e hwuri akakacɛ aba.