Read berom Susumo 18 Bible Online

Susumo 18 - berom bible

Susumo 18

¹Tuhak, Abraham á sè e sangal bagat na cɔ́gɔt ouk yê Mamrɛ, á sè sangal e rwi buk. Jeng o yá sè tê-gwi, ko Dagwi Darwey a dura to mɛ na yɛ.

²Abraham a ye ganga, ko a di bemat betat e tumal. Sede a di ɛn, a yi na tele, a wɔ̀ sey ɛn. A gaba e cât bol mɛn,

³a ye, “À dagwɔ, ra a me pyɛ de ya jam, hwo kwon kwey nà ye rɛng e lɔ hom wɛt. Ma sé mwo!

⁴Tik na be nɔt in nshi, na yin kus mɛ̀ bol min, ko yin ka pɔnglɔ e necam tîn cɔgɔt hemo.

⁵Me kwong mê kyè wɔ̀ vey na kepyɛ re, na yin ye mɛ̀ shɛ̀k. Sede remo de yin a pe ye rɛng na mwat min, ko yin de re nuyel na kwɛngɛl min.” Ko yɛn a ye, “Ey yàa, ra tyɛng na pyɛ de hwà ha.”

⁶Abraham a kyè dey-dey vɔk e buk na Sara, a yang ɛ, “Jut gwopey nemuk ne myeenen ziri, bɔrɔk nɛ, na hwo yongta mɛ̀ bworô kpam-tuk rwat o!”

⁷E bama mo, a tele vɔk e kwara mɛ, a vo bwot mus rwat o, a tɛ̀ mwât fwom mɛ, a yong a yɛ wɛ e ji jeng.

⁸E yɛnɛ mo, a jut nevasal, na nevasâl gàt de na sé pɔgɔdɔk, tanga namâ mus o, a wɔ̀ nɔng ɛn e hwomo e necam cɔgɔt o. Yɛn ba re, Abraham a sè gyeng e hwomo na yɛn, yɛn a sè re pyɛ́ mo.

⁹Yɛn a yâng Abraham, “Hwā mō Sara a sé e gwa arɛt?” A ye, “A sé e ji buk.”

¹⁰Kwɛnɛt o hwak a ye, “Mê to me vey tyɛng jeng yemo nak, ko hwā mō Sara e kana vɔk hwey.” Sara a sé e rwi buk e bama mɛ, e weres betong.

¹¹E jeng o Abraham na Sara ba ga kwopos, ba ga kana pɔl ba, Sara a to bɛɛ berang wɛt.

¹²Ko Sara a shɛgɛsh e ji yey mɛ, a bare, “Kée-oo! E bama de jeng tɔ ya ga kwéy a me, ko dalɔ hom a ga kwop, mê to wok netâ ra pyɛ mo arɛt?”

¹³Dagwi Darwey a yâng Abraham, “Yaga sɛ́ de Sara a shɛgɛsh ɛ? Ko a ye, ko sɛ̌ e tɔ̀ hwey e bama de a ga kana kwop a?

¹⁴Pyɛ cak ya sé de ya dal gâp Dagwi Darwey arɛt? Di a remo, ma rɔda to me ba toyo tyɛng jeng yemo nak, ko Sara e kana vɔk hwey.”

¹⁵Ko Sara a tono, a ye, “Ma shɛgɛsh wɛt.” A ha ano, yaga a wok bengyip. Ko mwat o a ye, “Ey, hwà shɛgɛsh.”

¹⁶Ko Abraham a wɔ̀ tɛ̀ ɛn e gwong, yɛn a kyè wɔ̀ wul kwɔn de bê tɔk di repomô Sɔdɔm.

¹⁷Ko Dagwi Darwey a bare, “Ma rɔda lɛrɛ a Abraham na pyɛ de me kyè wɔ̀ ra arɛt?

¹⁸Yerê Abraham yê tɛ́ ɛ yerê bemât jey ryey o. Yê vɔk reto, ko mwa yére bemasi e jey yê ra won, na me tɛ̀ nerat e ra yɛ̄, sede remo de ma tɛ̀ nerat e ra yɛ̀.

¹⁹Ma ga kasa hɛ, na a bin basa a nèy mɛ tanga yere mɛ, bè gyeng begwong hom, na be ra pyɛ́ de ya jam, ko ya to sé cik. Ka sede yɛn a ra ano, mê tɔk sila a Abraham ha de ma kana ha a yɛ.”

²⁰Ko Dagwi Darwey a ye, “Sekun e ra Sɔdɔm tanga Gɔmɔra sa kat, banɛn mɛn kwong ba sé baves ding-ding!

²¹Mê gyirik vɔk e hwomo, na me di a bayis hom, kɛ yɛn a ra ano mo, tyɛng sede kun de ha vey tá na me, kɛ wey arɛt?”

²²E bama mo, bemat beba e ji mo ba vo gwông Sɔdɔm, ko Dagwi Darwey a rɔ̀ngɔl na Abraham.

²³Ko Abraham a gwɛ̌ wɔ bagat, a ye, “Ko sɛ̌ hwô wey na mwat de a sé cik tanga mwat vwes arɛt?

²⁴Ka sede e bemat kuru batungun e ji repomo mo de ba sé cik, hwô wey na mwa repomo mo a? Hwô tik repomo mo yaga vane kuru batungun de ba sé cik wɛt a?

²⁵Hwô tɔk ra pyɛ sede yane ko tyɔng wɛt, hwo kwon wuna mwat de a sé cik na womo de a sé cik wɛt! Kée wey, pyɛ yemo yê yi na hwo wɛt! Hwo de hwà sé wo ra a mwa jey shɔt, hwô ra pyɛ de ya sé cik wɛt a?”

²⁶Ko Dagwi Darwey a toyo a yɛ, “Ka ma sɛ̀ bemat kuru batungun de ba sé cik e Sɔdɔm, ko mê hàla a bemât repomo mo mwa yaga kuru batungun vane mo.”

²⁷Abraham a to ye, “Di, ma ga hwɔtɔ a to hom ha na hwo, à Darwey, me de ma vey pyɛ cak wɛt:

²⁸Ka gyeng betungun ba sé vit e ji kuru batungun de ba sé cik o, hwô wey na mwa pomo mo, yaga betungun de ba sé vit o arɛt?” Ko Dagwi a ye, “Ma rɔda wey na pomo mo wɛt, ka sede ma sɛ̀ bemat kuru banaas na vɛ betungun e hwomo.”

²⁹Abraham a to ye, “Ka gyeng ba sɛ̀ kuru banaas e kwɔn o ɛ?” Dagwi a toyo a yɛ, a ye, “Yaga kuru banaas o ma rɔda ra wɛt.”

³⁰Abraham a ye, “À Darwey, hwo tɛ̀ shom wɛt, mê to hanat, ka gyeng ba sɛ̀ kuru batat e hwomo ɛ?” Dagwi a ye, “Ma rɔda ra wɛt, sede ba sɛ̀ bemat kuru batat e hwomo.”

³¹Ko Abraham a ye, “Di, ma ga hwɔtɔ a to hom ha na hwo, à Darwey: ka gyeng ba sɛ̀ kuru baba e hwomo ɛ?” Dagwi a hanat, a ye, “Yaga vane kuru baba ma rɔda wey na pomo mo wɛt”.

³²Ko Abraham a ye, “À Darwey, hwo tɛ̀ shom wɛt, mê to hanat zang hining hemo zɔng. Ka gyeng ba sɛ̀ bemat kuru zɔng e hwomo ɛ?” Dagwi a ye, “Yaga kuru vane ma rɔda wey na pomo mo wɛt.”

³³E bama de a ga yɛnɛ ha na Abraham, Dagwi Darwey a kyè. Abraham arɔng a toyo vɔk e lɔ.