Read bassa 1 SAMUƐL UHIIŊ 24 Bible Online

1 SAMUƐL UHIIŊ 24 - bassa bible

1 SAMUƐL UHIIŊ 24

¹Aka na tu go Soul gwure ti bee genji Afilistia tu'urugono. Ee mbishi bu, ɛɛ hiɛŋ, Ge Devid namba ba nụ ụshɛka Ɛn-gɛdi.

²Go Soul zenji etwenyi Isrɛl anaa na ngezeni hwɛɛ, atwa ugbaa-na-akpakwụ-a-ta (3,000), bee zhe maa dwalakaka Devid keeni atwa ubwa, geri bu umbe Uparatayɛ Shɛkarubana.

³Bee ci ụpangwụ uko na dongonu nsumo ma agwụdụ mu ko na mu namɛ nụ ụzalụ uhwaŋna ata. Baa vwụrɛ bee teni nụ ụpangwụ ata maa ta ụhinjanụ ta atwa ubwa hwɛɛ. Tobwolo ge Devid na atwa ubwa kaa namwawaŋ na amɛ ụpangwụ ata taa fwefweye.

⁴Nazhɛ atwa Devid hiɛŋ bụ, Hwayɛ ga, ibɛ shɛ ụjita ata AGWANGWAMA ubi mbishi la, bɛɛ hiɛŋ, N zhɛ mo bu utogono bụtụ bi i'ime bu maa teni bu u'ala, maa njɛ bụ gana elele na ubu kwụlanɛ. Ibɛ po ge Devid ishijɛ bee zhe swɛɛ bee jeji izhɛmi utogwo Soul.

⁵Na aba ibɛ nazhɛ amɛ Devid hashɛganụ tebiye, iwɛnɛ ti bee jeji izhɛmi utogwo Soul.

⁶Bɛɛ hiɛŋ atwa ubwa, Kede AGWANGWAMA leni maa Ma nda iyɛri mi ijɛ o, maa Ma mba u'ala mu ma nda bụtụ na AGWANGWAMA dudugeni manɛbɛ mu tugwama tiya iwɛwɛ o. Hiɛ kwụbɛ maa ubwa shɛ bụtụ na AGWANGWAMA dudugeni manɛbɛ maa ya tugwama!

⁷Gana ge Devid dumanjɛ n-ndumwa mu ga na atwa ubwa ta, bi peni shi aŋ ohwolu maa e timengeni Soul o. Go Soul ishijɛ be beni nụ ụpangwụ ata bee hwuri tahaŋnụ tu bwa.

⁸Na aba ibɛ nazhɛ ge Devid banɛ du nụ ụpangwụ ata, baa suyanɛ Soul, bɛɛ hiɛŋ bụ, Agwuma Zaacɛ! Go Soul mbiyanɛ ekwunyi, baa kwụbɛ ti ge Devid kwuzhi na cɛnjɛ, baa pana bụ ụjɛrụma wa agwuma.

⁹Ge Devid hiɛŋ bụ, Iwembe po obo shilo ụcɛbɛ nu n-ndumwa ma atwa na mo bu mbiso maa, Gamba ge Devid ma bụ shɛka maa ma bụ nda iyi iwɛɛ?

¹⁰Hioko, bi eri ba kwụba du ne eshe bu gana na ta AGWANGWAMA bi shiri hwayɛ ga no ofwo na maa Mo bu tono u'ala nụ ụpangwụ ga. Ibɛ po atwa mi oko n hiɛŋ ga ma bu kwụna. Ama m bi genji, Ngɛɛ hiɛŋ, N zha shɛ ma mba u'ala mu maa mo tumongono Iyɛri mi nɛ AGWANGWAMA dudugeni manɛbɛ ma tugwama o.

¹¹Ada, kwụba de izhɛmi utogwo bu na Ngaa 'waŋnɛ, iwɛ-tɛkana, N jeji izhɛmi utogwo bu Ngee bi genji tụkwụna. Eshicigo, maa mepi du maa m bu heŋsegeni shi tuhaŋsa tụ wɛ kwukwuŋ, M bu njɛ shɛ kaa iwɛwɛ ye elele okwo ta abu ma n shɛka bana maa n kwụnɛ o.

¹²Ga shɛ AGWANGWAMA jɛmɛ ụshɛrɛya mu na bụ, ga shɛ AGWANGWAMA du n tụpajɛ itɛpwɛ nu uhiuhiu bu. Ama kede u'ala mu ubi timengeni kwukwuŋ.

¹³Atwa a'wụtụ shi ushi uko cala, ɛɛ hiɛŋ, Na amɛ ugworozwo tugworozwo ta banɛ du. Ama N zha shɛ mo bu tumongono kwukwuŋ.

¹⁴Gaaba kwuŋ agwuma Isrɛl banɛ bee urigeni nu usumwaa? Ụsụnyasụ uwɛwɛ ike maa? Okwo itekpe ike suu?

¹⁵Ga AGWANGWAMA jeji ụshɛrɛya na namɛ na ashashɛ mi na bụ, ga yalaga ụŋ, maa ma n kwụnangana ụŋ, maa ma n lashɛga du ni i'ɛlɛ bụ.

¹⁶Aka na ti ge Devid hwuwi n-ndumwa mu ga tụdụmanga no Soul hwɛɛ, Go Soul hiɛŋ Devid, Ɛ-yɛu mi ge Devid, gabụ hŋ ba duma n-ndumwa mu go? Go Soul shepi rụhwụŋ ru bwa na azuba baa cwɛ-u'wo.

¹⁷Go Soul hiɛŋ Devid, Bɛ shɛ bụtụ bi tiririri ebu n hwuri. Iwɛbɛ po abu n tụpanɛ uwebiye tụlụkpashɛ ti iwɛwɛ nɛ Ama bu nda.

¹⁸Bi mbiseni iŋ hwayɛ ga caakwụ gana na abụ n njɛ uwebiye, ibɛ shɛ tụkwụna tu na abụ n kwụnɛ shɛ, na aka na ta AGWANGWAMA n shiri no ofwo na maa n teni u'ala.

¹⁹Gaaba zhɛ ba kwụba bụtụ bi i'ime ibwɛ zhɛ ba ganga bụ maa hwulo lapiyaa? Iwɛ ecilo ata, ga AGWANGWAMA ụbụ cɛpɛ uwebiye nɛ abụ n njɛ hwayɛ ga.

²⁰Kwụba, M mepi maa gabụ bi zhɛ ba ya tugwama ti Isrɛl gom, ni i'ɛlɛ bu kaa tugwama ti Isrɛl ti zhɛ to shikono dimi.

²¹Ama n teji izeci ya AGWANGWAMA maa bi zha shɛ ba kwụna hwuŋ ajalalo mi na aba mi o, maa bi zha shɛ kaa du bo 'woricingo hwuŋ izeci mi ni ihwɛ bishi mi o.

²²Ge Devid teji ga Soul izeci ya AGWANGWAMA. Nazhɛ go Soul hwuri ujiyo ni ihwɛ ibwɛ. Ama ge Devid na atwa ubwa tuba gwuleneni nụ ụpangwụ ata aa ga swakacɛ.