Read bassa 1 SAMUƐL UHIIŊ 31 Bible Online

1 SAMUƐL UHIIŊ 31 - bassa bible

1 SAMUƐL UHIIŊ 31

¹Na aka ga ibɛ Afilistia jeshi atwa Isrɛl ni Ishɛmɛ Gilboa, aa kwụnɛ atwa Isrɛl te gembi ufwugwo, ibɛ po atwa Isrɛl gezhigeni Afilistia.

²Afilistia urigeni aŋ, ee jiteni aŋ, aa kwụnɛ miaụŋ mu Soul me eyi mu tatụ; go Jonatan, na Abinadab keeni Malkishua.

³Ujasa ata kaa vwengengeni Soul eshe tebiye, ibɛ po ekeri a'inla jiteni bu, aa gwụcanjɛ bụ duwa na a'inla na oo to bu.

⁴Bɛɛ hiɛŋ usemberi na wa 'waŋnana bụ i'wɛŋnɛ ibwɛ ujasa, Hwucice utokwobi bu maa n kwụnɛ, iwɛ aka na atwa ga jeji shi teleyi zhɛ a zhajɛ hwayɛ maa a n kwụnɛ, maa a na ma nda asada. Ama usemberi ata tuba wa nda inyɛsɛ duwa duwa, bụ kwụnɛ shɛ bụ o. Iwɛbɛ po go Soul shɛnjɛ utokwobi ubwa, bee leyiteni uŋ.

⁵Aka na tu usemberi ata wa 'waŋnana bụ i'wɛŋnɛ ujasa kwụbɛ maa go Soul 'wi, bee leyiteni du utokwobi ubwa, bee 'wi no Soul.

⁶Gana go Soul, na miaụŋ mu bwa me eyi mu tatụ keeni atwa ubwa hwɛɛ, tu usemberi ata wa 'waŋnana bụ i'wɛŋnɛ ibwɛ ujasa 'wi waŋna ụjita uko ta.

⁷Aka na ta atwa Isrɛl oko a na ga jɛjɛ hileniye Ulomu ata Jɛzrɛl keeni atwa na ga namɛ hileniye Urefu Jodan kwụbɛ maa ejeshi atwa Isrɛl gezhiji. Go Soul na miaụŋ mu bwa mu tatụ mu 'wi, ee gezhiji du ee genji ashɛpwụ aba, ibɛ po Afilistia zhe aa jɛjɛ na ashɛpwụ ata.

⁸Aka na ta Afilistia zhe ni Ishɛmɛ Gilboa maa e tufwerenji i'wɛŋnɛ n'wo ma ata, oo to ru'wo ru Soul keeni miaụŋ mu bwa mu tatụ ugbe ti mee tilegeni ni ishɛmɛ ɛtɛ.

⁹Ee mwi uhiuhiu Soul, ee hwuceci i'wɛŋnɛ ibwɛ ujasa, aa tumwanganɛ tutumwa no ofwo elele na cɛnjɛ ta Afilistia ti teje, maa ge enengeni nsumo mu tuwa ta aba keeni atwa aba unabarɛ ata ubiye.

¹⁰Ibɛ po ee tileni i'wɛŋnɛ ibwɛ ujasa na amɛ isume tuwa ta ata ta aba ɛɛ hiɛŋ, Ashtarot. Nazhɛ oo to ru'wo ru bwa n-ngbalụ nụ ụdatụ uba ụshɛpwụ ata ɛɛ hiɛŋ Bɛt-shan.

¹¹Ama aka na ta atwa na jɛjɛ ni Jɛbɛsh-giliad hwụjɛ iyi nɛ Afilistia njɛ Soul.

¹²Ibɛ po atwa aba a na inshi shihwulu tebiye ishijɛ hwɛɛ aba, ee zhe tahaŋnụ na amɛ ụjita, ee kezhicinje ru'wo ru Soul keeni n'wo mu miaụŋ mu bwa nu uba ata Bɛt-shan, ee suji mu ni Jɛbɛsh, ee hwoŋzhinji mu apata.

¹³Nazhɛ ee suji o'umpwo aba ee ni aŋ nu ucilo ụ'wụ'wụ ata ɛɛ hiɛŋ, Tamarisk na namɛ nụ ụshɛpwụ ata. Nazhɛ aa njɛ ezumi ijitɛ icenje.