Read bassa 1 SAMUƐL UHIIŊ 25 Bible Online

1 SAMUƐL UHIIŊ 25 - bassa bible

1 SAMUƐL UHIIŊ 25

¹Na aka ga ibɛ ga Samuɛl 'wi, nazhɛ atwa Isrɛl sotulonu hwɛɛ aba oo to-ụkwụla iwɛ ubwa. Nazhɛ ee ni bu ni ihwɛ ibwɛ nɛ namɛ nu Rama. Nazhɛ ge Devid ishijɛ baa sanɛ nụ ụshɛpwụ uko ɛɛ hiɛŋ Paran.

²Bụtụ bu ko namba nu Maon, ɛɛ hiɛŋ izeci ibwɛ ga Nabal, bɛ shɛ udenji Kalɛb, na cɛnjɛ tu bwa tu namɛ nu Kamɛl. Bụtụ ata shɛ bɛzhɛgba tebiye, agwụdụ ubwa namɛ ugbaa-na-akpakwụ-a-ta (3,000), iyweywe ibwɛ namɛ akpakwụ-a-ta (1,000).

³Ɛ hiɛŋ izeci biyikwo bwa ga Abigail. Biyikwo ata eshiciji iyi tebiye, baa pilanụ kaa du igbɛtɛtɛ. Ama bwolo bwa 'yajɛ amiaụŋ keeni tụwụmanga tebiye. Ga Nabal ata kaa ba hwaga tihiŋzhe ta agwụdụ ubwa nu Kamɛl.

⁴Ti ge Devid namɛ nụ ụshɛka ata, baa hwụjɛ maa ga Nabal ba hwaga ba tihiŋzhe ta agwụdụ ubwa,

⁵baa tumwanɛ esemberi ubwa umpwa, bɛɛ hiɛŋ aŋ, Zhaga ma no ofwo Nabal nu Kamɛl, hiɛŋ bụ ma, Ge Devid hiɛŋ ta bụ 'walụ.

⁶Gana ɛhi zhɛ hia 'walụ bụ na, hiɛŋ bụ ma, Ya urugbo te ilegeji, nama lapiya, ga atwa ihwɛ bu nama lapiya, ge iyi elele nɛ abɛ 'yajɛ nama lapiya.

⁷N hwụjɛ maa ba hwaga ba tihiŋzhe ta agwụdụ bụ. Ge Devid ba jala maa eshiciji maa a'iywa agwụdụ bụ namɛ la epe no tu, tɛ njɛ shɛ aŋ la iwɛwɛ ye elele o, i zasa kaa du iyi ya aba ye elele nɛ 'inɛ ta a ta namɛ la no tu epe nu Kamɛl ga o.

⁸Yaa shɛ ebi heŋteni esemberi ata bụ, ɛ zhɛ du mo bu mbiso. Iwɛbɛ po Ama jala maa njɛ esemberi ata mi tebiye. Iwɛnɛ po ti 'yajɛ isene ike hwayɛ ga, Ma bụ tabwa, maa panɛ kaa miaụŋ ma ata mụ bụ mu ugondu keeni yɛu gɛ bu ge Devid iyi elele nɛ abɛ 'yajɛ.

⁹Aka na te esemberi Devid zhe ee ci apata, ee mbishi Nabal utumwa na ge Devid tumwanɛ aŋ, aa shɛlanɛ bụ ya.

¹⁰Ga Nabal jishijɛ atumwa ebe Devid, bɛɛ hiɛŋ, Gaaba ɛɛ hiɛŋ, ge Devid goo? Gaaba ɛɛ hiɛŋ, yɛu go Jɛsii? Ajama na a banana shɛgwuma shi nhwaŋ ma aba eshe-hilo barɛ hwuwayɛ na cɛnjɛ tu ga!

¹¹Ibɛ hŋ Ngɛɛ zhɛ ma pana atwa na Ngee mepi shi okwo olugwo na aa banɛ iyimɛyɛ mi, ne meni mi mi, keeni usunda na Ngaa kwunanjɛ ahwajɛ tihiŋzhe ta agwụdụ mi?

¹²Nazhɛ esemberi Devid gwure ee mbishi bu ijɛ hwɛɛ.

¹³Ge Devid peni atwa ubwa unu, bɛɛ hiɛŋ, Bụtụ bụtụ go umpo utokwobi ubwa ne embi, bụtụ bụtụ umpi ga utokwobi ubwa ne embi, ge Devid umpi du utokwo ubwa ne embi. Atwa na 'wa bụ namɛ gana atwa akpakwụ-eyebi (400); atwa na vwɛ no ofwo na i'wɛŋnɛ ya aba tileni a shɛ gana atwa kpakwụ (200).

¹⁴Ama bụtụ bu ko na amɛ miaụŋ-mu-ugondu Nabal zhe bee mbishi Abigail, bɛɛ hiɛŋ bụ, Hioko ge Devid tumwanɛ atumwa ubwa a na banɛ nụ ụshɛka, maa a 'walụ agwuma-ihwɛ tu, ibɛ gɛnɛnɛ bee mbiseji aŋ n-ndumwa mụ wɛ.

¹⁵Atwa ata kaa a tɛ njɛ la tebiye aka na atu namɛ no ofwo aba. Tɛ njɛ shɛ ụbaụta we elele o, i zasa kaa iyi elele nɛ iti inanjɛ la ta atu namɛ na aba ne shihilo sha ata o.

¹⁶Aba ma tɛ jilanɛ tu uwaŋna tụ ụjita, aba ma tu ngbarakana agwụdụ tu uuwa atu ta banɛ apata.

¹⁷Iwɛ ecilo ata, mapa inɛ gɛ maa heŋshi du iyi nɛ ɛbi zhɛ ba nda. Atwa ata imwangwanua agwuma-ihwɛ gɛ tu iyi nɛ i shɛ maa a njɛ bụ, ta atwa ihwɛ ibwɛ hwɛɛ. Ubwa kaa hweteni tebiye, i zasa kaa bụtụ be elele baa jala maa hwuga-unu ubwa o!

¹⁸Ga Abigail njɛ izɛlɛgwu, bee suji tumbara tu mbrad kpakwụ, (200) bee shidinji meni mụ tụ'walụ ta afwafwa no otutu eyebi, keeni usunda wa agwụdụ a ta na oo nyoswo, ni ipurɛ nɛ shini shikolo shɛ ta, keeni okoko tụ'walụ ta afwafwa tu hwoo dipi-yebi (100), keeni akara tụ'walụ to owowo dipi-yebi. Bee suji i'wɛŋnɛ ɛtɛ bee petengeni iŋ nzhinyacɛ mu bwa.

¹⁹Biyikwo ata hiɛŋ esemberi ubwa, Mizha no mo hwulono ma, Gamba ta me ci ne ekwunyi hiŋ. Ama bi mbishi shi bwolo bwa ga Nabal.

²⁰Tu baa suka izhinyɛci ɛtɛ ibwɛ, bee zhe bee ci tiringeni ti ishɛmɛ ike, baa kwụbɛ ti ge Devid be teni bu, ta atwa ubwa hwɛɛ, baa twa nu bwa.

²¹Na aka ata ge Devid hiɛŋ, Iwɛ-tɛkana ga, maa tɛgadaga Ngaa ngbarakanɛ la bụtụ ga iyi elele nɛ baa 'yajɛ nụ ụshɛka. I zasa kaa iyi ibwɛ ye elele nɛ 'inɛ la okwo ike o, ibɛ gɛ baa ma n tụpana ya tuba iyi iwɛ tụlụkpashɛ tu uwebiye nɛ Ngaa njɛ bụ la!

²²Yaa shɛ Ngee weŋpeni butubwenyi okwo bu ko na ga Nabal 'yajɛ Ngaa kwụnɛ shɛ aŋ hwɛɛ nazhɛ iyi heri beyi, asha ga Agwatana n kwụnɛ.[61]

²³Aka na ti ga Abigail kwụbɛ Devid, bee kezhe kakayɛ na aba izhinyɛci ɛtɛ, bee kwuzeni Devid, bee ubi ụpɛshɛka ubwa na cɛnjɛ.

²⁴Bee leyi nɛ ɛvwɛvwɛjɛ Devid, bɛɛ hiɛŋ bụ, Iyɛri mi, shɛlaga iwe mi! N leshiji tụwụma tu ga kpaaŋ, Gamba yɛu-ugondu gɛ bu yo o.

²⁵Sukwu, kede iyɛri mi 'wa iwɛ Nabal ata hweteni o. Iwɛnɛ po gana ata ɛɛ hiɛŋ izeci ibwɛ,[62] gana ata du baa shɛ, ụlagwụ kaa shini na amɛ ubwa. Ama Gamba yɛu gɛ bu ugondu, N zasaba aka na te esemberi ata abụ tumwanɛ utumwa ata zhajɛ o.

²⁶Iyɛri mi, M bu teji AGWANGWAMA keeni uhiuhiu bu, maa gana na ta AGWANGWAMA ubu kepeni uhwaŋna maa kede kwụnɛ bụtụ be elele na zasa tụwụma o, kwo kaa maa kede njɛ itɛpwɛ ni i'ɛlɛ bu ikɛnyi bu o. Hwuwayɛ go, ga atwa elele na a dwalakaka uhiuhiu bu keeni atwa i'ime iyɛri mi hwɛɛ a shɛ gana Nabal maa e leshiji ulwapɛ.

²⁷Iyɛri, sukwu Ma bụ tabwa maa leshiji upwaŋ ga Ngaa bu 'waŋnanɛ maa peni esemberi ga bụ.

²⁸Iyɛri mi, ma bụ tabwa maa N gengeni tipindo ti mi Gamba yɛu gɛ bu ugondu. M mepi maa AGWANGWAMA zhɛ o shikicingo ihwɛ iyɛri mi dimi tutu, iwɛnɛ ta aba ndana AGWANGWAMA ajasa. Bi zha shɛ kwukwuŋ ba nda iyi iwɛ uuwa bu to 'wo.

²⁹Iyɛri mi, yaa shɛ bụtụ be elele ishijɛ maa mo bu urugono maa dwalakaka uhiuhiu bu, AGWANGWAMA na shɛ Agwatana bụ zhɛ ba swaka uŋ gana na bụtụ ba swaka iyi ibwɛ yo ogwumishi nɛ baa 'yajɛ maa u bini. Ama gabụ tuba bi zhɛ bu na 'waŋtatanga shihwulu sha atwa i'ime bu gana bụtụ na ba 'waŋ atayɛ ni ikwele.

³⁰Iyɛri mi, aka elele na ta AGWANGWAMA ubu ndanɛ hwuŋ iyi ibiye ye elele nɛ bee bi shileni la unu ibɛ hwɛɛ, baa bɛ njɛ uhiu wa atwa Isrɛl,

³¹kede iyɛri mi to utamapa, kwo kaa ohwulu tuhoroko iwɛ tụkwụna ta atwa na zasa n-ndumwa-tụwụma, kwo kaa itɛpwɛ ikɛnyi bu tɛnda o. Iyɛri mi, aka elele na ta AGWANGWAMA ubu njɛ hwuŋ tebiye, yaa bụ zhɛmanɛ, sukwu, ne me teyinje oo.

³²Ge Devid hiɛŋ Abigail, Go o zhemonjino AGWANGWAMA na shɛ Agwatana Isrɛl na ubu tumwanɛ maa n tɛjɛ uhwaŋna hwayɛ ga!

³³Mo zhemonjino iwɛ bu tumapa, Omo bu zhemonjino du iwɛnɛ ebu n ngwuricinji maa kede Ma kwụna atwa na zasa n-ndumwa-tụwụma o, maa kede du Ma nda itɛpwɛ ikɛnyi mi o!

³⁴AGWANGWAMA kwakwa n gwuricinji maa kede Ma bụ kwụna o. Yaa shɛ shɛ iwɛnɛ ɛbi njɛ izɛlɛgwu ɛbi n tɛjɛ uhwaŋna, shibwonu N ngo towo AGWANGWAMA na shɛ Agwatana atwa Isrɛl na shɛ buumwa maa beyi ga nu uvwungwa, i ga zha shɛ ya 'yaga kwukwuŋ butubwenyi be elele na gɛ zhɛ ba vwana Nabal okwo bu ko.

³⁵Ge Devid leshiji i'wɛŋnɛ ɛtɛ biyikwo ata ga 'wananɛ bụ. Bɛɛ hiɛŋ bụ, Zhaga jiyo na amɛ-olom, N hwụjɛ n-ndumwa mụ bụ. N zhɛ ma nda iyi nɛ abụ lụpɛ.

³⁶Aka na ti ga Abigail gwuri no ofwo Nabal, tu ubwa ba nda isene ike unyasa ni ihwɛ ibwɛ, gana isene ya agwuma. Ga Nabal ba nda unyasa duwa iwɛnɛ ta mayaga ma ngba bụ duwa. Iwɛbɛ po ga Abigail dumanɛ shɛ iwɛ ye elele nu bwa nụ ụrụmɛ ata uuwa gi iyi yo holo.

³⁷Aka na ti iyi heri nu uvwungwa, ta mayaga mi Nabal mi hiŋ bu, eshe ubwa du kezhe, nazhɛ ga Abigail mbishi bu ijɛ hwɛɛ, ibɛ po ohwulu bwadụ bụ tebiye tebiye, bee 'wegeni ya tu'waba, bee shiri ya gana utayɛ.

³⁸Ti yaa namɛ gana ijitɛ umpwa, ibɛ AGWANGWAMA po Nabal iyi, bee 'wi.

³⁹Aka na ti ge Devid hwụjɛ maa ga Nabal 'wi, bɛɛ hiɛŋ, Mo zhemonjino AGWANGWAMA na tụpanɛ Nabal tutwa tu na baa n twagajɛ la. Ubwa du kaa n gwuricinji Gamba yɛu ibwɛ ugondu maa kede Ma nda iyi iwɛ o. AGWANGWAMA kaa peni Nabal ulwapɛ iwɛ iyi iwɛ ibwɛ nɛ baa njɛ. Nazhɛ ge Devid tumwanɛ atwa maa e mbiseje bu Abigail iwɛ, maa zana bụ.

⁴⁰Aka na ta miaụŋ-mu-ugondu Devid mi zhe no ofwo Abigail nu Kamɛl, ɛɛ hiɛŋ bụ, Ge Devid utu tumwanɛ maa ta bụ shapɛ maa ma bụ zana.

⁴¹Ga Abigail kwuzeni miaụŋ-mu-ugondu Devid mu gata baa tumwanɛ, bɛɛ hiɛŋ aŋ, Yɛu ibwɛ ugondu Ngaa shɛ, M mama 'imɛ maa Ma nda miaụŋ-mu-ugondu mi iyɛri ɛtɛ mi tebiye.

⁴²Ga Abigail ishijɛ kakayɛ bee munji izhinyɛci ibwɛ, showo shɛ bwa shɛ ta, shɛ na sha ndana bụ iyi shi she bu. Baa zhagajɛ na atumwa ata ge Devid tumwananɛ bụ, baa cɛnɛ ya Devid.

⁴³Ge Devid du zeneneni Ahinoam ata namɛ ni Jɛzrɛl; baa 'yajɛ ya eyikwo ata eyebi.

⁴⁴Tobwolo go Soul shopwo yɛu ibwɛ ga Maikal na ge Devid ge zeni la, bee peni Paliti yɛu Laish uko namɛ nụ ụshɛpwụ uko na ɛɛ hiɛŋ, Galim.