Read bassa 1 SAMUƐL UHIIŊ 29 Bible Online

1 SAMUƐL UHIIŊ 29 - bassa bible

1 SAMUƐL UHIIŊ 29

¹Na aka ga ibɛ Afilistia suje ejeshi aba hwɛɛ oo sotulonu na Afɛk. Atwa Isrɛl tuba jwe ugba wa aba to dongonu umɛzhinjɛ uko na namɛ ni Jɛzrɛl.

²Gana na te ehiu Afilistia a kashaka na atwa aba edingbe kpakwụ kpakwụ keeni edingbe igbɛɛ igbɛɛ, Ge Devid na atwa ubwa keeni agwuma ga Akish tuba lɛ ekwunyi na tɛkashɛka ta aba.

³Gana na te eberezhe ejeshi Afilistia kwụbɛ Devid, ɛɛ hiɛŋ, Imbe Ehibru ga a nda epee? Ga Akish jishijɛ aŋ, bɛɛ hiɛŋ, Ge Devid ga shɛ bɛnjɛ-bu-ugondu Soul ata shɛ agwuma Isrɛl na kaa. Bu namɛ ya ne mi epe i ci shiywa shɛ mbana, te kwuni taa aka na tu baa n layɛtanɛ epe, N ta kwụbɛtanɛ shɛ bụ tipindo te elele o.

⁴Ama eberezhe ejeshi Afilistia a nda isɛbwɛ na Akish. Afilistia ata hiɛŋ bụ, Jicingo bụtụ ga, go gwulo nụ ụshɛpwụ ata ebi peni bu, maa kede zha ujasa ga no tu o, iwɛ aka na bɛɛ zhɛ bɛ yinjɛ hwayɛ bu na tu sukakana nu ujasa ata. Iwɛnɛ po i zasa iyi nɛ bụtụ ga zhɛ ba nda maa amɛ agwuma-ihwɛ ibwɛ gwuriseni nu bwa o, semi maa ga kwụna atwa tu.

⁵Shɛ ge Devid ganana hŋ eyikwo momo loshogonu azunga na tɛhiɛba, ɛɛ hiɛŋ, Go Soul kwụnɛ atwa akpakwụ-a-ta a-ta, ge Devid tuba kwụnɛ atwa igbɛɛ-itɛ itɛ?

⁶Ga Akish suyanɛ Devid, bɛɛ hiɛŋ bụ, N to AGWANGWAMA, bu n shanɛ bụtụ bɛ tɛkana, yee ge ce gwu iwe mi, i ge me teneni cɛŋ maa na zha ujasa we elele ne mi, iwɛnɛ tu Ngaa ta bụ kwụbɛtanɛ shɛ iyi elele nɛ 'wanjɛ no ofwo bu, taa te ebi ci epe uuwa tɛ zhɛ taa hwayɛ. Ama tuba okwo ti yaa shɛ bwonu, shɛgwuma shɛ ga sha Afilistia shi te bi eshiciji shi o.

⁷Iwɛ ecilo ata, zhaga gwulo ni ihwɛ na amɛ-olom, iwɛ maa kede heshigeni hwayɛ shɛmɛ she ehiu Afilistia o.

⁸Ge Devid jishijɛ Akish, bɛɛ hiɛŋ, Imbe kwuŋ Ngaa bụ nduwaa? Iyɛri mi, imbe i shɛ iyi iwɛ nɛ obu towo ugbe no ofwo mi te kwuni taa na aka na Ama bu ndana ugondu uuwa i ci aka ga, Ngaa shɛ shɛ maa zha maa Ma sukakana atwa i'ime Iyɛri mi na shɛ Agwumaa?

⁹Ga Akish jishijɛ Devid, bɛɛ hiɛŋ, M mepi maa bu zasa unu-tusapa ne eshe mi o, bu n shanɛ maa butumwa ba Agwatana ba azuba. Ama okwo ti yaa shɛ bwonu eberezhe ejeshi Afilistia hiɛŋ, Bɛ shɛ shɛ ba zha ujasa ga na aba o.

¹⁰Asha beyi ga gbatụ ma ti'ishɛga nu uvwungwa dididi, tu gabụ keeni anjɛ-ugondu iyɛri bu a na abụ zhagajɛ yebe na aba, maa hi gbatụ beyi gunu na ti iyi kwuni tusuje.

¹¹Ge Devid na atwa ubwa gbatụ ga ti'ishɛga nu uvwungwa dididi ti iyi heri, ee gwuri na cɛnjɛ ta Afilistia. Ama Afilistia tuba to tuhwulo ee zhe Jɛzrɛl.