Read bassa N-NDUMWA TƐKAPƐSHƐNGA 9 Bible Online

N-NDUMWA TƐKAPƐSHƐNGA 9 - bassa bible

N-NDUMWA TƐKAPƐSHƐNGA 9

¹Aka na ta butumwa-ba-azuba bu tana hwulupeni ukakacɛ ubwa; Ngaa kwụbɛ ti ikpɛsu ya azuba layɛ nu unyizo, ee peni iŋ i'ilɛ-isɛhwɛ u'ibwa ata zasa uce.

²Nazhɛ ikpɛsu ɛtɛ kepishinji u'ibwa ata zasa uce, nshikwo mu banɛ nu u'ibwa ata, mee munji gana nshikwo mu ujigo ụ'wụtụ 'wụtụ. Ibɛ po nshikwo mu u'ibwa ata mu kwụnɛ uwaŋna keeni mpiala mu uvwugo maa shɛ tishi.

³Nazhɛ ovworo banɛ nu nshikwo ma ata, ee teni nu unyizo. Ee peni aŋ ụhwada gana na shina shi unyizo shɛ 'yajɛ ụhwada wa aba.

⁴Ee mbishi aŋ maa kede a gwụcɛnjɛ ambɛ, kwo kaa iyi ilomu ye elele o, kwo kaa ụ'wụ'wụ we elele o, semi ga shɛ atwa na zasa useyida wa Agwatana nu ntuno ma aba kiri.

⁵E peni aŋ ụhwada maa kede a kwụnɛ atwa ata o, ama ge peni aŋ ụbaụta ụ'wụtụ ipiɛnɛ itɛ. Ụbaụta wa aba ụ shɛ gana ana na to bụtụ.

⁶Atwa zhɛ na jalakaka tu'wo na aka ata, ama a zha shɛ a kwụba tụ kwukwuŋ. I zhɛ ya kwulana aŋ maa e 'wi, ama tu'wo ti zhɛ tu no gozhigono aŋ.

⁷Abu kwụbɛ ovworo ata, a sụbɛ idɛkwɛ nɛ aa imanganjɛ iwɛ ujasa; a shɛ maa a patanganɛ adara azhɛnarɛya no ohiuhiu aba. Apɛshɛka aba sụbɛ apɛshɛka atwa.

⁸Tihiŋzhe ta aba tɛ shɛ gana tihiŋzhe te eyikwo, ene aba a shɛ gana ene izeci.

⁹A 'yajɛ iyi nɛ ee ubegeni na shɛgba sha aba, gana iyi tu'ubono na agba nɛ i shɛ ụshɛmbɛrɛ, rundu ra apiambɛ aba rɛ shɛ gana rundu ri ihiɛŋtu ujasa nɛ idɛkwɛ ya mbata nu usumwa ti yaa sala ujasa.

¹⁰A 'yajɛ etwenyi, keeni ticere gana ticere ta shina. Ne etwenyi ata aba, ụhwada wa aba namɛ maa a gwụcɛnjɛ atwa ipiɛnɛ itɛ.

¹¹A 'yajɛ agwuma na yɛ tugwama ta aba, ubwa shɛ butumwa bu u'ibwa ata zasa uce. Ɛ hiɛŋ izeci ibwɛ ne Rihibru, ga Abadon,[24] ɛɛ hiɛŋ izeci ibwɛ ne Rigrik, ga Apolion.

¹²Adangboo ehiiŋ koshikwo, ama adangboo eyebi te ci ba na aba a na ata.

¹³Nazhɛ butumwa-ba-azuba bi cihiŋ hwulupeni ukakacɛ ubwa, Ngaa hwụjɛ rụhwụŋ ru ko tu raa banɛ na shihiuaŋ shi utukwu-ụrụpɛ wa azhɛnarɛya shi neshi shɛ na shɛ namɛ nu umbe Agwatana,

¹⁴rɛɛ hiɛŋ butumwa ata ba azuba bi cihiŋ na untanganɛ ukakacɛ ata, Tufwurungo atumwa ata wa azuba eneshi ee umpi nu ụpalanụ Urefu ata ụ'wụtụ ɛɛ hiɛŋ, Yufretis.

¹⁵Ee tufwurinji ga atumwa ata wa azuba eneshi a na aa imanganjɛ iwɛ auwa ata, ti iwɛ ụjita ata, ti iwɛ upiana ata keeni iwɛ uywa ata, iwɛ maa a kwụnɛ urubwo ụtatụ wa atwa.

¹⁶Ufwugwo we ejeshi na a suka idɛkwɛ ɛtɛ Ngaa hwụjɛ ụ shɛ igbɛɛ-umpwa orubwo igbɛɛ-itɛ.

¹⁷Gana Ngaa kwụbɛ idɛkwɛ keeni atwa na a suka iŋ ta no ozobu, e ubegeni iyi tu'ubono na shɛgba nɛ shɛ gana ulwa, keeni gana utayɛ wo ogwumishi, keeni tuwiŋ-tu-uwaŋna. Ohiuhiu idɛkwɛ ɛtɛ a shɛ gana ohiuhiu izeci; ulwa keeni nshikwo keeni tuwiŋ-tu-uwaŋna wa banɛ no onu ibɛ.

¹⁸Tedure ne tishikpe tu ga tu tatụ, ibɛ shɛ ulwa, nu nshikwo keeni tuwiŋ-tu-uwaŋna na wa banɛ no onu ibɛ, ibɛ yaa kwụnɛ urubwo ụtatụ wa atwa.

¹⁹Ukpahiŋ idɛkwɛ ɛtɛ namɛ no onu ibɛ keeni ne etwenyi ibɛ. Etwenyi ibɛ a shɛ gana ahwa, etwenyi ata 'yajɛ ohiuhiu; ne etwenyi ata aa gwụcanga atwa.

²⁰Atwa na vwɛ a na tishikpe ti ga tu kwụnɛ shɛ, a jɛshɛrɛjɛ shɛ kaa shihaŋsa sha aba maa e genji ugondu i'ɛlɛ ya aba, keeni atumwa-ibiri tukwuzono, keeni tuwa tu na aa njɛ na azhɛnarɛya keeni azụrụfa, na atayɛ, ni i'wɛ'wɛ; nɛ kaa eri shi ya kwụba uhwaŋna, nɛ hwụjɛ shɛ iwɛ, nɛ eri shi ya zha tahaŋnụ o.

²¹A jɛshɛrɛjɛ shɛ kaa shihaŋsa sha aba na atwa tụkwụna, keeni tukwupenyi ta aba, keeni tuwɛle ta aba, keeni izunde ya aba o.