Read berom Susumo 17 Bible Online

Susumo 17 - berom bible

Susumo 17

¹E jeng de Abram á vɔk neshey kuru shabatat na nɛ shanetat, Dagwi Darwey a dura to mɛ na yɛ, a yang ɛ, “Me wɛ à Dagwi Wo Reto Mwa. Tik na hwo sangal sángal de ha jam a me, na hwo bin sè gyat.

²Mê wuna sira na hwo, mê gwɛ̌ yere mō hyɔt.”

³Abram a gaba gup e vwel, ko Dagwi a to yang ɛ,

⁴“Wuna-na-sira hom a het ngan: Hwà rɔda tɛ́ o dâ yére bemât jey pyak.

⁵E ngamo nuyel bê to be yila reza mō, à Abram[27] wɛt, ko za mō ha rɔda sè Abraham,[28] yaga ma sé tɛ̀ o dâ yére bemât jey pyak.

⁶Mê nɔng o yére pyak sizɔng, yemo de yê tɛ́ ɛ yére bemât jey detidetu, ko yi na hwo bê sɛ̀ begbɔng begwɔ̀m.

⁷Ma rɔda gyeng wuna-na-sira hom na hwo, na yere mō de ya to raa bama mō; wuna-na-sira mo à hane vit à yɛnɛ. Mê tɛ́ me Dagwi mō, na wo yere mō ye bama mō.

⁸Mê nɔng o, hwo tanga yere mō ye bama mō, vwêl rekyɛn mō, hɛ à vwêl Kanaan. Mwa vwel hê tɛ́ ɛ pyɛ nedanelɔ mō nesheneshey. Me kwong mê tɛ́ me Dagwi mɛn.”

⁹Dagwi a re nuyel, a ye, “Hwo, hwô gyeng sira hom, hwo na yére mō yê bama mō, mwa wɔ̀ sɛ̀ bezamang mɛn.

¹⁰Wuna-na-sira ma het de hwô gyeng, hwo na yere mō ye bama mō: Be wɔ́ a kawɛ rwas e cwɛl.

¹¹Yin e yosom hin, ko hê tɛ́ ɛ pyɛ de yê dura, ma ga wuna sira hom na yin.

¹²Yi e remo, mwa hwey wen de ba tɔ e ji min bê yosom hɛ e tuk hê rwit. Bê ra ano mwa wɔ̀ sɛ̀ bezamang min, kɛ a sé e ji nèy lɔ, kɛ sam de hwà sey na dyām yi e yere dyuk ayi.

¹³Mwa yɛn beba, nèy lɔ na besam, gbing-gbing be yosom hɛn. Yi ano, sira hom hê sè e ra rebek min nesheneshey.

¹⁴Kawɛ rwas de ba yosom hɛ wɛt, mwat wane mo bê pat ɛ yi e ji bemat hom, yaga a ga gyili wuna-na-sira hom.”

¹⁵Dagwi a to gwɛ̌ yâng Abraham, “Hwo to yishi hwā mō, à Sarai wɛt, ko bê tang ɛ, à Sara.[29]

¹⁶Mê tɛ̀ a yɛ nerat, ey, mê nɔng o hwey wen yi na yɛ. Mê tɛ̀ nerat e ra yɛ, yaga na a bin tɛ́ ɛ neng yére bemât jey detidetu, ko bê sɛ̀ begwɔ̀m yi e ji yére mɛ.”

¹⁷Ko Abraham a gaba gup e vwel, a hwo shɛgɛsh, a ye e yey mɛ, “Bê tɔ a gwomwakuk de gwa ga re neshey naga hwey a? Sara de a vɔk neshey kuru shabatat (90), remo à wɛ de e tɔ hwey a?”

¹⁸Ko a yâng Dagwi, “Ka ba yâng tik na Ishmayɛl a sɛ̀ nerat mō arɔng!”

¹⁹Ko Dagwi a yang ɛ, “Mwa ano, hwā mō Sara yɛ wɛ de e tɔ a hwo hwey wen, ko hwà rɔda vo a hɛ rezâ Yishak.[30] E yɛ kwong de mê gyeng wuna-na-sira hom na yɛ vɔk e nesheneshey, tanga yere yɛ bama mɛ arɔng.

²⁰Rehâ Ishmayɛl kwong, ma ga wok. Di, mê tɛ̀ a yɛ nerat, mê nɔng ɛ yere, ko mê gwɛsɛ nepyak mɛn pyak-pyak. A rɔda tɛ́ ɛ dâ nèy gwɔ̀m kuru na vɛ beba, mê tɛ̀ ɛ, a sè dâ yerê bemât jey ryey.

²¹Ko a sé na Yishak de ma rɔda gyeng sira hom, yɛ de Sara a rɔda tɔ̀ a hwo nak, jeng ngan.”

²²Jeng de Dagwi a yɛnɛ ha na Abraham, ko a vɛ̌ kyè, a tik ɛ.

²³E tuk hane mo, Abraham kwong a jut Ishmayɛl, hwey mɛ, tanga mwa besam de ba tɔs ɛn e ji lɔ mɛ, na vemo de ba sey na dyām, ko a yosom kawɛ rwas e ji bemât lɔ mɛ tyɛng na hâ Dagwi.

²⁴Abraham á vɔk neshey kuru shabatat na nɛ shanetat (99) jeng de ba yosom hɛ.

²⁵Ko Ishmayɛl, hwey mɛ, ha vɔk neshey kuru na nɛ netat (13) jeng de ba yosom hɛ.

²⁶E ji tuk hining o ba yosom Abraham tanga hwey mɛ Ishmayɛl,

²⁷tanga mwa beras e ji bemât lɔ mɛ, vemo de ba tɔs ɛn e ji lɔ mɛ, na vemo de ba sey ɛn na dyām yi e yére dyuk.