Read bassa 1 SAMUƐL UHIIŊ 16 Bible Online

1 SAMUƐL UHIIŊ 16 - bassa bible

1 SAMUƐL UHIIŊ 16

¹Nazhɛ AGWANGWAMA hiɛŋ Samuɛl, Aka naa amɛ-tụhaŋtụ na abi 'yajɛ iwɛ Soul zhɛ mo bu hwuwonowuuŋ? Kwụba, N lakwa bụ maa kede sha ya agwuma Isrɛl o. Zwono manɛbɛ na mahiuaŋ bụ pwomu, N zhɛ ma bu tumwana maa zhe ni ihwɛ Jɛsi na shɛ bụtụ bi Bɛtlɛhɛm, M momo tologwo agwuma na ashashɛ miaụŋ mu bwa me eyi.

²Ga Samuɛl heŋteni AGWANGWAMA, bɛɛ hiɛŋ, Gana naa Ngee eri ma zhaa? Yaa shɛ go Soul hwụjɛ iŋ, bi zhɛ ma n kwụna. Nazhɛ AGWANGWAMA jishijɛ bụ; bɛɛ hiɛŋ, Aka na ɛbi zhɛ, shapa yɛu buna, hiɛŋ aŋ, N zhajɛ maa ma pana AGWANGWAMA ụrụpɛ.

³Ebi ci, suyanɛ Jɛsi no ofwo ụrụpɛ ata, Gamba n zhɛ mo bu mbisono gana na ɛbi zhɛ ba nda. Bụtụ be elele na Ngee bi mbishi izeci ibwɛ, ga shɛ ubwa ebu n dudugeneni manɛbɛ.

⁴Ga Samuɛl njɛ ga gana na ta AGWANGWAMA peni bu unu, bee zhe bee ci Bɛtlɛhɛm. Ibɛ n-nyarɛ mụ ụshɛpwụ ata mi tɛjɛ bụ uhwaŋna na tɛzhɛgɛdaga, ɛɛ hiɛŋ bụ, Ulapiya hŋ abụ 'waŋnɛ?

⁵Bɛɛ jishijɛ aŋ, bɛɛ hiɛŋ, Ulapiya yaa shɛ suu. N zhajɛ ma ma pana AGWANGWAMA ụrụpɛ. Mama njɛ ma shɛshɛshɛ maa hi n 'wa no ofwo ụrụpɛ ata. Baa njɛ Jɛsi shɛshɛshɛ ta miaụŋ mu bwa me eyi, nazhɛ baa suyaganɛ aŋ no ofwo ụrụpɛ ata.

⁶Aka na ta a zhajɛ, ga Samuɛl mbiyanɛ yɛu Jɛsi gɛ Ɛliab, bee heŋshi, bɛɛ hiɛŋ, Bụtụ ganana caakwụ AGWANGWAMA teri maa dudugono manɛbɛ na shikeni epe nu umbe ubwa.

⁷Ama AGWANGWAMA hiɛŋ Samuɛl, Ta ngbaraka tupohondo ta tu'waba tu bwa kwo kaa ugombo ubwa o, iwɛnɛ po N lakwa bụ. Shɛ gana na bụtụ ba kwụba Ama kwụba o. Bụtụ ba kwụba tupohondo ta tu'waba, ama amɛ Ama kwụba.

⁸Gɛ Jɛsi suyanɛ yɛu ibwɛ inyɛ, nɛ ɛɛ hiɛŋ ga Abinadab, bɛɛ hiɛŋ bụ ga zha no ofwo Samuɛl. Ga Samuɛl hiɛŋ bụ, Shɛ ubwa du AGWANGWAMA teri o.

⁹Nazhɛ gɛ Jɛsi hiɛŋ Shama ga zha. Ga Samuɛl hiɛŋ bụ, Awo, shɛ bụtụ ga du AGWANGWAMA teri o.

¹⁰Gɛ Jɛsi sugeni Samuɛl miaụŋ mu bwa me eyi mi cenje. Ga Samuɛl hiɛŋ bụ, I zasa bụtụ be elele na AGWANGWAMA teri na amɛ atwa ga o.

¹¹Ga Samuɛl heŋteni Jɛsi, bɛɛ hiɛŋ, Miaụŋ mụ bụ me eyi na hwɛɛ hŋ? Gɛ Jɛsi jishijɛ bụ, bɛɛ hiɛŋ, Awo, bihiakana ba aba ta namba, ubwa kaa ba ngbaraska agwụdụ ne ehilo. Ga Samuɛl hiɛŋ bụ, Tumwana bụtụ maa ɛ zɛrijɛ bụ, iwɛnɛ po bee te ci shi epe hwayɛ, ti zha shɛ ta ta ụrụpɛ[47] ga o.

¹²Gɛ Jɛsi tumwanɛ ga bụtụ, ɛɛ zɛrijɛ bu. Bi shenjemi hoŋzoo, eshe ubwa pilanụ, baa zhɛmɛ kaa usemberi. Nazhɛ AGWANGWAMA hiɛŋ Samuɛl, Ubwa ganana, ishijɛ dudugeni bu manɛbɛ!

¹³Nazhɛ ga Samuɛl shepi mahiuaŋ ma ata manɛbɛ mu ge zweni bee dudugeni bu manɛbɛ ne eshe atagwụ ubwa. Nazhɛ Mpiala ma AGWANGWAMA mu zhajɛ mee ubi Devid nu ukpahiŋ ụ'wụtụ te kwuni jita ata zhɛ ya geri-be-eshe. Nazhɛ ga Samuɛl sanɛ ugwulwo nu Rama.

¹⁴Na aka ga ibɛ Mpiala ma AGWANGWAMA mi genji Soul, nazhɛ mpiala mụ wɛ tuba mu banɛ no olugwo AGWANGWAMA maa pana bụ ụbaụta ụ'wụtụ.

¹⁵Ibɛ po miaụŋ mu bwa mu ugondu mi hiɛŋ bụ, Kwụba ta mpiala mụ wɛ mu banɛ no olugwo Agwatana maa bụ pana ụbaụta.

¹⁶Iyɛri, iti peni-unu maa te bi ringenje bụtụ bu ko na shɛ bugwoni ba aduma ti'nyama, iwɛ maa aka elele na tu mpiala ma ata mụ wɛ mu banɛ no olugwo Agwatana maa bu zhaganɛ, maa tuba bu na bu 'nyamangana aduma ata, maa nama fwaaŋ sasana.

¹⁷Go Soul peni ga miaụŋ mu bwa mu ugondu unu, bɛɛ hiɛŋ, N ringenje ma bụtụ na shɛ bugwoni ba aduma ti'nyama maa hi n shapɛrɛganɛ bụ epe.

¹⁸Ibɛ po bụtụ bu ko na amɛ esemberi ata jishijɛ bụ, bɛɛ hiɛŋ, N kwụbwa yɛu Jɛsi bụtụ ata bi Bɛtlɛhɛm. Bɛ shɛ bugwoni bi iyi ti'nyama, bee inshi kaa du ohwulu tebiye, bee 'yebi ujasa tɛnda, ba duma n-ndumwa kpeke, bɛ zhɛmɛ usemberi, AGWANGWAMA kaa namɛ nu bwa.

¹⁹Iwɛbɛ po go Soul tumwanɛ atumwa no ofwo Jɛsi, bɛɛ hiɛŋ bụ, N tumwananɛ yɛu ɛtɛ bu ge Devid, bu gata ba ngbaraka agwụdụ.

²⁰Gɛ Jɛsi tumwanɛ ga Devid no ofwo Soul, baa 'waŋnanɛ Soul yɛu biywoywo, keeni izhinyɛci nɛ 'waŋnɛ iyimɛyɛ keeni ututu meni mụ tụ'walụ ta afwafwa.

²¹Ge Devid zhe ga no ofwo Soul, baa ndana bụ ugondu. Go Soul kaa bo lubo Devid tebiye, baa njɛ bụ ya bu'waŋnɛ-bi-i'wɛŋnɛ ibwɛ ujasa.

²²Go Soul tumwanɛ atumwa no ofwo Jɛsi, bɛɛ hiɛŋ bụ, Lono maa ge Devid nama pi mi maa bu na ma ndana ugondu, iwɛnɛ tu baa n kwụlanɛ tebiye.

²³Te kwuni na aka ata, aka elele tu mpiala ma ata mụ wɛ mu banɛ no olugwo Agwatana ma zhaganɛ Soul, ge Devid ba shapa aduma ubwa bo kwuno ti'nyama. Nazhɛ mpiala ma ata ma ganga Soul, nazhɛ eshe ubwa e kezhe ba namanana fwaaŋ.