Read bassa 1 SAMUƐL UHIIŊ 2 Bible Online

1 SAMUƐL UHIIŊ 2 - bassa bible

1 SAMUƐL UHIIŊ 2

¹Ga Hana ndaananɛ adua, bɛɛ hiɛŋ, AGWANGWAMA shidinji amɛ mi nu unyasa; ukpahiŋ mu[6] wa kaana ugombo na amɛ AGWANGWAMA! Ibɛ po Ama hunga atwa i'ime mi ilɛtu, Ama bwada kaa unyasa iwɛnɛ ebi m bicinji!

²I zasa bụtụ na shɛ bụtụ bi tijilo gana AGWANGWAMA o: i zasa kaa bụtụ be elele na shɛ gana bwa o, I zasa kaa ijilɛni nɛ shɛ gana Agwatana tu o.

³Ganga ya tubusa ta ata tụ bụ tụ 'wụtụ, kede n-ndumwa mu tubusa mu banɛ ya nu unu bu o. AGWANGWAMA, ubwa shɛ Agwatana na mepi iyi elele, ubwa kaa zhɛ ba duma ụshɛrɛya iyi elele nɛ atwa a nda.

⁴Itɛ ya atwa na ga 'yajɛ ikɛnyi kwuswatagwụ, ama asụnyasụ tuba a kaana ukpahiŋ ti'yaga.

⁵Atwa na a ya la iyimɛyɛ o shigogo, e meme shiyeni ya ufwafwa maa e gwushiji iyimɛyɛ, atwa na tuba imunɛ ya kwụna la, imunɛ kwụnɛ shɛ aŋ ya o. Biyikwo na shɛ la bu'ulo meci ya miaụŋ mi cenje, ama biyikwo na meci la miaụŋ mu ufwugwo bu zasa ya yɛu okwo ike.

⁶AGWANGWAMA ubwa ba kwụna bụtụ, ubwa kaa bɛɛ hicinjɛ, ubwa bo zucingo atwa ne e'uye, ubwa kaa bɛ bɛcinjɛ aŋ.

⁷AGWANGWAMA ubwa ba nda atwa oko okofwo, ubwa kaa du ba nda atwa oko azhɛgba, ubwa bo zucingo bụtụ, ubwa kaa du bo gombicingo bụtụ.

⁸Ubwa bɛ ishicinjɛ okofwo nu upwupwutu, baa pashanjɛ atwa na zasa iyi nu ubizo. Ubwa ba nda aŋ amadanga shɛgwuma, baa gɛgɛcɛnga aŋ no ohwolu ụjɛrụma. AGWANGWAMA ubwa 'yajɛ okoshilo unyizo ga, na aba du kaa boo mo unyizo ga.

⁹Ubwa ba jilanɛ shihwulu sha atwa ubwa tɛcara, ama tishi tuba ta twala ogworozwo; bụtụ eri shi ba lasụ tedure nu ukpahiŋ ukɛnyi ibwɛ o.

¹⁰AGWANGWAMA zhɛ iricingo atwa i'ime ibwɛ hwɛɛ; bi zhɛ ba kalanɛ aŋ uto taa na azuba maa u to aŋ. AGWANGWAMA ubwa zhɛ ba duma ụshɛrɛya cɛnjɛ tu unyizo hwɛɛ; ubwa zhɛ ba pana agwuma ubwa ukpahiŋ, ubwa kaa zhɛ ba nda maa ga agwuma ubwa na bee dudugeni manɛbɛ lasatagwụ no ofwo elele.

¹¹Nazhɛ gɛ Ɛlkana sanɛ ujiyo nu Rama. Ama yɛu ɛtɛ ga Samuɛl tuba jɛjɛ nu Shailo baa ndana AGWANGWAMA ugondu nu ukaka Ilai.

¹²Miaụŋ-me-eyi mi Ilai mɛ shɛ atwa tusashɛ, iwɛ ya AGWANGWAMA te shi aŋ o.

¹³Masha mu na onongbo ata a nda iyi na atwa na a zhajɛ ụrụpɛ na: Aka elele na bụtụ be elele to ụrụpɛ, miaụŋ-mu-ugondu mo onongbo ma 'waŋnɛ ɛcibwɛ a na 'yajɛ tigazha tụ tatụ, a zhajɛ na aka na tu usunda ata ta patanɛ nu ulwa waa gwuzhaga ni ikwɛshɛ,

¹⁴ba kala ɛcibwɛ ata ni ikwɛshɛ ɛtɛ usunda shiteji. Usunda we elele na ɛcibwɛ ata to hwayɛ, bɛɛ vwɛ uŋ, asha bunongbo ata ubwa 'yajɛ uŋ. Gana aa nda atwa Isrɛl elele na a zhajɛ nu Shailo maa o to ụrụpɛ ta.

¹⁵Inɛɛ nɛ aa nda medenji inɛ ɛtɛ nɛ, okwo ee te suji shi manɛbɛ maa e hwoŋzhinji, yɛu-ugondu bunongbo ya zhajɛ, yɛ hiɛŋ bụtụ ata to ụrụpɛ, M panɛ manɛbɛ maa mo nyoso, iwɛnɛ tu Ngaa zha shɛ ma ya hwayɛ usunda bụ na ebi shiteji, semi una tinyoso kiri Ama ya.

¹⁶Yaa shɛ kaa bụtụ ata hiɛŋ bụ, Ganga tugwo e hwoŋzhinji manɛbɛ hiiŋ nazhɛ teri hwayɛ gana elele na aba jala. Yɛu ɛtɛ ugondu bunonbgo yɛ hiɛŋ, Awo! M panɛ mu hwuwayɛ go! Yaa shɛ kaa ebi m peni shi, asha N zhɛ ma shapa ni iji.

¹⁷Gana iwɛwɛ ye esemberi ata Ilai ya kaana ugombo, yaa wumangwụ ne eshe AGWANGWAMA ta, iwɛnɛ te e peni shi ya iyi ụrụpɛ ya AGWANGWAMA ụjɛrụma okwo cwɛŋ.

¹⁸Yɛu ɛtɛ ga Samuɛl kaa ya ta tuhwulo na AGWANGWAMA iyi tɛndana, boo hwuŋtono idikɛ ɛtɛ ilinɛn i tikpɛngbɛ.[7]

¹⁹Bino bwa bo togonono bu idikɛ ticwɛŋ, baa 'waŋnana bụ na aka na tu baa 'wa bwolo bwa maa ee zhe Shailo maa ɛ cɛ ụrụpɛ uywa uywa.

²⁰Nazhɛ ge Ilai ba pana Ɛlkana keeni biyikwo bwa uwebiye, bɛɛ hiɛŋ aŋ, Ga AGWANGWAMA ihi keeni miaụŋ mi nya no biyikwo ga tụlụkpashɛ ti inɛ gɛ ehi peni bu. Na aba ibɛ nazhɛ o hwulo ya ujiyo ni ihwɛ ya aba.

²¹AGWANGWAMA kaa keeni Hana uwebiye, bee meteneni miaụŋ-me-eyi mu tatụ keeni miaụŋ-mo-o mi yebi. Ga Samuɛl ba kaana ugombo nu ugondu wa AGWANGWAMA tɛnda.

²²Ge Ilai injɛ ya tebiye na aka ga, baa hwuga kaa iyi elele nɛ miaụŋ mu bwa ma nda atwa Isrɛl hwɛɛ keeni gana na oo woto ne eyikwo na a nda ugondu no odubo udulo ata u tu'ulwatagwụ aa nama.

²³Bɛɛ hiɛŋ aŋ, Iwembe po ahia ndangana iyi iwɛ gana gaa? Iwɛ nɛ po atwa Isrɛl elele mo m mbiso iwɛ iyi iwɛ nɛ ahia nda hwɛɛ.

²⁴A-miaụŋ mi mi, ganga ma ijɛ ɛtɛ oo, unabarɛ hiŋ na atwa a duma pilanụ sụ okwo cwɛŋ o!

²⁵Yaa shɛ bụtụ njɛ binya bụtụ iwɛwɛ, Agwatana eri o tono orogwu ubwa; ama yaa shɛ bụtụ njɛ AGWANGWAMA iwɛwɛ, gaaba kwuŋ eri bo tono orogwu ubwaa? Ama a shɛlajɛ shɛ n-ndumwa me bishi ba aba o, iwɛnɛ ti yaa shɛwa ukwulana wa AGWANGWAMA maa kwụna aŋ.

²⁶Gabata yɛu ɛtɛ ga Samuɛl ya kaana tuwaŋna, no tulubo ti biye na AGWANGWAMA keeni na atwa du.

²⁷Nazhɛ bụtụ bu ko ba Agwatana zhajɛ no ofwo Ilai, bɛɛ hiɛŋ bụ, AGWANGWAMA hiɛŋ, M mama bacɛnganɛ la atwa ihwɛ eshi bu ga Aron na aka na ta a shɛ la ajama agwuma Ijipti ga Faro.

²⁸Ụlamụ ubwa Ngee teri na ashashɛ alamụ Isrɛl hwɛ hwɛɛ maa a na sha onongbo mi, maa a na ma ndana ugondu nu utukwu-ụrụpɛ mu, maa o no mo hwoŋzhingono iturɛre, maa o no ubono idikɛ ɛtɛ i tikpɛngbɛ[8] na agba nu umbe mu. Ngee peni aŋ sasana iyi ya arụpɛ tuhwoŋzhingo ye elele nɛ atwa Isrɛl a 'waŋnɛ maa ga shɛ aba 'yajɛ aŋ.

²⁹Asha iwembe po ehi to dundo waa iyi ya arụpɛ keeni apwaŋ mi a na Ngɛɛ hiɛŋ atwa mi ga na ma panɛɛ? (Ilai,) iwembe po abụ mụnɛ miaụŋ mụ bụ ụjɛrụma n hwurii? Ebi leneni aŋ maa o no sugo usunda na uhwuri una vwɛ nụ ụzhɛ hwɛɛ na amɛ iyi nɛ atwa mi Isrɛl ma 'waŋnanɛ maa o no nyomongoo?

³⁰Gamba AGWANGWAMA na shɛ Agwatana Isrɛl, N shiri la unu cala, Ngɛɛ hiɛŋ, Atwa umwamwa ụlamụ bụ, aba kiri zhɛ na ma ndana ugondu tunongbo aka elele. Ama shɛ gana ata yɛɛ zhɛ ya sha ya hwuwayɛ o! Ama atwa na ma muna ụjɛrụma, aba du Ngɛɛ zhɛ ma muna ụjɛrụma, ama iwɛ ya atwa na ma ngbaraka cwɛŋ zha shɛ ya tatụlanụ bụtụ be elele o.

³¹Shɛlaga, aka zhɛ o to ti Ngɛɛ zhɛ ma kwụna esemberi nu umwamwa we eshi bu, iwɛ maa kede a 'yaga bụtụ be elele na zhɛ na ya urugbo maa inga kwukwuŋ.

³²Bi zhɛ ba ngbaraka ti Ngɛɛ zhɛ ma pana atwa Isrɛl hwɛɛ uwebiye, ama bi zhɛ tuba ba nama ne tiriri. I zasa bụtụ be elele zhɛ ba ya urugbo ni ihwɛ bu kwukwuŋ harɛ maa inga.

³³N zhɛ kaa ma waŋpana bụtụ bu ko na amɛ ajalalo bu maa ya uraiŋ, ubwa zhɛ na ma ndana ugondu tunongbo nu utukwu-ụrụpɛ mu. Ama ubwa kaa zhɛ bo lubicingo eshe bu[9] na malaba mu u'wo na ɛbi zhɛ bu na twa. Uwebiye ye elele zha shɛ yo bu tomo, atwa zhɛ a kwụna ajalalo bu a na vwɛ hwɛɛ nu utokwobi.

³⁴Miaụŋ mụ bụ me eyi mi yebi, go Hofini keeni Finihas mi zhɛ mo 'wo nu uwaŋna ụjita uko hwɛɛ. Inɛ ɛtɛ ibɛ zhɛ ya sha useyida maa iyi elele nɛ Ngee bi mbishi zhɛ yɛ sɛ tilɛɛ.

³⁵N zhɛ m mama talaga bunongbo bɛ tɛcara bu naa na zhɛ na nda iyi elele nɛ n teneni cɛŋ na ahaŋsa mi. N zhɛ ma nda ma 'yaga ajalalo anaa na zhɛ na ndana bụtụ mi na ee dudugeni manɛbɛ iyi unyizo-nom:

³⁶Bụtụ be elele na kaa Ngɛɛ zhɛ ma waŋpana na amɛ ihwɛ bụ, bi zhɛ na zhagana bunongbo ata maa bu na lụpa bụ ukwuribi keeni iyimɛyɛ. Bi zhɛ na lụpa bụ, bɛɛ hiɛŋ bụ, Ma bụ tabwa, n leneni kaa maa ma zha na amɛ shimwono shi ko shɛ na onongbo a nda ugondu noko mo gwushigo iyimɛyɛ tiya.