Read bassa RUTU 3 Bible Online

RUTU 3 - bassa bible

RUTU 3

¹Jitoo ko bino-bwolo bwa ga Naomi, hiɛŋ bụ, Ɛ-yɛu mi, N zhɛ ma bụ jalakana ihwɛ maa ibu zhɛmanɛ.

²Go Boaz ata abu namɛ no showo shu bwa, udenji tu baa shɛ. Hioko, bo dubo ba iyimɛyɛ na akpakpata ata nụ ụjita go.

³Dụla meni, maa sukwutwa iturɛre. La tugwuno tụ bụ tu na ti ngezeni ma tụ tụ vwɛ nụ ụzhɛ, maa zwi na akpakpata ata. To lono tuba maa mapa maa bu namba apata uuwa i ci aka na bee hwuwi hwayɛ iyimɛyɛ tiya keeni meni tuswa o.

⁴Aka na bee weci hwayɛ, shiyono ofwo ata bee weci eshe, nazhɛ zhaga ushijigo tugwuno tɛ ɛvwɛvwɛjɛ ubwa maa woto. Nazhɛ bɛɛ zhɛ mo bu mbiso iyi nɛ maa njɛ.

⁵Go Rutu jishijɛ bụ, bɛɛ hiɛŋ, N zhɛ ma nda iyi elele nɛ ebi m mbishi.

⁶Go Rutu zwi ga na akpakpata ata oo dubo iyimɛyɛ, baa njɛ ga iyi elele nɛ bino-bwolo bwa ge mbishi bu hwɛɛ.

⁷Aka na tu go Boaz hwuwi iyimɛyɛ tiya keeni meni tuswa, amɛ ubwa gwuriseni. Bee zhe bee weci nu ukwunanga budakwa bi iyimɛyɛ ɛtɛ. Go Rutu zhe kakayɛ swɛɛ bee ushiji tugwuno tɛ ɛvwɛvwɛjɛ ubwa, bee leyi bee weci.

⁸Aka na te butubwenyi ata meme bitiriji tụ ụjita tudwonu, baa kwụbɛ te biyikwo bu ko weci nɛ ɛvwɛvwɛjɛ ubwa.

⁹Bee heŋteni bu, bɛɛ hiɛŋ, Gabụ gaaba naa? Go Rutu jishijɛ bụ, bɛɛ hiɛŋ, Gamba bujama bụ bo o go Rutu. Barɛshɛga kaa ukwunanga tugwuno tụ bụ maa n urigeni; iwɛnɛ po gabụ bu 'yajɛ ụhwada tɛzhaada tu tu.

¹⁰Go Boaz jishijɛ bụ, bɛɛ hiɛŋ, Ɛ-yɛu mi, ga Agwatana ubu peni uwebiye. Tɛcara tụ bụ na aka ga tu hwuri me ti ti hiiŋ, iwɛnɛ abụ 'wa sụ esemberi, kwo baa shɛ bukofwo okwo kaa bɛzhɛgba.

¹¹Ɛ-yɛu mi, ta nda inyɛsɛ o. N zhɛ ma bụ ndana iyi elele nɛ abụ n lụpɛ. Atwa mi na namɛ nụ ụshɛpwụ ga kpaaŋ mepi maa bɛ shɛ biyikwo na 'yajɛ ahaŋsa ebiye.

¹²Iwɛ-tɛkana ga, maa Gamba N 'yajɛ ụhwada maa ma hi zana tizhaada, ama bụtụ bu ko ta namba na 'yajɛ ụhwada maa ma hi zana tizhaada n hwuri.

¹³Woto tugwo epe nụ ụjita go, yaa shɛ bụtụ ata zhɛ bo lono beyi ga nu uvwungwa maa ma bụ zana tizhaada, asha i zhɛmɛ, ga ma bụ zana tizhaada. Ama yaa shɛ ya kwụlanɛ shɛ bụ maa ma bụ zana tizhaada, asha N to Agwatana na shɛ Buumwa maa N zhɛ ma bụ zana tizhaada. Woto tugwo epe maa iyi heri.

¹⁴Go Rutu weci ga nɛ ɛvwɛvwɛjɛ ubwa uuwa gwu uvwungwa. Ama go Rutu gbatụ ti'ishijɛ tobwolo iyi te suji shi maa e mepi bu o. Go Boaz hiɛŋ, Kede bụtụ be elele mepi maa biyikwo bu ko ga zhajɛ na akpakpata ga o.

¹⁵Go Boaz hiaaŋnanɛ bụ, tufwurinje tugwuno ta ata tụ bụ ta agba, maa berishiji tu. Go Rutu berishiji tu ga, ibɛ bụtụ ata manganganɛ bụ iyimɛyɛ ɛtɛ ne bimenji kpalụ cihiŋ, bɛɛ 'wɛ bụ. Nazhɛ go Rutu shepi aŋ bee ji ni ihwɛ.

¹⁶Aka na tu go Rutu ci bino-bwolo, bɛɛ hiɛŋ bụ, Ɛ-yɛu mi, gana na yaa bụ ndanjɛɛ? Go Rutu mbishi bu iyi elele nɛ go Boaz ndanɛ bụ kpaaŋ.

¹⁷Bee keeni bu timbiso, bɛɛ hiɛŋ, Iyimɛyɛ nɛ du baa m manganganɛ ne bimenji kpalụ cihiŋ, baa m panɛ. Bɛɛ hiɛŋ, to gwulo pe bino-bwolo bu ni i'ɛlɛ yo ohondo.

¹⁸Nazhɛ ga Naomi hiɛŋ bụ, Ɛ-yɛu mi, ima-isɛbwɛ maa kwụbɛ gana na ti iwɛ ɛtɛ zhɛ ya sha. Iwɛnɛ po bụtụ ata zha shɛ ba ta ụhinjanụ hwayɛ ga semi aka na tu baa kwunanjɛ iwɛ ɛtɛ.