Read bassa 1 SAMUƐL UHIIŊ 22 Bible Online

1 SAMUƐL UHIIŊ 22 - bassa bible

1 SAMUƐL UHIIŊ 22

¹Ti ge Devid beni nu Gat, bee zhe baa swacɛ nụ ụpangwụ uko na namɛ nụ ụshɛpwụ uko na ɛɛ hiɛŋ Adulam. Aka na ta atagwụ ubwa keeni atwa umwamwa bishi bwa hwụjɛ maa bu namba apata, ee zhe apata pu bwa.

²Atwa na a nda tiriri, na atwa na yɛ atashɛ, na atwa na ukekeshi iyi wa nda, zhe oo sotulonu pu bwa hwɛɛ aba. Ufwugwo wa aba ụ shɛ gana atwa akpakwụ-eyebi (400), ge Devid tuba shɛ uhiu wa aba.

³Ti ge Devid beni apata, bee zhe Mizpa na namɛ na cɛnjɛ tu Moab. Bɛɛ hiɛŋ agwuma Moab, Ma bụ tabwa, lono kaa maa bishi mi no bino mi gɛga no ofwo bu uuwa i ci aka na Ngee mepi iyi nɛ Agwatana zhɛ ma n ndana.

⁴Ge Devid genji ga bishi bwa to bino bwa pa agwuma ata Moab. Aa jɛjɛ apata nu bwa aka elele, ge Devid tuba hwuri baa swacɛ nụ ụpangwụ uko.

⁵Nazhɛ bigesere na ɛɛ hiɛŋ ga Gad, zhajɛ no ofwo Devid, bɛɛ hiɛŋ bụ, Ta nama epe nụ ụpangwụ ga o, bana epe maa zhe na cɛnjɛ tu Juda. Ge Devid beni ga apata bee zhe bee teni nu uwapa Hɛrɛt.

⁶Jitoo ko tu go Soul jɛjɛ ni Gibia nu ucilo ụ'wụ'wụ uko na ɛɛ hiɛŋ izeci ubwa Tamarisk, na shikeni ne bikpekwu bu uko. Baa 'waŋnɛ isɛnu ibwɛ, anjɛ-ugondu ubwa rungwutwonu bu. Ee mbishi bu apata maa o to Devid ugbe ta atwa na namɛ nu bwa.

⁷Go Soul hiɛŋ anjɛ-ugondu ubwa, a na shikekeni rungwutwonu bu, Shɛlaga ma ahiɛba atwa Bɛnjamin! Yɛu ɛtɛ Jɛsi zhɛ ma hi pana suu shihilo, nu ntuma ma afwafwa hwɛɛ hiŋ, maa ma hi nda eberezhe ejeshi ubwa akpakwụ-a-ta a-ta keeni a na dipi-yebi yebi?

⁸Ibɛ hŋ ahi ma n shɛka hwɛɛ hiŋ, yaa zasa bụtụ be elele na amɛ hiŋ m mbishi kwukwuŋ maa yɛu mi go Jonatan twa-unu ne Devid? I zasa kaa bụtụ be elele na iwe mi gwumanɛ na ashashɛ hiŋ, maa mo mbiso maa, Yɛu mi ya ta ba Devid ikɛnyi maa mo n gwubogo ne tusweci hwayɛ ga o.

⁹Nazhɛ go Doɛg, bụtụ bi Idụm na shikeni na ashashɛ anjɛ-ugondu Soul, jishijɛ bụ, bɛɛ hiɛŋ, N kwụbɛ la Devid ti bee zhegeni Ahimɛlɛk yɛu Ahitub ata namɛ nu Nob.

¹⁰Ga Ahimɛlɛk bo hoŋtono AGWANGWAMA iwɛ Devid. Bee peni du Devid iyimɛyɛ keeni utokwobi ata Goliat Bufilistia ata.

¹¹Ibɛ po agwuma go Soul tumwanɛ maa ga suyanɛ Ahimɛlɛk yɛu Ahitub na shɛ bunongbo, keeni atwa ihwɛ bishi bwa hwɛɛ, to onongbo elele na namɛ nu Nob. Aa zhajɛ ga hwɛɛ aba no ofwo agwuma.

¹²Go Soul hiɛŋ Ahimɛlɛk, Ɛ-yɛu Ahitub, shɛlaga! Ga Ahimɛlɛk jishijɛ bụ, bɛɛ hiɛŋ, Iyɛri mi, Gamba na.

¹³Go Soul heŋteni bu, bɛɛ hiɛŋ, Iwembe po abụ ma n shɛka ahiɛba na ni yɛu Jɛsi, harɛ ebi peni bu ibrɛd, keeni utokwobi, abụ lụpɛ du Agwatana iwɛ ubwa maa mo n gwubogo maa ma n kwụnaa?

¹⁴Ga Ahimɛlɛk jishijɛ agwuma ata, bɛɛ hiɛŋ, Gaaba shɛ bụtụ bɛ tɛcara na ashashɛ anjɛ-ugondu bu gana Devid na shɛ binua bụ keeni uhiu wa atwa na ma bu 'yakaa? Ubwa na atwa ihwɛ bu a muna ụjɛrụma hwɛɛ.

¹⁵Jita ata suu kiri Ngee kwuni Agwatana tụlụpa hiiŋ iwɛ ubwa?[58] Awo! Kede agwuma n sweji utugbolo we elele Gamba yɛu gɛ bu ugondu o, kwo kaa atwa ihwɛ bishi mi o. Iwɛnɛ po Gamba yɛu gɛ bu ugondu, M mepi shi iyi elele kwukwuŋ iwɛ ibɛ o, ti inɛ ticwɛŋ ti inɛ i'wɛtwɛ o!

¹⁶Agwuma jishijɛ Ahimɛlɛk, bɛɛ hiɛŋ, Ahimɛlɛk, bɛ shɛ bo 'wo tilɛɛ, ta atwa ihwɛ bishi bu hwɛɛ.

¹⁷Ibɛ agwuma hiɛŋ a'iywa na shikekeni rungwutwonu bu, Zhaga kwụna ma onongbo ga AGWANGWAMA, iwɛnɛ ta a namɛ du ne Devid nu n-ndumwa mu ga. Ee mepi du kaa maa usumwa ge Devid bo gozhigo, e m mbishi shi kaa o. Ama anjɛ-ugondu ata agwuma zhe shi maa e timengeni onongbo ata AGWANGWAMA ni ikɛnyi aba o.

¹⁸Nazhɛ agwuma hiɛŋ Doɛg, Zhaga kwụna onongbo ata. Go Doɛg na shɛ bụtụ ata bi Idụm zhe ga baa kwụnɛ onongbo ata. Onongbo na baa kwụnɛ namɛ atwa dupu-nu-talacɛ-na-ba-a-ta (85), anaa na teni cɛŋ maa a na patana idikɛ ɛtɛ tikpɛngbɛ na agba.

¹⁹Go Soul du peni atwa ubwa unu maa ga kwụnɛ atwa elele na namɛ nu Nob ata onongbo ata namɛ hwɛɛ. Te eyikwo, te etwenyi, ta miaụŋ mu na mu ta gwụmwatangwụ, ta mu naa na mu to subo, ti inɛ, tu nzhinyacɛ, ta agwụdụ. A kwụnɛ aŋ hwɛɛ nu utokwobi.

²⁰Ama yɛu-ye-eyi Ahimɛlɛk ike nɛ shɛ bụjalụ Ahitub, nɛ ɛɛ hiɛŋ izeci ibwɛ ga Abiata benengeni, yee gezhiji yaa 'wa Devid.

²¹Ga Abiata mbishi Devid maa bwonu go Soul kwụnɛ onongbo AGWANGWAMA hwɛɛ nu Nob.

²²Ge Devid hiɛŋ Abiata, M mepi te kwuni nụ ụjita ata tu Ngaa kwụbɛ Doɛg apata, maa bi zhɛ bo mbiso Soul iwe mi tilɛɛ. Gamba n shɛ ecilo tu'wo ta atwa ihwɛ bishi bu hwɛɛ.

²³Ge Devid hiɛŋ bụ, Nama ne mi epe, ta nda inyɛsɛ o, bụtụ ata ba jalakaka uhiuhiu bu, ubwa du ba jalakaka unoo mu. Ama bi zhɛ tuba bo bino ta abu namɛ ne mi.