Read berom Susumo 2 Bible Online

Susumo 2 - berom bible

Susumo 2

¹Ano de ba tala yông jey na lagwi mwa na bwâng pyɛ́ e ji mo.

²E tuk hê taama, Dagwi a ga kana tala fwom de a ra, a tumal fwom mwa de a ga ra.

³A tɛ̀ nerat e ra tuk hê taama, ko a tik hɛ jaram, na he sè mɛ, yaga e tuk a hane de a tumal mwa fwôm yông jey.

⁴Gwong a gwomo de ba yong jey na lagwi. Jeng de Dagwi Darwey[3] a yong jey na lagwi,

⁵vit à baburuk kɛ sɔng e hey de gwa ga tulu e ngyen, yaga Dagwi Darwey a ga kana tɛ̀ rwak wo rop e ra vwel wɛt, ko vit à mwasi de e how hɛ.

⁶Ko lwel gwa nunus na nshi yi e vwel, nà sing vwel o.

⁷Dagwi Darwey a vɛ nefongol,[4] ko a yong mɛ̀ mwasi,[5] a pɛl a yɛ nesong neken e ji wol mɛ, ko mwasi mo a tɛ́ ɛ wo neken.

⁸Dagwi Darwey a yong gwobwi e yɛnɛ̂ vwêl Ɛdɛn, e rwa rak. E hwomo de a tik ɛ̀ mwasi de a yong.

⁹Ko a tɛ̀ mwa yére batîn cɔ́gɔt de ba sé barat, de ba nɔngɔs nèy nerat nè re, ba ras e ji gwɛ. E tê bwi mo retîn cɔgɔt ra sé de ra nɔngɔs neken tanga rehak de ra nɔngɔs tɔ̂k pyɛ́ ryat na pyɛ́ vyes.

¹⁰Gwɔrɔt gwa nusu yi e Ɛdɛn, ko bwi mo gwa sɛsɛm nshi yi e gwɛ. Yi e hwomo gwa gas ɛ zang naas.

¹¹Rezâ hê mɛsɛng o, à Pishɔn. E hɛ de ha kwey e mwa yɛnɛ̂ sevwêl Havila, e hwomo de ba sɛsɛm dyam shinang.

¹²Dyam shinang sevwel o ya sé celes o. Be to sɛsɛm yerê negang nehwogot ne nesang hyɔɔlɔl de be tang nɛ, à bedeliyum, tanga dyéngere ryat de be tang yɛ, à onis.

¹³Rezâ rɔt hê neba mo, à Gihɔn. E hɛ de ha kwey e mwa yɛnɛ̂ sevwêl Kush.

¹⁴Rezâ rɔt hê netat o, à Tigris. E hɛ de ha kwey e rwa rak na sevwêl Asirya. Ko rɔt o hê nenaas hɛ, à Ɛifaratɛs.

¹⁵Dagwi Darwey a tik mwasi mo e ji Bwî Ɛdɛn, na a ra fwôm gwɛ, na a to bɛrɛng gwɛ arɔng.

¹⁶A nɔng ɛ nu, a ye, “Hwô tɔk re yi e ji nèy kayɛ yerê cɔgɔ̂t bwi mo.

¹⁷Ko retîn cɔgɔt remo de re nɔngɔs tɔ̂k pyɛ́ ryat na pyɛ́ vyes, hwo kwon re nèy rɛ wɛt! Jeng de hwà re nɛ, ko hwà rɔda ku.”

¹⁸Dagwi Darwey a ye, “A jam de mwasi a sangal nju mɛ wɛt. Ma rɔda yóng a yɛ sâ sangal de e jam a yɛ, na a sè mwât sɛlɛ mɛ.”

¹⁹Ano kwong a vɛ nefongol, a yong mɛ mwa ngyāma na mwa benon. A vey na yɛ̄ na mwasi, na a bin di baza de e vos a yɛ̄, ko karɛ reza de mwasi a nɔ̂ng kayɛ mo reza ma rane.

²⁰Ano de mwasi a nɔ̂ng mwa yas, na ngyāma tanga benon baza. Ko yaga mwasi, ba ga kana sɛ̀ a yɛ sâ sangal wɛt, de a jam a yɛ, na a sè mwât sɛlɛ mɛ.

²¹Ko Dagwi Darwey a tɛ̀ nevwâ reku na vo mwasi mo. Jeng de a sé e ji nɛ, a pat kup hagat mɛ gwining, ko a bang kwɔn o na nama.

²²Na gwokup o a yong mɛ hwā, ko a vey a mwasi mo mɛ̀.

²³Mwasi mo a ye, “Káa, sɛ̌ a remo de mwat sede me! Kup rebek mɛ yi e nwang, nama mɛ yi e nang. Reza mɛ, à hwā,[6] yaga ba pat ɛ yi e ji rwas.”[7]

²⁴Yaga ano de rwas e gas ɛ na da mɛ tanga neng mɛ, ko e wuna hɛ na hwā mɛ, yɛn beba ba rɔda tɛ́ ɛn pyɛ jining.

²⁵Rwas yɛ tanga hwā mɛ bá sè ferem, ko mwa ano á sè a yɛn pyɛ rekyen wɛt.