Read bassa 1 SAMUƐL UHIIŊ 6 Bible Online

1 SAMUƐL UHIIŊ 6 - bassa bible

1 SAMUƐL UHIIŊ 6

¹Ikpɛtɛ ɛtɛ ya AGWANGWAMA namɛ nu u'una wa Afilistia ipiɛnɛ icenje.

²Afilistia suyaganɛ onongbo aba keeni ashɛjɛ aba, ee heŋteni aŋ, ɛɛ hiɛŋ, Gana naa ɛti zhɛ ta nda Ikpɛtɛ gɛ ya AGWANGWAMAA? Yaa shɛ ɛti zhɛ to gwuricingo iŋ no ofwo na ya namɛ la, imbe ɛti zhɛ ta madanga iiŋ?

³Ɛɛ hiɛŋ aŋ, Yaa shɛ ɛhi zhɛ hio gwuricingo Ikpɛtɛ ɛtɛ ya Agwatana Isrɛl, to gwuricingo iŋ ma kwukwuŋ ni i'ɛlɛ yo ohondo, nda ma gana elele na ehi eri maa hi medenji ụrụpɛ hiŋ tụwụma. Nazhɛ ɛhi zhɛ hia zhɛmanana, nazhɛ du ɛhi zhɛ hia mapa ecilo no po baa ga hi pana ulwapɛ ata aka elele.

⁴Ee heŋteni aŋ, ɛɛ hiɛŋ, Imbe kwuŋ shɛ ụrụpɛ go tụwụma ɛti zhɛ ta tumwanana bụụ? Ɛɛ jishijɛ aŋ, ɛɛ hiɛŋ, unto ma ụsụbwa wa akpakpacɛ a ta a ta keeni shokuzo na azhɛnarɛya gana na tu ufwugwo we ehiu Afilistia namɛ. Go tu'unto tu ko tɛ shɛ iwɛ uhiu uko. Iwɛnɛ po ụngwụ tishikpe ta ata uko uko ubwa ụ hiɛ 'imɛ hwɛɛ hiŋ, ta shɛgwuma sha ata shi hiŋ shɛ ta.

⁵I shɛ tilɛɛ maa hiɛ njɛ ụsụbwa wa akpakpacɛ ata keeni shokwuzo sha ata, ibɛ ge heshigeni cɛnjɛ ti hiŋ. Pana ma Agwatana atwa Isrɛl ụjɛrụma. Nekeshi ba hi ganga ya ulwapɛ tụpana, ta-tuwa ti hiŋ keeni cɛnjɛ ti hiŋ.

⁶Iwembe po ahia jala maa hi shɛshɛpanɛ gana na agwuma Ijipti ga Faro keeni atwa Ijipti shɛshɛpanɛ laa? Kede isɛbwɛ ihi 'wi gana na bɛɛ 'wɛnjɛ aŋ la tishikpe nazhɛ ee leneni atwa Isrɛl maa e beni ni Ijipiti o.

⁷Zhaga nda ma ụhaŋtụ cɛnjɛ ufwo maa hi rinje inɛ iyebi nɛ 'yajɛ oywoywo, inɛɛ nɛ ee te peteni shi ụ'wụ'wụ-i'ilu maa i njɛ ugondu kwukwuŋ, ama tuba gwuricingo ma oywoywo aba ni ihwɛ.

⁸Shapa ma Ikpɛtɛ ɛtɛ ya AGWANGWAMA hi shiyeni iŋ na amɛ ụhaŋtụ ata ahiɛ njɛ. Zwono ma ụsụbwa wa akpakpacɛ ata ahi ga njɛ iwɛ ụrụpɛ ata tụwụma ni ikpɛtɛ ɛtɛ du maa inɛ ɛtɛ tuba kekwuri uŋ no ofwo elele na yɛɛ zhɛ ya zha.

⁹Na ngbaraka iŋ ma tuba geri na yɛɛ zhɛ. Yaa shɛ yoo to hwayɛ geri bu Bɛt-shɛmɛsh na shɛ cɛnjɛ ti ibɛ, asha ti mepi ya maa Agwatana atwa Isrɛl ubwa ga ga tu tumwananɛ iyi iwɛ ɛtɛ. Ama yaa shɛ yee te shi hwayɛ geri ata, asha ti mepi ya maa i'ɛlɛ ibwɛ zaba ne tishikpe tu na ti ge ti jiteni o, asha ikpɛsu kwakwa yaa njɛ.

¹⁰Atwa ata njɛ ga gana na te e mbishi aŋ, e suji inɛ ɛtɛ iyebi oo to iŋ nụ ụhaŋtụ ata, ee jicinji tuba oywoywo aba ni ihwɛ, ee kepi aŋ.

¹¹Ee shiyeni Ikpɛtɛ ɛtɛ ya AGWANGWAMA na amɛ ụhaŋtụ ata keeni ikpɛtɛ ɛtɛ ụsụbwa shokwuzo keeni akpakpacɛ ata zweni ni ibɛ.

¹²Ibɛ inɛ ɛtɛ hwuri geri bu Bɛt-shɛmɛsh mbwụụ, a vwụrɛ shɛ okwo nu u'ala ubiye kwo kaa nu u'ala ugwulwo. Ibɛ ehiu ebe Afilistia 'wa aŋ tutu tugwungwu ti Bɛt-shɛmɛsh.

¹³Na aka ga ibɛ atwa Bɛt-shɛmɛsh zweni nu ulomu oo gwubo iyimɛyɛ ya aba nɛ ɛɛ hiɛŋ wit. Aka na ee shepi eshe, aa kwụbɛ ti Ikpɛtɛ ya AGWANGWAMA ye ci, ee bweji unyasa, iwɛnɛ ta a kwụbɛ iŋ.

¹⁴Ibɛ inɛ ɛtɛ kekwuri ikpɛtɛ ɛtɛ yee ci ehilo bụtụ bu ko na ɛɛ hiɛŋ go Joshua, na namɛ ni Bet-shɛmɛsh, yee shikeni ya apata no ofwo na utayɛ uko ụ'wụtụ namɛ. Nazhɛ atwa ata kekebi ụhaŋtụ ata ụ'wụ'wụ inɛ ge kekwuri, nazhɛ aa kwụnɛ inɛ ɛtɛ ee peni AGWANGWAMA ụrụpɛ tuhwoŋzhingo apata.

¹⁵Alivai kezhicinje Ikpɛtɛ ɛtɛ ya AGWANGWAMA keeni ikpɛtɛ ɛtɛ ụsụbwa iyi nɛ aa njɛ na azhɛnarɛya ge zweni, ee peteni iŋ nu utayɛ ata ụ'wụtụ. Nazhɛ atwa Bɛt-shɛmɛsh peni AGWANGWAMA ụrụpɛ tuhwoŋzhingo keeni arụpɛ anya.

¹⁶Aka na te ehiu ebe Afilistia a ta kwụbɛ gana na ta a njɛ ijɛ ɛtɛ, nazhɛ ee gwuri ne Ɛkron gụnụ ụjita ata gbaa.

¹⁷Afilistia tumwananɛ AGWANGWAMA ụsụbwa wa akpakpacɛ ata a ta aa njɛ na azhɛnarɛya, iwɛ ụrụpɛ wa aba tụwụma: uko shɛ iwɛ Ashdod, uko shɛ iwɛ Gaza, uko shɛ iwɛ Ashkɛlon, uko shɛ iwɛ Gat, uko shɛ iwɛ Ɛkron.

¹⁸Aa tumwanganɛ du ụsụbwa shokwuzo sha ata aa njɛ na azhɛnarɛya nu gana na tu ufwugwo wa ashɛpwụ aba a na shɛgwuma sha aba shɛ ta shɛ untanganɛ, ta ashɛpwụ aba a'wụtụ a'wụtụ a na 'yajɛ uba keeni ashɛpwụ aba ticwɛŋ cwɛŋ a na zasa uba. Utayɛ ata ụ'wụtụ namɛ ni itimɛ Joshua bụtụ ata bu Bɛt-shɛmɛsh, ugata ee peteni Ikpɛtɛ ɛtɛ ya AGWANGWAMA u ta namba apata, ubwa shɛ useyida iyi nɛ njɛ apata tutu taa hwayɛ.

¹⁹AGWANGWAMA kwụnɛ etwenyi Bɛt-shɛmɛsh dupu-nu-woshi (70),[14] iwɛnɛ te e hikeni amɛ Ikpɛtɛ ɛtɛ ya AGWANGWAMA. Ibɛ po atwa ata to-ụkwụla iwɛnɛ ta AGWANGWAMA kwụnɛ atwa na ashashɛ aba i ci gana ata ufwugwo.

²⁰Ibɛ po etwenyi Bɛt-shɛmɛsh hiɛŋ, Gaaba kwuŋ eri bo shikono na agba AGWANGWAMA na shɛ Agwatana ga tijiloo? Yaa shɛ bee beni no olugwo tu, asha no ofwo ata aba bɛɛ zhɛɛ?

²¹Ibɛ po aa tumwanɛ atumwa na zhe no ofwo atwa Kiriat-jiarim, ɛɛ hiɛŋ aŋ, Afilistia na gwuricinje Ikpɛtɛ ya AGWANGWAMA, zwe ma maa hi shepi iŋ no ofwo hiŋ.