Read bassa 1 SAMUƐL UHIIŊ 26 Bible Online

1 SAMUƐL UHIIŊ 26 - bassa bible

1 SAMUƐL UHIIŊ 26

¹Nazhɛ atwa Zif oko zhe no ofwo Soul ni Gibia, ɛɛ hiɛŋ bụ, Ge Devid ye swacɛ ne bikpekwu bu Hakila ata namɛ geri bu uwaŋna-banụ bu Jɛshimon.

²Go Soul zenji asaza atwa Isrɛl anaa na 'yebi ujasa tɛnda tebiye, atwa ugbaa-na-akpakwụ-a-ta (3,000), bɛɛ ishijɛ gunu ata bee zhe nụ ụshɛka Zif maa dwalakacɛ Devid.

³Go Soul jwe ugba ubwa ne bikpekwu bu Hakila ata namɛ ni ipɛlu uhwaŋna nu uwaŋna-banụ Jɛshimon. Ama ge Devid tuba ta namɛ nụ ụshɛka. Aka na tu baa hwụjɛ maa go Soul ta dwalakaka bụ ba nụ ụshɛka.

⁴Baa tumwanɛ eyeleji maa e hweyigeni okwo go Soul namba ga, ee mbishi bu, ɛɛ hiɛŋ, Go Soul namba ga gom.

⁵Ge Devid ishijɛ bee zhe nu ugba ata go Soul namɛ, baa kwụbɛ ofwo na go Soul weci gom abana Abnɛ yɛu Nɛ, ata shɛ uberezhe we ejeshi ubwa. Go Soul weci tuba na ashashɛ ugba ata, boo woto malabụ, ejeshi ubwa tuba rungwutwonu bu.

⁶Ge Devid hiɛŋ Ahimɛlɛk Bihit ata keeni Joab batagwụ Abishai na ɛɛ hiɛŋ bino ba aba gɛ Zɛruwia, Gaaba na amɛ hiŋ ehie yebi zhɛ ma n 'wa maa to zwo nu ugba ata go Soul namɛɛ? Ga Abishai hiɛŋ bụ, Mizha ti zhe.

⁷Ge Devid keeni Abishai zhe ga no ofwo ejeshi ata nụ ụjita. Go Soul bo woto malabụ na ashashɛ ugba ata, isɛnu ibwɛ tɛ kaa shɛnjɛ na cɛnjɛ to dongonu uhiuhiu ubwa. Ga Abnɛ keeni ejeshi avwɛ hwɛɛ weteji oo rungwutwonu bu.

⁸Ga Abishai hiɛŋ Devid, Agwatana ubu utegeni bụtụ bi i'ime bu maa teni bu u'ala hwayɛ ga. Me ci ba ma sapa bụ isɛnu kpalụ ko gba maa i 'imɛ cɛnjɛ, N zha shɛ ma sapa bụ kpalụ yebi o!

⁹Ama ge Devid hiɛŋ Abishai, Ta kwụna bu o. Gaaba eri ba mba u'ala ubwa maa tumongono bụtụ na AGWANGWAMA dudugeni manɛbɛ, i shɛ n-ndumwa zha shɛ ma wụma bụụ?

¹⁰Ge Devid hiɛŋ, N to AGWANGWAMA na shɛ buumwa, maa AGWANGWAMA ubwa zhɛ ba kwụna bụ jitoo ko, kwo kaa ụjita tu'wo tu bwa we ci ba; kwo kaa bi zhɛ ba zha hwuŋ ujasa uko bɛɛ zhɛ be 'we nu bwa.

¹¹Kede AGWANGWAMA leni maa mo tumongono bụtụ na bee dudugeni manɛbɛ ma tugwama o. Ama mushingo kwakwa isɛnu ɛtɛ shɛnjɛ no ofwo uhiuhiu ubwa keeni okoko ata ubwa meni, maa tu hwuri.

¹²Ge Devid shepi ga isɛnu ɛtɛ keeni okoko ata ge shi nu uhiuhiu ubwa, ee hwuri. Iwɛnɛ po AGWANGWAMA leni maa ga malabụ mụ 'wụtụ mɛ 'imɛ aŋ hwɛɛ, i zasa bụtụ be elele na zhinjɛ maa kwụba kwo kaa ma mapa iyi nɛ ya nda o.

¹³Ge Devid hwuri bee keshi ulomu ata, bee zhe bee shikeni ni ihiŋhiŋ ishɛmɛ ɛtɛ namɛ nụ ụzalụ uyebi taa dụlụ.

¹⁴Baa suyanɛ ejeshi Soul keeni Abnɛ yɛu Nɛ, bɛɛ hiɛŋ, Abnɛ, bi eri ba hwuga iwe mi maa n jishijɛ hŋ? Ga Abnɛ hiɛŋ, Gaaba nu bwa ba suyana agwumaa?

¹⁵Ge Devid jishijɛ Abnɛ, bɛɛ hiɛŋ bụ, Shɛ butubwenyi suu abɛ shɛ? Gaaba shɛ gana bụ na cɛnjɛ ti Isrɛl hwɛɛɛ? Iwembe po abɛ njɛ shɛ u'iywa Iyɛri bu na shɛ agwuma tebiyee? Kwụba ta bụtụ bu ko teni nu ugba ata hiŋ hwuwayɛ go maa kwụna Iyɛri bu na shɛ agwuma.

¹⁶Abnɛ, ijɛ abɛ njɛ zhɛshɛ o! N to AGWANGWAMA na shɛ buumwa maa hiɛ lanɛ no tu'wo hwɛɛ hiŋ, iwɛnɛ ta ahiɛ njɛ shɛ u'iywa wa agwuma-ihwɛ hiŋ na AGWANGWAMA dudugeni manɛbɛ ma tugwama. Kwụba ma de isɛnu ya agwuma keeni okoko meni mu bwa na ga namɛ no ofwo ata bee shiri uhiuhiu ubwa.

¹⁷Tu go Soul eshiciji maa rụhwụŋ ri Devid nu, bɛɛ hiɛŋ bụ, Ɛ-yɛu mi ge Devid, Gabụ hŋ ba duma n-ndumwa mu go? Ge Devid jishijɛ bụ, bɛɛ hiɛŋ, Agwuma Zaacɛ! Gamba na.

¹⁸Ge Devid hiɛŋ bụ, Iwembe kwuŋ po obu mo urugono nu usumwa Gamba yɛu gɛ bu ugonduu? Imbe kwuŋ Ngaa bụ njɛɛ? Ni imbe kwuŋ Ngee bi pindenii?

¹⁹Agwuma Tumaka! Shɛlaga iwɛ mi Gamba na n shɛ yɛu bu ugondu na aka ga. Yaa shɛ AGWANGWAMA ubi ishicinjɛ maa n sukakanɛ, asha ga i shɛ upwaŋ na bɛɛ zhɛ ba lashɛga, ama yaa shɛ kaa atwa ibi shishingeni, asha go unu-tukalana wa AGWANGWAMA 'imɛ aŋ, iwɛnɛ te e n unzhi maa ma bana maa kede ma 'yaga urobwo we elele na ashashɛ iyi-yo-ogwu ya AGWANGWAMA o. Ɛɛ hiɛŋ ga ma zha maa mu na zhɛba tuwa.

²⁰Iwɛ ecilo ata to lono maa mehieŋ mu tụkwụna ti mi mu 'waŋ na cɛnjɛ tu na tɛ shɛ shɛ ma tu ta AGWANGWAMA o. Iwɛnɛ po agwuma Isrɛl banɛ maa dwalakaka uhiuhiu mu gana bụtụ na ba nda tijala to orubo nu nshama.

²¹Nazhɛ Go Soul hiɛŋ Devid, Ɛ-yɛu mi, N njɛ iyi iwɛ, gwure ya, N zha shɛ ma bu shɛka ya o! Uraiŋ mu ubu shanɛ iyi yo ogwumishi, ibɛ po abụ n kwụnɛ shɛ nu ụjita go. Hioko, ụlagwụ bana Ama nda! N 'inɛ taa dụlụ.

²²Ge Devid jishijɛ bụ, bɛɛ hiɛŋ, Agwuma Tumaka, isɛnu bu nɛ, tumwanɛ usemberi bu uko maa shapa iŋ.

²³AGWANGWAMA ubwa ba tụpa atwa tiririri keeni atwa tɛcara titeni ta aba. Iwɛnɛ po AGWANGWAMA ge leni maa Mo bu tono u'ala hwayɛ ga, ama N zha shɛ tuba ma mba kwukwuŋ u'ala mu maa mo bu tumongono gabụ na AGWANGWAMA dudugeni manɛbɛ ma tugwama o.

²⁴Gana na Ngee bi genji tụkwụna hwayɛ ga iwɛnɛ ta abụ n shanɛ iyi yo ogwumishi, gana ata du Ama jala maa ga uraiŋ mu shanɛ AGWANGWAMA iyi yo ogwumishi tebiye maa ma n lashɛga nu ụbaụta we elele kpaaŋ!

²⁵Go Soul jishijɛ bụ, bɛɛ hiɛŋ, Ɛ-yɛu mi ge Devid, ga AGWANGWAMA ubu keeni uwebiye! Iyi elele nɛ ɛbi zhɛ ba nda i zhɛ ma bu 'yagana kaa eshe! Nazhɛ ge Devid hwuri geri bwa, go Soul du hwuri ujiyo ni ihwɛ ibwɛ.