Read bassa 1 SAMUƐL UHIIŊ 8 Bible Online

1 SAMUƐL UHIIŊ 8 - bassa bible

1 SAMUƐL UHIIŊ 8

¹Aka na tu ga Samuɛl injɛ, bee suji miaụŋ mu bwa me eyi baa njɛ aŋ ajɛmɛ-ụshɛrɛya atwa Isrɛl.

²Ɛ hiɛŋ izeci yɛu ibwɛ ihiiŋ go Joɛl, ɛɛ hiɛŋ izeci inɛ iyebi ga Abija; a namɛ ni Biɛshiba aa duma ụshɛrɛya.

³Ama miaụŋ ma ata mu bwa mu 'wa sụ uhwaŋna ubwa o, e genji uhwaŋna ubwa, aa 'wa uhwaŋna ule tiya. A lashaga ukwuribi ugworo, a na duma ya ụshɛrɛya u tu'ubo.

⁴Ibɛ po n-nyarɛ mi Isrɛl hwɛɛ mu sotulonu, mee zhegeni Samuɛl nu Rama,

⁵ɛɛ hiɛŋ bụ, Kwụba, miaụŋ mụ bụ mu 'wa sụ uhwaŋna bụ o, gabụ kaa bɛ injɛ ya, iti teleji agwuma na zhɛ ma tu untangana gana na anya edenji vwɛ 'yajɛ hwɛɛ.

⁶Ama amɛ Samuɛl hashɛganụ ni iwɛ ɛtɛ ɛɛ hiɛŋ bụ, Iti teleji agwuma na zhɛ ma tu untangana. Ga Samuɛl njɛ adua no ofwo AGWANGWAMA.

⁷AGWANGWAMA hiɛŋ Samuɛl, Iyi elele nɛ atwa ata bi hiɛŋ, lonono aŋ. Shɛ gabụ aa lacɛ o, ama Gamba aa lacɛ maa kede ma sha agwuma aba o.

⁸Iyi elele nɛ aa ma nda la te kwuni taa na aka na ti Ngɛɛ bɛcinjɛ aŋ ni Ijipti tutu i ci hwayɛ ga, ibɛ gɛnɛnɛ du aa bu nda. E n genji aa zhɛba tuwa.

⁹Hwuga iwɛ nɛ aa jɛmɛ maa a 'yaga agwuma aba na aka ga. Ama mbiso aŋ tuba tebiye gana na agwuma ata aba zhɛ na nda aŋ hwuŋ.

¹⁰Ga Samuɛl mbishi atwa ata lụpɛ bụ agwuma n-ndumwa me elele na AGWANGWAMA jɛmɛ.

¹¹Bɛɛ hiɛŋ aŋ, Gana na masha ma agwuma ata zhɛ ma hi untangana hwuŋ mi zhɛ ma sha na: Bi zhɛ ba nda miaụŋ mi hiŋ me eyi asụcɛ ihɛŋtu ibwɛ ujasa. Bɛɛ zhɛ ba nda atwa oko asụcɛ idɛkwɛ ibwɛ, bɛɛ zhɛ ba nda atwa oko maa o no hwulono ihɛŋtu ibwɛ ujasa umbe nu usumwa.

¹²Bi zhɛ ba nda atwa oko ehiu atwa akpakwụ-a-ta a-ta, (1,000) ne ehiu atwa dupu dupu. Miaụŋ mi hiŋ mi zhɛ ma sha ahwɛŋ itimɛ ibwɛ, ne ejwe iyimɛyɛ ibwɛ, na alụma i'wɛŋnɛ ibwɛ ujasa iwɛ ihɛŋtu ibwɛ ujasa.

¹³Miaụŋ mi hiŋ mo o bɛɛ zhɛ ba nda anjɛ iturɛre ibwɛ, na anjɛ tiyikwo keeni anjɛ akara ubwa.

¹⁴Bi zhɛ ba lashaga ntuma mi hiŋ mu na mu zhɛmanjɛ hwɛɛ, tu ntuma mi hiŋ ma shifwafwa keeni ntuma mi hiŋ ma buta, ba pana mu anjɛ-ugondu ubwa.

¹⁵Bi zhɛ bo sugo iyi-a'umpwa iyi hiŋ izɛgwu keeni iyi-a'umpwa shifwafwa shi hiŋ, ba pana ehiu anjɛ-ugondu ubwa keeni maiuŋ mu bwa mu ugondu.

¹⁶Bi zhɛ bo sugo ajama hiŋ eyi na ajama hiŋ o o; keeni esemberi[16] hiŋ ebiye, nu nzhinyacɛ mi hiŋ maa a na ndana bụ ugondu.

¹⁷Ubwa zhɛ bo sugo iyi-a'umpwa ya agwụdụ hiŋ, ahiɛba kaa du hi zhɛ hia shaanana ajama ubwa.

¹⁸Aka ata ci hwuŋ, hi zhɛ hi na twa-u'wo iwɛ agwuma hiŋ na ehi meme teleji, ama AGWANGWAMA tuba zha shɛ a shɛlaga hwuŋ u'wo hiŋ o.

¹⁹Ama atwa ata lacɛ unu Samuɛl tuhwuga, ɛɛ hiɛŋ bụ, Awo! Ta jala agwuma na zhɛ ma tu untangana,

²⁰iwɛ maa ta sha du gana anya edenji elele, maa bu no tu hwulono umbe nu ujasa tɛnda.

²¹Tu ga Samuɛl shɛlajɛ iyi elele nɛ atwa ata dumanjɛ hwɛɛ, bee gwuleneni bee swegeni mu AGWANGWAMA.

²²AGWANGWAMA jishijɛ Samuɛl, bɛɛ hiɛŋ, Lonono aŋ iyi nɛ aa jɛmɛ, maa teleji aŋ agwuma. Nazhɛ ga Samuɛl mbishi atwa ata Isrɛl hwɛɛ, bɛɛ hiɛŋ aŋ, Bụtụ bụtụ go jiyo nụ ụshɛpwụ ubwa.