Read berom Susumo 16 Bible Online

Susumo 16 - berom bible

Susumo 16

¹Sarai, hwâ Abram, á ka tɔs a Abram nèy wɛt. Ko á vɔk sam hwong WoMisra, de bá tang ɛ, à Hagar.

²Yaga ano á yâng Abram, “Di, Dagwi Darwey a ro me nà tɔs nèy. Yel na sam hwong hom. Gyɛng yi ano ma rɔda sɛ̀ hwey wen yi na yɛ.” Abram a wok hâ hwā mɛ.

³Ano kwong, Sarai a nɔ̂ng rwas mɛ Abram sam hwong mɛ, na a tɛ́ ɛ jɛn-hwā mɛ. E jeng yane mo, Abram a ga kana ra neshey kuru e vwêl Kanaan.

⁴Abram a yel na Hagar, Hagar kwong a sey jim. Sede a di, a ga vɔk jim, ko a hwo byɛs delɔ mɛ.

⁵Ko Sarai a yâng Abram, “Mɔt de ba mɔt me, tik na he sǎ e ra hwo! E me de ma ga nɔng o sam hwong hom, na hwo gunung hɛ, ko jeng de a ga vɔk jim, a ga hwo byɛs me! Tik na Dagwi Darwey a ra shɔt e tē hom na hwo!”

⁶Ko Abram a yâng Sarai, “Di sam hwong mō a sé e vwɔ mō, ra pyɛ de hwà simo na yɛ.” Ano kwong, Sarai a dura a yɛ yɔ́m, ko Hagar a tele yi na yɛ.

⁷Tom-lagwî Dagwi Darwey a sɛ̀ Hagar e bak lwêl nshi e hey, e gwɛ à lwêl nshi de gwa sé e gwông Shur.

⁸Ko a yang ɛ, “À hwo Hagar, sam hwông Sarai, hwà nusu yi e gwa arɛt? E gwa de hwà sé kyè vɔk ɛ?” A ye, “Ma sé tele yi na Sarai, delɔ hom.”

⁹Tom-lagwî Dagwi Darwey a yang ɛ, “Toyo hwo na delɔ mō, dyɛng to mō na yɛ!”

¹⁰A to yang ɛ, “Ma rɔda tɛ̀ yere mō ye gwɛsɛ hɛ sizɔng, bê tɔk bara yɛ̄ wɛt yaga nehywɔ̂t yɛ̄.”

¹¹A to gwɛ̌ a yɛ, “Di, hwà vɔk jim, hwô tɔ̀ hwey, hwô vo a hɛ rezâ Ishmayɛl,[24] yaga Dagwi Darwey a ga wok sesin mō.

¹²Ê sè mwat de e vɔk negwɔn madung, e ra repugu na kawɛ mwat, ko kawɛ mwat arɔng e ra repugu na yɛ. Ê sangal gakang yi na cáng mɛ.”

¹³Ko Hagar a ye, “E mwin de ma ga di Dagwi, ko mê to nàra kwen arɛt?” Ko a yila Dagwi Darwey, de a ga ha na yɛ, na reza wɔgɔ, “Hwà sé Dagwi wo bɛrɛng me.”[25]

¹⁴Yaga ano ba vo a hwes o rezâ Bɛɛr-Lahai-Royi;[26] gwa sé e tê Kadɛsh tanga Bɛrɛt.

¹⁵Hagar a tɔ a Abram hwey, ko Abram a vo a hɛ rezâ Ishmayɛl.

¹⁶Abram a vɔk neshey kuru rwit na nɛ netyiimin (86) jeng de Hagar a tɔ a yɛ Ishmayɛl.