Read berom Susumo 15 Bible Online

Susumo 15 - berom bible

Susumo 15

¹E bama de pyɛ́ yemo ya té, Dagwi Darwey a ha a Abram e ji negwi-ywey, a ye, “À Abram, hwo vɔk bengyip wɛt, mɛ wɛ à ruga mō, mê nɔng o pyɔlɔ pyak.”

²Ko Abram a ye, “À Darwey, Dagwi Darwey, e sɛ́ de hwà rɔda nɔng me ɛ? Me a womo vit à hwey. Mwat de e re nedanelɔ hom, yɛ à Ɛliyɛzɛr wo Damaskus.”[23]

³A to ye, “Di, yaga hwà nɔng me yere wɛt, remo gbɔng o e ji bemât fwom hom e re nedanelɔ hom.”

⁴Ko Dagwi Darwey a to ha na yɛ, a yang ɛ, “Wey, yɛ wane mo a rɔda re nedanelɔ mō wɛt; a sé e hwêy jim mō hɛ de hê re nedanelɔ mō.”

⁵Ko a nusu na Abram e majey, a yang ɛ, “Me simo hwo bɛrɛng vɔk e larwak, na hwo bara netangacɛn, sede hwó tɔk bara nɛ.” Ko a to yang ɛ, “Ano de yere mō yê ba sè.”

⁶Abram a tɛ̀ gap mɛ e ra Dagwi Darwey, ko yaga tɛ̂ gap mɛ mo, Dagwi a jut ɛ mwat de a sé cik.

⁷Dagwi a to yang ɛ, “E me wɛ, à Dagwi Darwey de ma pat o yi e Ur wo BeBabilɔn, yaga na me bin nɔng o vwel hemo, na he tɛ́ ɛ mō.”

⁸Ko Abram a rangal, a ye, “À Darwey Dagwi Darwey, yi e rɛ̌ de ma rɔda tɔk, vwel o he kyè wɔ̀ tɛ́ ɛ nang arɛt?”

⁹Dagwi kwong a hanat, a yang ɛ, “Vey a me na shep rɔndɔng ye neshey netat, na shep vyel shi ye neshey netat, na turuk de wa vɔk shey tat, na wǔtut, tanga bwôt wunung.”

¹⁰Abram a vey a Dagwi na pyɛ́ yane mwa. A yɛt yɛ, a vugu kayɛ mo e tē, a ngyɛrɛ bedɔ̀rɔ mo e hagât bemɛn, ko a vugus benon wɛt.

¹¹Sede benon rê banama ba gyirik e ra banama mo, ko Abram a ro vɛ.

¹²Jeng de gwi gwa wɔ́ wɔ̀ gaba, nevwâ reku na vo Abram, ko bengyip beves ding-ding ba vo ɛ.

¹³Dagwi Darwey a yang ɛ, “Tɔk gbing-gbing, yére mō yê tɛ́ ɛ bemat beduk e vwel de ha sé mɛn wɛt. Ba rɔda ra fwôm sesam, ko ba rɔda tak a yɛn neshey naga benaas (400).

¹⁴Ko ma rɔda ra a yerê bemât jey yane de yɛn e ra a yɛn fwôm sesam shɔt. E yɛnɛ mo, yɛn e hala kwɔn o na nedanerey pyak.

¹⁵Ko hwo pyɛ mo, hwô vɛ́ neshey, hwô to o tyang vɔk na beda mō, ko ba rɔda ba how o.

¹⁶Ê sè e zamang hê naas de yere mō yê tɔk ba toyo vey e ngamo; yaga mê pat BeAmɔr yi e vwel hemo e ngyen wɛt, sɛ̌ yɛn a gwɛ̌ kát ɛn e neves, na me yɛrɛ a yɛn shɔt.”

¹⁷Bama de gwi gwa gaba, lwīl mwangalang gwa hwo, ko Abram a pere di gwokywa kya de kyeng he tugus ɛ, tanga kyâ semwol, ba kwey e tê bedɔ̀rɔ banama de ba ga kana ngyɛrɛ vɛ.

¹⁸E jeng o, Dagwi Darwey a wuna sira na Abram, a ye, “Ma rɔda nɔ̂ng yere mō vwel hemo mwa, pyɛ de ya kaba yi e rɔt Misra vɔk e Gwɔrɔt Ɛifaratɛs,

¹⁹hɛ à mwa vwel de BeKeni, na BeKenizi, na BeKadmɔn,

²⁰na BeHiti, na BePɛrizi, na BeRɛfa,

²¹na BeAmɔr, na BeKanaan, na BeGirgash tanga BeYebus ba sé ɛ na sangal a remo.”