Read bassa RUTU 4 Bible Online

RUTU 4 - bassa bible

RUTU 4

¹Go Boaz munji bee zhe no odubo uba ụshɛpwụ ata, baa jɛjɛ apata. Aka na ta bụtụ ata 'yajɛ ụmatụ tizhaada na go Boaz ga jɛmɛ iwɛ ubwa zhɛ tɛkashɛka, go Boaz suyanɛ bụ, bɛɛ hiɛŋ, E-biyejilo mi, vwurɛ epe maa gɛga. Bụtụ ata vwụrɛ ga baa jɛjɛ.

²Go Boaz suje n-nyarɛ mụ ụshɛpwụ ata umpwa, bɛɛ hiɛŋ aŋ, Gɛga ma du epe, aa jɛjɛ ga.

³Nazhɛ bɛɛ hiɛŋ bụtụ ata ga 'yajɛ ụmatụ tizhaada ta aba, Ga Naomi ata banɛ na cɛnjɛ tu Moab u gwure, baa jala kaa maa sanga cɛnjɛ ti yɛu-bino tu gɛ Ilimɛlɛk tu ko.

⁴Ahaŋsa mi kaa m mbishi maa mo bu mbiso iwɛ ɛtɛ, maa so tu ne eshe n-nyarɛ mu ga mi mi mɛ jɛjɛ epe. Yaa shɛ yaa bụ kwụlanɛ maa leshigeneni tu, asha duma, Yaa shɛ kaa abụ zha shɛ, asha m mbishi maa ma mapa. Iwɛnɛ po i zasa bụtụ be elele na 'yajɛ ụmatụ ata namɛ swooŋ na bụ o, Gamba kaa m bu 'wa. Ibɛ bụtụ ata hiɛŋ, N zhɛ ma lashɛganana tụ.

⁵Go Boaz hiɛŋ bụ, Jita na obu so cɛnjɛ ta ata ni i'ɛlɛ Naomi, asha bi zhɛ du ba saanana Rutu, Bumoab ata na shɛ bululo ba bụtụ ata 'wi. Ecilo ibɛ i shɛ maa ishicinjɛ izeci bụtụ ata 'wi ni iyi-yo-ogwu ubwa.

⁶Nazhɛ bụtụ ata ga 'yajɛ ụmatụ tizhaada jishijɛ Boaz, bɛɛ hiɛŋ, Asha N eri shi ma lashɛganana tu o, iwɛ maa kede iyi-yo-ogwu mi njɛ ufwu o. Asha shapa ụmatụ tɛlashɛganana ti mi maa leshigeneni tu iwɛ ikɛnyi bu. N eri shi ma lashɛganana tu o.

⁷I shɛ la iyi uvwovwu ya atwa Isrɛl cala gana na maa e senji iyi kwo kaa maa e sheyinji i'wɛŋnɛ maa iwɛ ɛtɛ i shɛ iwɛ-tɛkana. Asha bụtụ bu ko shɛ bo hwuciko ubida ubwa maa pana bụtụ bi yebi. Nu uhwaŋna ata ibɛ atwa Isrɛl o mbisono maa a kwunanjɛ iwɛ ɛtɛ.

⁸Ibɛ po aka na ta bụtụ ata ga 'yajɛ ụmatụ tɛlashɛganana, hiɛŋ Boaz, Lashɛganana tụ ni ikɛnyi bụ. Nazhɛ bee hwucici ubida ubwa bee peni Boaz.

⁹Nazhɛ go Boaz mbishi n-nyarɛ ma ata keeni atwa na namba apata kpaaŋ, bɛɛ hiɛŋ, Ahiɛba hiɛ shɛ eseyida hwayɛ ga maa N so iyi elele nɛ ga shɛ inɛ Ilimɛlɛk, ti iyi elele nɛ ga shɛ inɛ Cilion keeni inɛ Malon ni i'ɛlɛ Naomi.

¹⁰N zeni du Rutu sasana, ubwa shɛ Bumoab ata shɛ bululo Malon maa sha biyikwo mi. N njɛ inɛ gɛ maa mɛ ishicinjɛ izeci bụtụ ata 'wi ni iyi-yo-ogwu ubwa, iwɛ maa kede izeci ibwɛ 'weji na ashashɛ umwamwa ubwa keeni ụshɛpwụ ubwa o. Ahiɛba kaa hiɛ shɛ eseyida ibɛ hwayɛ ga.

¹¹Nazhɛ n-nyarɛ ma ata keeni atwa na namba no odubo ụshɛpwụ ata kpaaŋ, hiɛŋ bụ, Iiŋ, atuba tɛ shɛ eseyida. Ga AGWANGWAMA njɛ maa biyikwo ga be ci titeni ni ihwɛ bụ i shɛ gana Rechɛl keeni Lia, a na jwe udenji Isrɛl hwɛɛ aba ebeyebi. Ga ibu zhɛmanɛ tuba ni Ɛfrata, maa beni urishi ni Bɛtlɛhɛm.

¹²Ga AGWANGWAMA leni maa miaụŋ mu na bɛɛ zhɛ ma bụ pana tedure no owo ga, mɛ njɛ maa umwamwa bụ shɛ gana umwamwa pɛrɛz yɛu Juda nɛ ga Tama metenji bu.

¹³Go Boaz jicinji Rutu ni ihwɛ ibwɛ, baa shɛ biyikwo bwa. Aka na boo togwu nu bwa, ibɛ AGWANGWAMA njɛ maa la ofubo, bee meci yɛu-ye-eyi.

¹⁴Nazhɛ eyikwo vwɛ hiɛŋ Naomi, Go zhemonjino AGWANGWAMA. Ubwa na leni shi maa vwụnjɛ bụtụ bụ ụmatụ u tukpororo hwayɛ ga. Ge izeci ibwɛ beni urishi ni Isrɛl:

¹⁵Ubwa zhɛ ba nda maa ohwulu bu kezhe, ubwa zhɛ ma bụ ngbaraka na aka ti'inga tụ bụ. Iwɛnɛ po utashɛ ga bụ mo bu lubo, na kaa ụ bụ zhɛmanɛ uhwuri miaụŋ-me-eyi mi cenje, ubwa ubu metenji bụjalụ ga.

¹⁶Ga Naomi shepi yɛu ɛtɛ bee sweni iŋ na agba ubwa, baa ngbaraka iŋ.

¹⁷Nazhɛ anya ubwa eyikwo hiɛŋ, E metenji Naomi yɛu-ye-eyi. Nazhɛ oo po iŋ izeci ti go Obɛd. Ubwa shɛ bishi Jɛsi na shɛ bishi Devid.

¹⁸Ajalalo pɛrɛz na: Gɛ Pɛrɛzi meci Hɛzron,

¹⁹Gɛ Hɛzron meci Ram, ga Ram meci Aminadab,

²⁰Ga Aminadab meci Nashon, ga Nashon meci Salmon,

²¹Ga Salmon meci Boaz, go Boaz meci Obɛd,

²²go Obɛd meci Jɛsi, gɛ Jɛsi kaa ubwa meci Devid.