Read berom Susumo 12 Bible Online

Susumo 12 - berom bible

Susumo 12

¹Dagwi Darwey a yâng Abram, “Nusu hwo yi e vwel mō, yi na cáng mō tanga lɔ da mō vɔk e vwel de ma rɔda dura a hwo.

²“Ma rɔda nɔng o yere pyak, ko yê ba tɛ́ ɛ yerê bemât jey ryey o. Mê tɛ̀ a hwo nerat, ko mê tɛ̀, hwo vɔk gbong reza; ko yaga hwo, mê tɛ̀ nerat e ra bemât jey.[20]

³Vemo de bê mok a hwo netyang, ma rɔda nɔng ɛn netyang, ko vemo de bê mok a hwo gawey, ma rɔda kyini hɛn. Mwa yére bemasi e jey yê ra won, na me tɛ̀ nerat e ra yɛ̄, sede remo de ma tɛ̀ nerat e ra hwo.”[21]

⁴Abram a ra sede remo de Dagwi Darwey a kana nɔng ɛ nu. A vɔk neshey kuru bataama na nɛ netungun (75) jeng de a tik repomô Haran. Sarai, hwā mɛ, tanga Lɔt, hwêy gwà mɛ, ba kyè tanga yɛ. Yɛn a kaba gwong vɔk e sevwêl Kanaan na yas tanga besam mɛn de yɛn a kana sɛ̀ e Haran. Jeng de yɛn a wul Kanaan,

⁶Abram a re nuyel na kwɛngɛl, sɛ̌ a wɔ wul cɔgɔt ouk ye More e kwɔ̂n rê fongol e Shɛkɛm. E jeng yane BeKanaan yɛn vɛ à bedâ vwel o.

⁷Ko Dagwi Darwey a dura to mɛ na Abram, a ye, “Ma rɔda nɔ̂ng yere mō vwel hemo.” Ko Abram a lɔk ɛ gàgbang rangâs yas vɔk na Dagwi Darwey e hwomo, yɛ de a dura to mɛ na yɛ.

⁸Yi e kwɔn o a gwɛ̌ sek vɔk e rwa batin vɔk e vwêl bahwol de ha sé e rwa rak na Bet-Ɛl. A tɛ̀ buk e hwomo, a gang repomô Bet-Ɛl e rwa tā ko repomô Ai e rak. E hwomo arɔng a lɔk gàgbang rangâs yas, ko a re a Dagwi Darwey fongol.

⁹E bama mo, a re nuyel na kwɛngɛl, a tá nu wɔ e rwa batîn vwêl Kanaan, a kyè na tɛ́sɛ nekwɔn ye ngyɔk.

¹⁰E jeng yane, vyong yá sè e ji vwêl Kanaan, ko yaga yá kat sizɔng, Abram a sogo, a raa rwa batin vɔk e sevwêl Misra, na a ka sangal ɛ.

¹¹Jeng de a vey lɛs, na a yel e Misra, ko a yâng hwā mɛ Sarai, “Hwà sé zɛrɛ̂ hwā.

¹²Jeng de bemât Misra bê di o, ba rɔda bare, hwà sé hwā hom. Yɛn a rɔda mɔrɔ me, ko bê tik o na neken.

¹³Ko di, yang ɛn, hwà sé gwa hom, yaga na kayɛ pyɛ ye kyè a me tyang, ko bê tik me kwen yaga hwo.”

¹⁴E jeng de Abram a yel e Misra, bemât Misra mo ba di hwā mɛ a sé zɛrɛ tyɔng o wɛt.

¹⁵Ano arɔng jeng de behak e ji bemât badu gbɔng gwɔ̀m Farawo ba di hwā mo na nezɛrɛ mɛ, ba wɔ dak kaa mɛ na Farawo, ko ba jut ɛ vɔk e lɔ mɛ.

¹⁶Yaga yɛ, Farawo a ra a Abram pyɛ́ ryat. A nɔng ɛ vyēl, na berɔndɔng, na bemadung, na bemaryat tanga besam beras na beha.

¹⁷Ko Dagwi Darwey a ták a Farawo na belɔ mɛ na nezap tumbang neves, yaga a jut hwâ Abram.

¹⁸Jeng de Farawo a di ano, a yila Abram, a yang ɛ, “E sɛ́ de hwà ra a me ano ɛ? Yaga sɛ́ de hwà yang me, a sé e hwā mō a womo wɛt ɛ?

¹⁹Yaga sɛ́ de hwà ye, a sé e gwa mō a wɛ, ko ma ga jut ɛ, a tɛ́ ɛ hwā hom ɛ? Remo, nā hwā mō; jut ɛ, na yin kyè!”

²⁰Ko a nɔ̂ng bemat mɛ nu, yɛn a pat ɛ, be kyè na yɛ vɔk e yɛnɛ̂ sevwêl Misra tanga hwā mɛ na mwa pyɛ́ de a vɔk.