Read berom Susumo 13 Bible Online

Susumo 13 - berom bible

Susumo 13

¹Abram a tik sevwêl Misra, a to ɛ vɔk e rwa batîn vwêl Kanaan, yɛ tanga hwā mɛ, na pyɛ́ de a vɔk mwa. Lɔt a kyè tanga yɛ arɔng.

²Abram á sè gbɔng darwey, a vɔk yas, tanga dyām pyɛng, na dyām shinang pyak.

³Ko a kyè kwɛngɛl yi e kwɔn de a sé ɛ, a kyè na tɛsɛ nekwɔn ye ngyɔk vɔk e Bet-Ɛl. A wul kwɔn de buk mɛ gwa kana sè ɛ e tê Bet-Ɛl na Ai,

⁴kwɔn de a ga kana lɔk ɛ gàgbang rangâs yas vɔk na Dagwi. E hwomo a re a Dagwi Darwey fongol.

⁵Lɔt arɔng, yɛ womo de a kyè tanga Abram, a vɔk kàra vyēl, na berɔndɔng, tanga bemât fwom.

⁶Yaga ano, vwel o ha vey yaga na yɛn beba be sangal ɛ wɛt, yaga yas mɛn ya sé pyak. Ano kwong kwɔ̂n sangal yaga mwa hɛn ha radɛ hɛ.

⁷Repugu ra yel e tê bemât gyeng yas Abram tanga vê Lɔt. (E jeng yane bemât Kanaan tanga BePɛrizi ba sè e vwel o arɔng.)

⁸Ko Abram a yâng Lɔt, “A jam na repugu re sè e tē mot wɛt, kɛ na bemât gyeng yas mot arɔng wɛt, yaga wot a sé begwa.

⁹Vwel a hemo e ji vwɔ mō. Ê jam na wot gas ot: Sede hwà kasa bak vwɔ mwɛlɛng, ko mê raa vwɔ yege, ko ka sede hwà kasa bak vwɔ yege, ko mê raa vwɔ mwɛlɛng.”

¹⁰Lɔt a ye ganga, ko a di Nɛk Yɔrdan de wa vɔk nshi kagwa wɔ̀ ta e Zowar. Gyam na Dagwi Darwey a wey na Sɔdɔm tanga Gɔmɔra, nɛk o wá sè sede Gwobwî Ɛdɛn[22] kɛ sede Nɛk Nil e Misra.

¹¹Yaga ano, Lɔt a kasa a to mɛ Nɛk Yɔrdan mwa, a kaba gwong, a raa rwa rak. Ano de yɛn a gas ɛn na bemɛn.

¹²Abram a sangal e sevwêl Kanaan, ko Lɔt a sangal e tê bagbɔng bapomo de ba sé e nɛk, a tɛ̀ buk mɛ bagat na Sɔdɔm.

¹³Bemât Sɔdɔm bá sè bemat beves, bemât ragâs banɛn sizɔng e nuyel Dagwi Darwey.

¹⁴E bama de Lɔt a ga tik kwɔn o, ko Dagwi a yâng Abram, “Ye ganga yi e kwɔn de hwà sé ɛ̀, bɛrɛng rwa rak na ta, tanga rwa bato na batin.

¹⁵Mwa vwel hemo de hwà sé bɛrɛng, e hwo na yere mō de mê nɔng in hɛ neshey gbak-gbak.

¹⁶Ma rɔda tɛ̀ yere mō sede bazɛk de vit a mwat de e tɔk bara, sɛ̌ e tɔk bara bazɛk!

¹⁷Sogo, na hwo kyè mwa e vwel o, e neyɛnɛ nerey hɛ, yaga ma sé nɔng o hɛ.”

¹⁸Ko ano de Abram a pat buk mɛ, a kyè, a wɔ sangal bagat na cɔ́gɔt ouk yê Mamrɛ, yemo de ya sé e Hɛbrɔn. E hwomo a lɔk gàgbang nɔrɔ vɔk na Dagwi Darwey.