Read bassa RUTU 2 Bible Online

RUTU 2 - bassa bible

RUTU 2

¹Bụtụ bu ko namba na shɛ udenji bwolo Naomi, bụtụ ata kaa shɛ bɛzhɛgba bụ'wụtụ, baa shɛ kaa bụtụ bu umwamwa Ilimɛlɛk. Ɛ hiɛŋ izeci ibwɛ go Boaz.

²Jitoo ko go Rutu Bumoab ata hiɛŋ Naomi, N leneni kaa maa mo ipo ne ehilo bụtụ na iwɛ mi zhɛ ya kwulana maa ma 'wa bụ mu na nda tumwata. Ga Naomi hiɛŋ bụ, Ɛ-yɛu mi, zhaga.

³Baa sanɛ ga, bee ci ehilo, baa 'wa atwa na a dwa iyimɛyɛ ɛtɛ ne ekwunyi baa nda tumwata. Mashaka ne ehilo Boaz na shɛ bụtụ bu umwamwa Ilimɛlɛk bee zhe.

⁴Na aba ibɛ go Boaz banɛ ni Bɛtlɛhɛm bee ipe, baa 'walụ ejwe iyimɛyɛ ɛtɛ, bɛɛ hiɛŋ aŋ, Ga Agwatana nama ne hiŋ. Ɛɛ jishijɛ bụ, ɛɛ hiɛŋ, Ga Agwatana ubu peni uwebiye.

⁵Go Boaz heŋteni iyɛri ye ejwe iyimɛyɛ ɛtɛ ibwɛ, bɛɛ hiɛŋ, Gaaba 'yajɛ owo gaa?

⁶Iyɛri ye ejwe iyimɛyɛ, jishijɛ bụ, bɛɛ hiɛŋ, Yɛu-yo-o ya Amoab, nɛ banɛ na cɛnjɛ tu Moab i zhagajɛ na Naomi ta kaa.

⁷Baa n lụpɛ, bɛɛ hiɛŋ, N leneni kaa maa ma 'wa ejwe iyimɛyɛ ne ekwunyi maa mu na nda tumwata, maa mu no sugo du a na ata a 'waŋtatangwụ no ofwo ata eshi tilegeni. Ibɛ po bee teni ne ehilo ga be kwuni ugondu te kwuni taa nu uvwungwa hwayɛ tutu i ci aka ga, semi aka oko kiri baa ga jɛjɛ nu uhuŋnu, boo to ụhinjanụ cwɛŋ.

⁸Nazhɛ go Boaz hiɛŋ Rutu, Ɛ-yɛu mi, shɛlaga, Ta zhaga ya tumwata ni itimɛ i nyɛ, maa genji epe o. Nama ya epe maa na nda ugondu na miaụŋ mu ga mi mi mu ugondu mo o.

⁹Shiyono itimɛ gɛ eshe maa na ngbaraka ofwo ata etwenyi a dwa iyimɛyɛ, maa na 'wa miaụŋ-mo-o. N tutwagwanua etwenyi ga unu maa kede e bi timengeni o. Aka na i'uyɛ ibu gwụmɛ hwayɛ zhaga swa meni ma ata etwenyi sarɛ ee shi no shikoko.

¹⁰Go Rutu kwuzhi boo to itune na cɛnjɛ, bɛɛ hiɛŋ bụ, Iwembe kwuŋ po iwɛ mi ibu kwụlanɛ i ci gana gaa? Iwembe po ebu m mepeni iwɛ tu Ngaa shɛ bugaiiŋ?

¹¹Go Boaz jishijɛ bụ, bɛɛ hiɛŋ, E m mbishi iyi elele nɛ abụ ndanɛ bino-bwolo bu, te kwuni aka na to bwolo bu 'wi, keeni gana na ɛbi gɛnjɛ bishi bu keeni bino bu keeni cɛnjɛ tụ na ee bi meci abụ zhajɛ no ofwo atwa na ebi te mepi shi la kwukwuŋ.

¹²Ga AGWANGWAMA ụ bụ cɛpɛ titeni ti iyi nɛ abɛ njɛ. Ga AGWANGWAMA na shɛ Agwatana Isrɛl na abụ zhajɛ maa swaka tụta ta apiambɛ ubwa, ubu shidingeni titeni tụ bụ.

¹³Go Rutu hiɛŋ bụ, Iyɛri, bu m mepeni iwɛ tebiye, abụ n ingatanjɛ na n-ndumwa ma amɛ-olom mu na abụ dumanjɛ na bujama ga bụ bo o, okwo ti Ngee ci shi okwo bujama bu bo o bu ko.

¹⁴Aka na ti iyimɛyɛ ci tiya, go Boaz hiɛŋ Rutu, Zhajɛ epe maa yɛ iyimɛyɛ, no hwuŋnongono iŋ ne meni mu ga mi sembi. Baa jɛjɛ ga todongonu ejwe ata iyimɛyɛ. Go Boaz shɛkanɛ bụ ipurɛ ɛtɛ. Go Rutu yɛ uuwa bee shiji, harɛ aa vwanɛ bụ.

¹⁵Gana na ti bɛɛ ishijɛ maa ta tuhwulo ta tumwata. Go Boaz tɛtaganɛ etwenyi ubwa unu, bɛɛ hiɛŋ, Ganga bụ ma maa bu na zanga tutu ofwo ata eshi tilegeni, ta lakana bụ ma o.

¹⁶Aka oko na kalanga ma a na ata shini ni i'ɛlɛ hiŋ na shɛwala iwɛ ubwa, maa bu na zanga, ta tazhɛganɛ bụ ma o.

¹⁷Gana go Rutu njɛ tumwata ni itimɛ ɛtɛ tutu ụrụmɛ ta. Bee jibi a na ata baa mwacɛ, e shini ga ikwureni yo ohiu i ke.

¹⁸Bee shepi bee ji ni ihwɛ, bee mbiseni bino-bwolo bwa anaa na baa mwacɛ. Bɛɛ vwɛ du ipurɛ ɛtɛ ga vwanɛ bụ ti bee ge shije bee peni bu.

¹⁹Bino-bwolo bwa heŋteni bu, bɛɛ hiɛŋ, Cee ɛbi njɛ tumwata hwayɛ gaa? Ne ehilo aba ɛbi njɛ ugonduu? Ga Agwatana peni bụtụ ata ubu mapanɛ iwɛ uwebiye: Go Rutu mbishi bino-bwolo bwa ehilo bụtụ na bɛɛ njɛ ugondu, maa ɛ hieŋ izeci ibwɛ go Boaz.

²⁰Ga Naomi hiɛŋ utashɛ ubwa. Ga AGWANGWAMA na genji shi iwɛ ubwa tumapana atwa na ta hwungwa keeni atwa na uwo, peni Boaz uwebiye. Ga Naomi dumananɛ, bɛɛ hiɛŋ, Bụtụ ata shɛ udenji tu gom gom, bɛ shɛ bụtụ bu ko na ashashɛ atwa na 'yajɛ ụmatụ no tu maa ma tu lashɛganana.

²¹Go Rutu Bumoab ata, hiɛŋ, Inɛɛ nɛ i hwuri hwɛɛ nɛ, bu m mbishi du bɛɛ hiɛŋ, Nama na anjɛ ugondu mu uuwa i ci aka na ee hwuwi iyimɛyɛ mi tudwa hwɛɛ.

²²Ga Naomi hiɛŋ utashɛ ubwa go Rutu, Ɛ-yɛu mi, i zhɛ ma bụ zhɛmana maa na zhagaga no showo shu bwa. Kede a bụ kwụbɛ ya ne ehilo binya bụtụ bu ko, maa a bụ njɛ iyi iwɛ o.

²³Go Rutu uranjɛ ga tugwumwongonu no showo shu Boaz, baa nda tumwata na aba tutu i ci aka na ee hwuwi iyimɛyɛ ɛtɛ ɛɛ hiɛŋ bali keeni wit tudwa hwɛɛ. Baa namɛ kaa no bino-bwolo.