Read berom Susumo 11 Bible Online

Susumo 11 - berom bible

Susumo 11

¹E jeng yane, hâ lêm bemât jey mwa há sè hining zɔng.

²Jeng de bemat o ba kyě gwɔsɔ e rwa rak, ko yɛn a wɔ̀ sɛ̀ byel hwak e vwêl Babilɔnya, yɛn a sangal e hwomo.

³Ko yɛn a ha na bemɛn, ba ye, “Vey in, na wot yong bagat bwos, wot ráng vɛ naka.” Yɛn a ra fwom na bagat bwos e tô beta, na kwolta e tô bwos.

⁴Ko yɛn a ye, “Tik na wot a lɔk a bato mot repomo, na wot a lɔk gwotyɔ̌n gwolwis de gwô wɔ wul larwak! Ano de wot e bin sɛ̀ reza. Lɔ́k hemo hê wuna hot, yaga na wot kwon shara hot kpɛɛ e jey mwa wɛt.”

⁵Dagwi Darwey a gyirik, na a di repomo mo tanga gwotyɔ̌n gwolwis de bemat o ba ga lɔk.

⁶Ko a ye, “Hàa! Yɛn a sé regyɛng bemat vining, mwa hɛn lem mɛn hining. Ko di, yerê pyɛ de ba pɛrɛ yɛ! E ngamo nuyel, vit a pyɛ de yɛn e simo ra de yê dal ɛn!

⁷Tik na wot gyirik, wot suk balem mɛn, yaga na yɛn a bin dun pyɛ de bê ha e tē mɛn.”

⁸Ano de Dagwi Darwey a shara hɛn kagwa e neyɛnɛ̂ jêy mwa, ko fwôm lɔk o gwa tumal.

⁹Yaga ano, ba yila kwɔn o, à Babilɔn,[19] yaga e hwomo de Dagwi Darwey a suk balêm mwâ bemat. Yi e hwomo kwong de a shara hɛn kagwa e neyɛnɛ̂ jêy mwa.

¹⁰Yére Shɛm a yet ngan: Jeng de Shɛm a vɔk neshey naga, a tɔ Arpakshat neshey neba e bamâ tɛmɛ-nshi.

¹¹E bamâ tɔ̂ Arpakshat, Shɛm a to ros neshey naga betungun (500), a to sɛ̀ nèy bewen na behwong.

¹²Jeng de Arpakshat a wul neshey kuru batat na nɛ netungun (35), a tɔ Shela.

¹³E bama mo, a ros neshey naga benaas na nɛ netat (403), a vɔk nèy nehak bewen na behwong.

¹⁴Jeng de Shela a wul neshey kuru batat (30), a tɔ̀ Ɛbɛr.

¹⁵A ros neshey naga benaas na nɛ netat (403), a vɔk nèy nehak bewen na behwong.

¹⁶Jeng de Ɛbɛr a wul neshey kuru batat na nɛ nenaas (34), a tɔ Pɛlɛk.

¹⁷Ko a ros neshey naga benaas na kuru batat (430), a vɔk nèy nehak bewen na behwong.

¹⁸Jeng de Pɛlɛk a wul neshey kuru batat (30), a tɔ Rɛyu.

¹⁹E bama mo, a ros neshey naga beba na nɛ shanetat (209), a vɔk nèy nehak bewen na behwong.

²⁰Jeng de Rɛyu a wul neshey kuru batat na nɛ neba (32), a tɔ̀ Sɛruk.

²¹A ros neshey naga beba na nɛ netaama (207), a vɔk nèy nehak bewen na behwong.

²²Jeng de Sɛruk a wul neshey kuru batat (30), a tɔ Nahor.

²³E bama mo, a ros neshey naga beba (200), a vɔk nèy nehak bewen na behwong.

²⁴Jeng de Nahor a wul neshey kuru baba na nɛ shanetat (29), a tɔ Tɛra.

²⁵Ko Nahor a ros neshey naga na kuru rining na nɛ shanetat (119), a vɔk nèy nehak bewen na behwong o.

²⁶Jeng de Tɛra a wul neshey kuru bataama (70), a tɔ Abram, na Nahor, tanga Haran.

²⁷Yére Tɛra a yet ngan: Abram, na Nahor tanga Haran, ko Haran yɛ à dâ Lɔt.

²⁸Haran a tānga ku e ra da mɛ Tɛra e vwêl tɔ mɛ, e repomô Ur wo BeBabilɔn.

²⁹Abram tanga Nahor yɛn a vos beha. Zâ hwâ Abram à Sarai, ko hwâ Nahor ba tang ɛ a Milka. Gwà hwong Milka à Iska, ko da mɛn à Haran.

³⁰Sarai, hwâ Abram, a sé sang-gwon, vit a hɛ na hwey.

³¹Ko Tɛra a jut hwey mɛ Abram, na Lɔt, hwêy sɔ mɛ Haran, tanga Sarai, hwâ sɔ mɛ Abram o. Mwa hɛn ba kaba gwong yi e Ur wo BeBabilɔn vɔk e sevwêl Kanaan, ko jeng de yɛn a wul Haran, ba sangal e hwomo.

³²Neshey Tɛra mwa e jey na sé naga beba na nɛ netungun (205), a ku.