Read berom Susumo 20 Bible Online

Susumo 20 - berom bible

Susumo 20

¹Abraham a tik Mamrɛ, a vo gwong, a raa vɔk e rwa batîn vwêl Kanaan o, ko a sangal e tê Kadɛsh na Shur. E bama mo a kyè, a wɔ̂ sangal sángal rekyɛn e repomô Gerar.

²E hwomo a ye, hwā mɛ Sara a sé gwa mɛ. Ano gwɔ̀m Gerar a tomo, be jut a yɛ Sara mo.

³Ko e ji nabwalak Dagwi a vey a yɛ e ji negwi, a yang ɛ, “Tɔk, hwô ku, yaga hwā de hwà jut; a sé hwâ weneng.”

⁴Gyam na pyɛ mo ye té, Abimɛlɛk a ga kana wɔ bagat na Sara wɛt, ko a ye, “À Darwey, hwô wey na bemat, mwa ano de vit a hɛn nà nɛn arɛt?

⁵Abraham pyɛ mɛ a ye, Sara a sé gwa mɛ. Ko yɛ Sara pyɛ mɛ arɔng a ye, yɛ a sé gwa mɛ. Ma ra pyɛ yemo vit à tô yey, vit à me na renɛn.”

⁶E ji negwi o, Dagwi a ha a yɛ, “Ma tɔk mwin, hwà ra pyɛ mo vit à tô yey. Yaga ano de ma dul o, gyam hwo rɔngɔl nà ra nɛn, ko ma tik o, na hwo wɔ́ bagat na yɛ wɛt.

⁷Remo kwong, to toyo a mwat wane na hwā mɛ. A sé zarap hom, ko a rɔda ra won e to mō, na hwo nàra kwen. Ka sede hwà toyo na hwā mó wɛt, di, hwó kyè wɔ̀ ku, hwo na mwa bemat de ba sé bemo.”

⁸Abimɛlɛk a sogo bop nagasi, a yila bemât fwom mɛ, a ha a yɛn neyɛnɛ̂ pyɛ́ de ya té mwa. Bemat o ba wok bengyip sizɔng.

⁹Abimɛlɛk kwong a yila Abraham, a yang ɛ, “E sɛ́ de hwà ra a wot ɛ? Ma buru a hwo na sɛ́ arɛt, de hwà hwɔtɔ a me tanga bemat de ba sé e ji segwɔm hom gbɔng rezot ano ɛ? Hwà ra a me pyɛ́ de ya jam, na be ra a mwat wɛt.

¹⁰E sɛ́ de ya tɛ̀, hwà ra pyɛ yemo ɛ?”

¹¹Abraham a ye, “Ma ra ano, yaga ma bare, vit a mwat hwak e ngamo de a wok bengyip Dagwi, ko ba rɔda mɔrɔ me, yaga na be sey ɛ hwā hom.

¹²Ko e ji ha mwin, yɛ a sé gwa hom o, hwey hwông da hom, ko e hê neng-gwɔ hom wɛt. Me kwong, ma ra weneng mɛ.

¹³E jeng de Dagwi a gas me na lɔ da hom vɔk e sevwel seduk, ma ha a yɛ, ma yang ɛ, ‘Nerat de hwô ra a me e kahɛ kwɔn de wot a wɔ́ ɛ̀, hwo ye, me ma sé gwa mō.’ ”

¹⁴Abimɛlɛk a jut vyēl, na berɔndɔng, tanga besam beras na beha, a nɔ̂ng Abraham, ko a toyo a yɛ na hwā mɛ Sara.

¹⁵A yang ɛ, “Di, vwel hom a hemo; sangal e kwɔn de yey mō ya simo”.

¹⁶Ko a yâng Sara, “Di, ma ga nɔ̂ng gwà mō dyām pyɛng gu rining (1,000), yaga nuha na mwa vemo de ba sé tanga hwo wɔgɔ, vit a hwo na nɛn. Vit a mwat de e tɛ̀ a hwo rekyìt.”

¹⁷Abraham a ra won yaga Abimɛlɛk, ko Dagwi a jut yɔ́m de a kana tɛ̀ e ra lɔ mɛ. Yaga Dagwi Darwey a ga kana tɛ̀ Abimɛlɛk, na hwā mɛ, tanga besam mɛ behwong o ba tɔk sɛ̀ tɔs wɛt, yaga remo de a jut Sara, hwâ Abraham. Ko a remo yɛn a to tɔk tɔs nèy.